ރާއްޖެޓީވީއާ ދެކޮޅަށް ޕީޕީއެމުން މޯލްޑިވްސް ބްރޯޑްކާސްޓިން ކޮމިޝަން (ބްރޮޑްކޮމް) އަށް ހުށަހެޅި މައްސަލައިގެ އަޑުއެހުމަށް ޕީޕީއެމުން ހާޒިރެއް ނުވިއެވެ.
ރާއްޖެޓިވީއާ ދެކޮޅަށް ޕީޕީއެމުން ބްރޮޑްކޮމްއަށް ހުށަހަޅާފައިވާ މައްސަލައަކީ ކުރީގެ ރައީސް އަބްދުﷲ ޔާމީން އަބްދުލް ޤައްޔޫމްގެ ދައްތާފުޅުގެ ޖަނަޒާގައި ބައިވެރިވެވަޑައިނުގެންނެވުމާއި ގުޅިގެން ރާއްޖެޓީވީން އެކަމުގެ ހަޤީޤަތް ހާމަކޮށް ލިޔުނު ޚަބަރަކީ ދޮގު ޚަބަރެއް ކަމަށް ބުނެ ބްރޮޑްކޮމްއަށް ހުށަހެޅި މައްސަލައާ ގުޅިގެންނެވެ.
ރާއްޖެޓީވީން މި ޚަބަރު ގެނެސްދީފައިވަނީ ސައްހަ މައުލޫމާތު ހޯދުމަށްފަހު އެ މައުލޫމާތުތަކުގެ މައްޗަށް ބިނާކޮށެވެ. އަދި މި ޚަބަރާއި ގުޅިގެން ފަހުން ރިޕޯޓެއް ވެސް ގެނެސްދީފައިވާއިރު ރާއްޖެޓީވީން ގެނެސްދީފައިވާ މައުލޫމާތުތަކަކީ ސައްހަ މައުލޫމާތެއްކަން ވަނީ ހާމަވެގެން ގޮސްފައެވެ. އެގޮތުން ރާއްޖެޓީވީގެ ފަލަސުރުޚީ ޕްރޮގްރާމުގައި ހޯމް މިނިސްޓަރު ޝެއިހް އިމްރާން އަބްދުﷲ ވަނީ ރައީސް ޔާމީން ދައްތާފުޅުގެ ޖަނާޒާއަށް، ރައީސް ޔާމީން ވަޑައިނުގެންނެވި ސަބަބު ސާފުކޮށް ދެއްވާފައެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން މިނިސްޓަރު އިމްރާން ވިދާޅުވީ އެކަމުގެ ފޯނު ކޯލު ލިބުނު ހިސާބުން އެމަނިކުފާނު އިންނެވި ބައްދަލުވުން ހުއްޓާލައްވާފައި، ކަރެކްޝަންސްގެ ސީޕީއާއެކު އެކަމުގައި މަޝްވަރާ ކުރެއްވި ކަމަށެވެ. އަދި ދައްތާފުޅުގެ ޖަނަޒާއަށް ވަޑައިގަތުގެ އިންތިޒާމް ރައީސް ޔާމީނަށް ހަމަޖައްސަވައިދެއްވި ކަމަށެވެ. ނަމަވެސް ޖަނާޒާއަށް ގެންދަވާ ކަމުގައިވާނަމަ އަނބުރާ ޖަލަށް ވަޑައިގަންނަވަން ބޭނުންފުޅުނުވާ ކަމަށް ރައީސް ޔާމީން ވިދާޅުވެފައިވާ ކަމަށް މިނިސްޓަރު އިމްރާން ވިދާޅުވިއެވެ.
މި ޚަބަރަކީ ދޮގު ޚަބަރެއް ކަމަށް ބުނެ މައްސަލަ ޕީޕީއެމުން ހުށަހަޅާފައިވާއިރު ބުދަ ދުވަހު ރާއްޖެޓީވީގެ ފަރާތުން ބްރޯޑްކޮމްއަށް ވަޑައިގެންނެވީ ރާއްޖެޓީވީގެ ޑެޕިއުޓީ ސީއޯއޯ ނާޒުމީ ސައިދާއި، ޕްރޮގްރާމްސް އެންޑް ކޯޑިނޭޝަން އާމިރު ސަލީމާއި އަދި ރާއްޖެޓީވީގެ ޤާނޫނީ ވަކީލު މުއައްވިޒް ރަޝީދެވެ.
މި މައްސަލައިގެ ޑިސްޕިއުޓް ރިޒޮލިއުޝަން މަރުހަލާގެ ތެރެއިން ރާއްޖެޓީވީން ބްރޮޑްކޮމަށް ދިޔަ ނަމަވެސް މައްސަލަ ހުށަހެޅި ފަރާތުން ބްރޮޑްކޮމަށް ހާޒިރުވެފައެއް ނުވެއެވެ.
އާންމު ގޮތެއްގައި ބްރޯޑްކޮމްއަށް ހުށަހެޅޭ މިފަދަ މައްސަލަތަކުގައި އެ މައްސަލާގެ ބާވަތަށާއި މައްސަލާގައި ސައްހަކަމުގެ މައްޗަށް ބިނާކޮށް މައްސަލަ ނުބަލާ ދޫކޮށްލުމުގެ އިހްތިޔާރު އެ ކޮމިޝަނަށް ލިބިގެންވެއެވެ.
އެހެންނަމަވެސް މި މައްސަލާގައި ކަންތައްތައް ސާފުވާން އޮތްއިރު ވެސް ބްރޯޑްކޮމުން ވަނީ މައްސަލަ ބަލަން ނިންމާފައެވެ.
މައްސަލަ ހުށަހެޅި ފަރާތުން ބްރޮޑްކޮމަށް ހާޒިރުނުވުމާއި ގުޅިގެން ދެން މި މައްސަލާގައި ގޮތެއް ނިންމާނީ ކޮމިޝަންގެ މެމްބަރުން މަޝްވަރާ ކުރެއްވުމަށްފަހުގައި ކަމަށް ކޮމިޝަނުން ބުނެއެވެ.
