ބްރެޒިލްގެ ރައީސް ދެވަނަ ފަހަރަށް ޓެސްޓު ކުރުމުން ވެސް ކޮވިޑަށް ޕޮޒިޓިވް
16 ޖުލައި 2020 | ބުރާސްފަތި 03:47ފުރަތަމަ ޕޮޒިޓިވްވިކަން ހާމަކޮށްފައިވަނީ މިމަހުގެ 07 ގައި
ބޮލްސޮނާރޯ ކޮވިޑް ސިފަކުރައްވަނީ ވަރަށް އާދައިގެ ރޯގާއެއްގެ ގޮތުގައި
ބްރެޒިލްގެ ރައީސް ޖައީރް ބޮލްސޮނާރޯ ދެވަނަ ފަހަރަށް ޓެސްޓު ކުރުމުން ވެސް ކޮވިޑް-19 އަށް ޕޮޒިޓިވްވެއްޖެއެވެ.
ރައީސް ބޮލްސޮނާރޯ ހުން ގަދަވެ، ކޮވިޑް-19 ގެ އަލާމާތްތައް ފެނުމާ ގުޅިގެން ކޮވިޑަށް ޕޮޒިޓިވްވިކަން ފުރަތަމަ ހާމަކޮށްފައިވަނީ 07 ޖުލައި ގައެވެ. ބޮލްސޮނާރޯއަކީ ތަކުރާރުކޮށް މިއީ އާދައިގެ ރޯގާއެއްގެ ގޮތުގައި ސިފަކުރައްވާ، ވާހަކަ ދައްކަވާފައިވާ ބޭފުޅެކެވެ.
އޭޕްރީލް މަހު ބޮލްސޮނާރޯ ވިދާޅުވީ އެމަނިކުފާނަށް ކޮވިޑް-19 ޖެހުނު ކަމުގައި ވިޔަސް މާބޮޑަށް ބިރު ނުގަންނާނެ ކަމަށާއި، ކަންބޮޑު ނުވާނެ ކަމަށެވެ. މާބޮޑު ސަމާލުކަމެއް ނުދެއްވާ މޭރުމަކުން ރައީސް ބޮލްސޮނާރޯ ވަނީ އެކި ސިޓީތައް ވެސް ލޮކްޑައުން އަކަށް ދިޔަ ނަމަވެސް ހާލަތު ރަނގަޅުނުވާނެ ކަމަށާއި، ކަންކަން ފަސޭހަކޮށްލާ ދޫކޮށްލުމަށް ހިތްވަރު ދެއްވާ ގަވަރުނަރުންނާއި މަޝްވަރާ ކުރައްވާފައެވެ.
ބްރެޒިލްގައި ހަލުވިކަމާއެކު ކޮވިޑް ރޯގާ ފެތުރެމުން ދާއިރު، އެ ގައުމުގެ ގިނަ ރައްޔިތުންތަކެއް ވަނީ ބޮލްސޮނާރޯގެ ނިންމެވުންތަކަށް ފާޑުކިޔާފައެވެ. ހާއްސަކޮށް ސިއްހީ މާހިރުންގެ އިރުޝާދަށް ސީދާ ގޮންޖައްސަވާ، މާސްކު އެޅުމާއި އިޖުތިމާއީ ގައިދުރުކަން ނުބަހައްޓާ އާންމުންގެ ތެރޭގައި އުޅުއްވި މައްސަލައިގައި ގިނަ ބަޔަކު ވަނީ ނުރުހުންފާޅުކޮށްފައެވެ.
