ޚިދުމަތްތައް ދިނުމަށް ރަށްރަށަށް ދާ މީހުން ކަރަންޓީން ވާން ނުޖެހޭ އުސޫލެއް އާންމުކޮށްފި
16 ޖުލައި 2020 | ބުރާސްފަތި 14:46ދަތުރުކުރުމުގެ ކުރިން ހުއްދަ ނަގަން ޖެހޭ
ރަށެއްގެ މަގު ހެދުމުގެ މަސައްކަތުގެ ތެރެއިން، މިފަދަ މަސައްކަތްތަކަށް ދާ މީހުން ކަރަންޓީން ވާން ނުޖެހޭނެ ކަމަށް އުސޫލުގައިވޭ
ކޮވިޑް-19ގެ ކޮމިޔުނިޓީ ސްޕްރެޑް އޮތް ރަށަކުން އެހެން ރަށަކަށް ގޮސް އެރަށުގައި ދެވޭ އާންމު ޚިދުމަތްތަކާއި ހިންގަމުންދާ ޕްރޮޖެކްޓްތަކުގެ މަސައްކަތްތައް ކުރުމަށް ރަށްރަށަށްދާ މީހުން ކަރަންޓީން ވާން ނުޖެހޭ ގޮތަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ހަމަޖައްސައިފިއެވެ.
އެޗްޕީއޭއިން ކޮވިޑް-19ގެ ހާލަތާއި ގުޅިގެން އާންމު ޚިދުމަތްތައް ފޯރުކޮށްދިނުމަށް އެއްރަށުން އަނެއް ރަށަށް ދަތުރުކުރުމުގައި އަމަލުކުރަންވީ ގޮތުގެ އުސޫލުގައި ބުނެފައިވަނީ ކޮވިޑް-19އިގެ ކޮމިޔުނިޓީ ސްޕްރެޑް އޮތް ރަށަކުން އެހެން ރަށަކަށް ގޮސް އެރަށުގައި ދެވޭ އާންމު ޚިދުމަތްތަކާއި ހިންގަމުންދާ ޕްރޮޖެކްޓްތަކުގެ މަސައްކަތްތައް (ޔުޓިލިޓީސް، މެއިންޓެނަންސް، އެކި ޕްރޮޖެކްޓް މަސައްކަތްތަކާ ގުޅޭއިންސްޕެކްޝަން ފަދަ) މެދުނުކެނޑި ފޯރުކޮށް ދިނުމަށް ބޭނުންވާ ކަމަށެވެ.
މިއުސޫލުގެ މަގުސަދަކީ ކަރަންޓީނު ވުމުކާނުލާ މިފަދަ މަސައްކަތްކުރާ ފަރާތްތައް ކުރު މުއްދަތަކަށް ރަށް ރަށަށް ގޮސް މަސައްކަތްކުރުމުގައި އަޅަންޖެހޭ ރައްކާތެރިކަމުގެ ފިޔަވަޅުތައް ބަޔާންކޮށް އަންގައިދިނުން ކަމަށެވެ.
އެޗްޕީއޭއިން ބުނީ މިފަދަ މަސައްކަތްތައް ކުރުމަށް ރަށްރަށަށް ދަތުރުކުރަން ޖެހޭ މީހުން ދަތުރުކުރުމުގެ ކުރިން ހުއްދަ ނަގަން ޖެހޭ ކަމަށާއި، ދަތުރުކުރާ ރަށެއްގެ ކައުންސިލަށް އެކަމުގެ މައުލޫމާތު ދޭންޖެހޭ ކަމަށެވެ.
އެޗްޕީއޭއިން ހުއްދަ ދިނުމަށް ނިންމާފައިވާ ދާއިރާތަކަކީ ކޭބަލް އަދި މީޑިއާ ނެޓްވޯކްގެ ހިދުމަތްތައް، ބޭންކްގެ ހިދުމަތްތައް، ވޯޓަރ ސަޕްލައި، ކަރަންޓު ފަދަ ޔުޓިލިޓީ ޚިދުމަތްތައް، ސިއްޚީ ޚިދުމަތްދޭ ތަންތަނުގެ ކަންތައްތައް ބެލުމާއި ވަގުތީ ގޮތުން ދޭން ޖެހޭ ޚިދުމަތްތައް، މެއިންޓަނެންސް މަސައްކަތްތައް، ސަރުކާރާއި އަމިއްލަ ފަރާތްތަކުން ރަށްރަށުގައި ހިންގާ ޕްރޮޖެކްޓްތަކުގެ އިތުރުން އާއްމު ޚިދުމަތްތަކާ ގުޅޭ އެހެނިހެން މަސައްކަތްތައް ހިމެނެއެވެ.
އެޗްޕީއޭގެ މިއުސޫލުގައި ޚިދުމަތްތަކާއި ހިންގަމުންދާ ޕްރޮޖެކްޓްތަކުގެ މަސައްކަތް ކުރުމަށް ރަށްރަށަށް ދިއުމަށް ހުއްދަ ހޯދުމުގައި އަމަލު ކުރަންވީ ގޮތާއި، މަސައްކަތް ހިންގާ މުއައްސަސާގެ ޒިންމާ އަދި ރަށްރަށަށް ދަތުރުކުރާ ފަރާތްތަކުން އަމަލު ކުރަން ޖެހޭ ގޮތް ކަނޑައަޅާފައިވެއެވެ.
މިއުސޫލުގައި ރަށު ކައުންސިލުގެ ޒިންމާ ކަނޑައަޅާފައިވާއިރު، އާންމު ޚިދުމަތްތަކާއި މުހިންމު މަސައްކަތްތައް ކުރުމަށް މާލެއިން ރަށްރަށް ދާ މީހުންނަށް މަސައްކަތްތައް ކުރުމަށް މަގުފަހި ކޮށްދޭން ޖެހެއެވެ.
