ފްލެޓާ ގުޅޭ ގޮތުން މުއިއްޒު ދޮގު ހެއްދެވިކަން ކޮމެޓީއަށް ހާމަވެއްޖެ

ހިޔާ މަޝްރޫއުގެ ދަށުން ހުޅުމާލޭގެ ދެވަނަ ފިޔަވަހީގައި، އަޅާފައިވާ، ފްލެޓްތަކުގެ އަގާއި ގުޅިގެން ކުރީގެ ހައުސިންގ މިނިސްޓަރ ޑރ. މުހައްމަދު މުއިއްޒު ދޮގު ހައްދަވާފައިވާކަން، ރައްޔިތުންގެ މަޖިލީހުގެ ކޮމެޓީ އަށް ހާމަވެއްޖެއެވެ.

ރައްޔިތުންގެ މަޖިލީހުގެ ގައުމީ ތަރައްގީއާ ތަރިކައިގެ ކޮމެޓީން ބުރާސްފަތި ދުވަހު ބޭއްވި ބައްދަލުވުމަށް ކުރީގެ ހައުސިންގ މިނިސްޓަރ މުއިއްޒުގެ އިތުރުން، މި ސަރުކާރުގެ ޕްލޭނިންގ އެންޑް ހައުސިންގ މިނިސްޓަރ މުހައްމަދު އަސްލަމް ބައިވެރިވެވަޑައިގަންނަވާފައެވެ.

ކޮމެޓީގެ މެމްބަރުން ކުރެއްވި ސުވާލުތަކަށް ޖަވާބު ދެެއްވިއިރު، މުއިއްޒު ވިދާޅުވީ، ހިޔާ މަޝްރޫއުގެ ދަށުން އިމާރާތްކޮށްފައިވާ، 25 ބުރީގެ 16 ޓަވަރުގެ މަޝްރޫއުއަކީ އޭނާގެ ބެލުމުގެ ދަށުން ހިންގާފައިވާ މަޝްރޫއެއް ނޫން ކަމަށެވެ. ނަމަވެސް ހިޔާ މަޝްރޫއުގެ ފްލެޓެއްގެ މަހު ކުލި 5،600ރ ކަމަށް ވިދާޅުވެފައިވާނީ، ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)އިންނާއި ރައީސް އޮފީހުން އޭރު ދީފައިވާ މައުލޫމާތު ތަކަށް ބިނާކޮށް، ވިދާޅުވެފައިވާ އަގު ކަމަށެވެ.

ކޮމެޓީގެ މެމްބަރުން ސުވާލު ކުރެއްވުމުން ވެސް މުއިއްޒު ވިދާޅުވީ، އެ އަގުގައި ފްލެޓް ދެވޭނެ ކަމަށާއި، އަދި ރައީސް ޔާމީންގެ ސަރުކާރުން ނިންމާފައިވަނީ ވެސް ފިނިޝިންގއާއެކު އެ ފްލެޓްތައް ހަވާލު ކުރުމަށް ކަމަށް ވެސް މުއިއްޒު ވިދާޅުވިއެވެ.

ނަމަވެސް، މި ސަރުކާރުގެ ހައުސިންގ މިނިސްޓަރ މުހައްމަދު އަސްލަމް ވިދާޅުވީ، ހިޔާ މަޝްރޫއުގެ ފްލެޓަކަށް، އިމާރާތްކުރުމުގެ ޚަރަދާއި 20 އަހަރަށް ބަހާލައިގެން، ކޮންމެ މަހަކު ފައިސާ ދައްކާގޮތަށް، 6 ޕަސެންޓްގެ އިންޓަރެސްޓާއެކު ރިސްކް ވެލިޔު ނުކޮށްވެސް، މަހަކަށް 6،849ރ ޖެހޭ ކަމަށެވެ.

އަސްލަމްގެ އެ ވާހަކައަށް އެ ބައްދަލުވުމަށް ވަޑައިގެންނެވި އެޗްޑީސީން ސީނިއަރ މުވައްޒަފު ވެސް ވަނީ އަސްލަމް އެ ވިދާޅުވަނީ، ތެދު މައުލޫމާތު ކަމަށް ވިދާޅުވެފައެވެ.

އަސްލަމް ވަނީ މަހަކު ފްލެޓަކަށް ދައްކަން ޖެހޭ އަގު، 7،000ރ ގައި ހިފެހެއްޓޭނެ ކަމަށް މީގެކުރިން ވިދާޅުވެފައެވެ.

އަސްލަމް ވިދާޅުވީ، އެބަސްވުމުގައި، އެތެރޭގެ ދޮރުތަކާއި، ޓައިލްސް ޖެހުމާއި، ފަންކާ އަދި ބޮކި ފަދަ ތަކެެއްޗާއެކު، ފިނިޝިންގ މަސައްކަތް ނުހިމެނޭތީ، މި ސަރުކާރުން 42 މިލިއަން ޑޮލަރުގެ ލޯނެއް ނަގައިގެން އެ މަސައްކަތް ނިންމުމަށް ވިސްނި ކަމަށެވެ. ނަމަވެސް، މިސަރުކާރުން ފަހުން ނިންމީ، މި ޕްރޮޖެކްޓަށް އިތުރު ލޯނެއް ނުނަގައި، އެއްބަސްވުމުގައި އޮތްގޮތަށް ވީހާ ވެސް އަވަހަކަށް ނިންމުމަށް ކަމަށެވެ.

"ހިޔާ" މަޝްރޫއުގެ ދަށުން 25 ބުރީގެ 16 ޓަވަރު އިމާރާތްކުރުމަށް ޗައިނާ ސްޓޭޓް ކޮންސްޓަރަކްޝަން އިންޖީނިއަރިންގ ކޯޕަރޭޝަން ލިމިޓެޑާ ހަވާލުކުރުމުގެ އެއްބަސްވުމުގައި ސޮއިކުރީ، 20 ޖުލައި 2016 ގައެވެ. މިއީ ދިވެހި ސަރުކާރުން، 434 މިލިއަން ޑޮލަރުގެ (6.692 ބިލިއަން ރުފިޔާ) ލޯނެއް ނަގައިގެން ހިންގާ ޕްރޮޖެޓެކެވެ. މިއީ އެ ހައުސިންގ ލޯނުގެ ސީދާ އަދަދުން 7000 ފްލެޓަށް ބަހާލާނަމަ، ފްލެޓަކަށް 62،000 ޑޮލަރު ނުވަތަ 956،040 ރުފިޔާގެ ރޭޓެކެވެ.

ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހުގެ ސަރުކާރުން ވަނީ، މުޅި ޓަވަރުގައި ޔުނިޓްތައް ނުވަތަ ފްލެޓް ހަދައިގެން ރައްޔިތުންނަށް އެތަންތައް ދިނުމުގެ ބަދަލުގައި، އެތަންތަނުން ރައްޔިތުންނަށް ލިބެންޖެހޭ ހިދްމަތްތައް ވެސް ލިބިދޭ ގޮތަށް ފްލެޓްތައް ދޫކުރުމަށެވެ. އެގޮތުން، ރައީސް ސޯލިހުގެ ސަރުކާރުން ވަނީ 7000 ފްލެޓްގެ ބަދަލުގައި 6720 ފްލެޓް ދިނުމަށް ނިންމާފައެވެ. އެގޮތުން ކޮންމެ ޓަވަރެއްގެ ގްރައުންޑް ފްލޯ، ފިހާރަތަކަށާއި ބުކްޝޮޕްތަކަށާއި ސެކިއުރިޓީއާއި ކުނި މެނޭޖް ކުރުމާއި އިމާރާތުގެ މެއިންޓެނެންސް އަދި އިދާރީ ކަންކަމުގެ އިތުރުން، ގުރްޢާން ކްލާސްތައް ފަދަ ތަންތަން ހިންގުމަށް ނިންމާފައެވެ.