ފްލެޓް ލިބޭ ލިސްޓުގައި 9517 މީހުން، 2500 ފްލެޓު ވުޖޫދުގައި ނެތް!
ކުރީ ސަރުކާރުން ފްލެޓުތަކަށް ކުރިމަތިލުމަށް އިއުލާނުކޮށްފައިވަނީ 12 ކެޓަގަރީއަކަށް
7000 ފްލެޓްގެ \"ހިޔާ\" މަޝްރޫއުގެ ޓަވަރުތަކެއް
ހިޔާ މަޝްރޫއުގެ ދަށުން ފްލެޓު ލިބޭނެ ކަމަށް އާއްމުކުރި ލިސްޓުގައި 9،517 މީހަކަށް ފްލެޓު ލިބޭނެ ކަމަށް އޮތް ނަމަވެސް، އޭގެތެރެއިން 2،500 ފްލެޓު ވުޖޫދުގައި ވެސް ނެތް ކަމަށް ފްލެޓް ތަކުގެ މައްސަލަ ބަލާ ކޮމިޓީން ބުނެފިއެވެ.
ބުދަ ދުވަހު އޮތް ގައުމީ ތަރައްގީއާއި ތަރިކައިގެ ކޮމިޓީގައި ފްލެޓު ކޮމެޓީން ވަނީ ކުރީގެ ރައީސް ޔާމީނުގެ ސަރުކާރުގައި ހުޅުވާލި ހިޔާ މަޝްރޫއުގެ ފްލެޓުތަކުގެ މައްސަލަ ގޮސްފައިވާ ހިސާބު ހިއްސާ ކޮށްފައެވެ.
ކުރީ ސަރުކާރުން ފްލެޓުތަކަށް ކުރިމަތިލުމަށް އިއުލާނުކޮށްފައިވަނީ 12 ކެޓަގަރީއަކަށެވެ. އެ 12 ކެޓަގަރީއަށް ފޯމު ހުށަހަޅާފައިވާ އަދަދުތަކުގެ ތަފްސީލް، ކޮމެޓީގެ މެމްބަރު ތޯހާ މުހައްމަދު ވަނީ ހިއްސާ ކުރައްވާފައެވެ.
މި 12 ކެޓެގަރީގެ ތެރެއިން އެއްކޮށް މަސައްކަތް ނިމިފައިވަނީ ހަ ކެޓެގަރީއެއްގެއެވެ.
އެ ކޮމެޓީން ބުނީ މާލެ ރަށްވެހިންނަށް ޚާއްސަ 2 ކޮޓަރީގެ ފްލެޓު ކެޓަގަރީގެ މަސައްކަތް މިމަހުގެ ނިޔަލަށް މުޅިން ނިމޭނެ ކަމަށެވެ. މީގެ އިތުރުން ތޯހާ ވިދާޅުވީ މިދިޔަ ސަރުކާރުގައި '2500 ފްލެޓު ލިސްޓެއް' އާއްމުވި ކަމަށެވެ. ނަމަވެސް ބެލި ބެލުމުން އެއީ ވުޖޫދުގައިވެސް ނެތް ފްލެޓުތަކެއްކަން ފާހަގަވާކަމަށެވެ.
ނިމިދިޔަ ސަރުކާރުން ފްލެޓު އެވޯޑުކޮށްފައިވާ ގޮތަށް ބަލާލާއިރު ހުޅުމާލެ ފޭސް 2 ގައި އަޅާފައިވާ 16 ޓަވަރުގެ 7000 ފްލެޓު ހުރި ނަމަވެސް '7000 ފްލެޓު ލިސްޓު'ގައި 7017 މީހުންނަށް ލިޔުން ލިބިފައިވާކަން ފާހަގަވެފައިވާ ކަމަށެވެ. އަދި މިގޮތަށް ބަލާއިރު،މުޅި ޖުމްލަ 9517 ލިޔުމެއް ދޫކޮށްފައިވާކަން ފާހަގަވެފައިވާކަމަށެވެ.
މި މަޝްރޫއުގެ އަމަލީ މަސައްކަތް ފަށާފައިވަނީ 19 ޑިސެމްބަރު 2017 ގައެވެ. އެގްރީމެންޓްގައިވާ ގޮތުން، 730 ދުވަހުގެ ތެރޭގައި އެ މަޝްރޫއު ނިންމަންޖެހެއެވެ. އެއީ ދެ އަހަރުގެ މުއްދަތެކެވެ.
އެހެންކަމުން މި ޕްރޮޖެކްޓް 19 ޑިސެމްބަރު 2019 ހުންނަން ޖެހޭނީ ނިމިފައެވެ. އެކަމަކު އަދިވެސް މި ޕްރޮޖެކްޓްގެ މަސައްކަތް މުޅިއަކުން ނުނިމެއެވެ. ނަމަވެސް މިހާރު 90 ޕަސެންޓް ނިމިފައިވާ ކަމަށް ހައުންސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބުނެއެވެ.
ހިޔާ މަޝްރޫއުގެ ދަށުން އިމާރާތްކުރި 16 ޓަވަރަށް ބޭރުން ބަލާލާއިރު ރީތި ގޮތެއް ހުރިނަމަވެސް އެއީ އުޅެން އެންމެ އެކަށީގެންވާ ތަނެއް ނޫން ކަމަށް ބައެއް ފަރާތްތަކުން ސިފަކޮށްފައިވެއެވެ. އަދި ހާއްސަކޮށް، ފްލެޓްތަކުގެ ކޮޓަރިތަކުގެ ސައިޒު ކުޑަކަމާއި، ފާހަނާއާއި ލޯންޑަރީ ބައިގެ ޖާގަ ކުޑަކަމުންނާއި އެތަނުގައި ދިރިއުޅުމެއް، އުޅެން ބޭނުންވާ މީހުންނަށް ބޮޑެތި ދަތިތަކެއް ހުރިކަން ފާހަގަ ކޮށްފައިވެއެވެ.
