ދިރިއުޅެން އެކަށީގެންނުވާ ތަންތަނުގައި މިހާރުވެސް 5000އެއްހާ އާއިލާ އުޅެމުންދޭ: އަސްލަމް
މިނިސްޓަރު އޮފް ޕްލޭނިންގް ހައުންސިންގް އެންޑް އިންފްރާންސްޓްރަކްޗަރ މުހައްމަދު އަސްލަމް
ގުޅީފަޅު ހިއްކުމަށްފަހު މާލޭގެ ރައްޔިތުންނަށް އެރަށުން 1200 ބިން ދޫކުރުމަށް ނިންމާފައިވާ ކަމަށް މިނިސްޓަރު އޮފް ޕްލޭނިންގް ހައުންސިންގް އެންޑް އިންފްރާންސްޓްރަކްޗަރ މުހައްމަދު އަސްލަމް ވިދާޅުވެއްޖެއެވެ.
ބުދަ ދުވަހުގެ ޖަލްސާގައި ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ކުރެއްވި ސުވާލަށް ޖަވާބުދެއްވަމުން މިނިސްޓަރ ވިދާޅުވީ ދިރިއުޅެން އެކަށީގެންނުވާ ތަންތަނުގައި މިހާރު ވެސް 5000 އެއްހާ އާއިލާ އުޅެމުންދާ ކަމަށާއި ގުޅީފަޅުން 1200 ބިން ދޫކުރުމުން މިކަމަށް ކޮންމެވެސް ވަރެއްގެ ހައްލެއް ލިބިގެންދާނެ ކަމަށެވެ.
ހުޅުމާލޭގައި މިވަގުތު ވެސް ބޯހިޔާވަހިކަމުގެ މަޝްރޫއުތައް ހިނގަމުންދާކަން ފާހަގަކުރައްވާ އަސްލަމް ވިދާޅުވީ ނިމިފައި ހުރި ހައުސިންގް ޔުނިޓުތައް ވެސް އެބަހުރި ކަމަށެވެ. އެހެންނަމަވެސް ބައެއް ތަންތަނުގައި އެއްވެސް ބަޔަކު ދިރިއުޅެމުން ނުދާ ކަމަށެވެ.
އަސްލަމް ވިދާޅުވީ ހިޔާ މަޝްރޫއު ފަދަ ބޯހިޔާވަހިކަމުގެ މަޝްރޫއުގެ ދަށުން އަޅާ ޔުނިޓުތަކަކީ ވަކި ބަޔަކަށް ޚާއްސަކޮށްގެން އަޅާ ތަންތަނަށް ވީ ނަމަވެސް، އެ ފަރާތްތައް ނޫން މީހުންނަ ވެސް މި ތަންތަން ދޫކޮށްފައިވާ ކަމަށެވެ. އެގޮތުން، މި ތަންތަނަކީ މާލޭގެ ރައްޔިތުންނަށް ޚާއްސަކޮށްފައިވާ ތަންތަނަށް ވީ ނަމަވެސް ރަށްރަށުގައި ދިރިއުޅޭ ފަރާތްތަކަށް ވެސް މި ފްލެޓްތައް ދީފައިވާކަމަށެވެ.
ގުޅީފަޅުގެ މަޝްރޫއު ފަށާފައިވަނީ 2010 ވަނަ އަހަރު ކުރީގެ ރައީސް މުޙައްމަދު ނަޝީދުގެ ވެރިކަމުގައެވެ. މަޝްރޫއުގެ މަސައްކަތް އެއްކޮށް ނިންމާލުމަށް ކަނޑައަޅާފައި އޮތީ 2016 ވަނަ އަހަރުގެ ނިޔަލަށެވެ. ރައީސް ނަޝީދުގެ ސަރުކާރު 2012 ވަނަ އަހަރުގައި ނިމުމަކަށް އައުމަށްފަހު އެތައް ދުވަހަކަށް ގުޅިފަޅުގެ މަޝްރޫޢުގެ މަސައްކަތް ހުއްޓިގެންދިޔަ އެވެ. މި ހުއްޓުމާއެކު ޢިމާރާތް ކުރަމުން އައި ފުލެޓުތަކުގެ މަސައްކަތްތައް ވެސް ހުއްޓުމަކަށް އައެވެ. އަދި ރައީސް ޔާމީނުގެ ސަރުކާރުން އެއްބަސްވުން ބާޠިލުކުރީ 2016 ވަނަ އަހަރުގެ ފެބްރުއަރީ މަހުގެ 06 ވަނަ ދުވަހުއެވެ.
