ރާއްޖެއަށް އައުމާއި ފުރުމުގެ ކުރިން ޓްރެވަލަރ ހެލްތް ޑިކްލަރޭޝަން ހުށަހަޅަންޖެހޭ ގޮތަށް ހަދައިފި
15 ޖުލައި 2020 | ބުދަ 04:29ޓްރެވެލަރ ހެލްތް ޑިކްލަރޭޝަން ފޯރމް އިމިގްރޭޝަނަށް ހުށަހަޅަން ޖެހޭނީ އޮންލައިންކޮށް
ވެލާނާ އިންޓަރނޭޝަނަލް އެއަރޕޯޓުގައި ދަތުރުވެރިން ފުރަން ގޮސް
މޯލްޑިވްސް އިމިގްރޭޝަނުން 'ޓްރެވަލަރ ހެލްތް ޑިކްލަރޭޝަން' ތަޢާރަފް ކޮށްފިއެވެ.
އިމިގްރޭޝަނުން ބުނީ ކޮވިޑް-19 އާއި ގުޅިގެން ދިވެހިރާއްޖޭގެ ބޯޑަރު ބަންދުކުރުމަށްފަހު 15 ޖުލައިގައި އަލުން ހުޅުވާލާއިރު، ރާއްޖެއަށް އަންނަ ދަތުރުވެރިންނާއި ރާއްޖެއިން ފުރާ ދަތުރުވެރިން 'ޓްރެވެލަރ ހެލްތް ޑިކްލަރޭޝަން' ފޯރމް އިމިގްރޭޝަނަށް ހުށަހަޅުއްވަން ވާނެ ކަމަށެވެ.
އެގޮތުން ރާއްޖެ އަންނަ ދަތުރުވެރިން ރާއްޖެ އައުމުގެ 24 ގަޑިއިރު ކުރިން، އަދި ރާއްޖެއިން ފުރާ ދަތުރުވެރިން ރާއްޖެއިން ފުރުމުގެ 24 ގަޑިއިރު ކުރިން، މިފޯމް އޮންލައިންކޮށް ފުރުމަށްފަހު ހުށަހަޅުއްވަން ވާނެ ކަމަށް އިމިގްރޭޝަނުން ބުނެއެވެ.
އިމިގްރޭޝަނުން ބުނީ މި ފޯމު ހުށަހެޅޭނީ މޯލްޑިވްސް އިމިގްރޭޝަންގެ އޮންލައިން ޕޯޓަލް، "އިމުގާ" މެދުވެރިކޮށެވެ. އެގޮތުން "އިމުގާ" ޕޯޓަލްއަށް ޒިޔާރަތްކުރެއްވުމަށްފަހު "Traveller "ޓްރެވެލަރ ހެލްތް ޑިކްލަރޭޝަން" ނެގުމުން މިކަމަށް ޙާއްސަކުރެވިފައިވާ ފޯމު ފެންނާނެ ކަމަށެވެ. އަދި "އިމުގާ" ޕޯޓަލްއަށް ޒިޔާރަތްކުރެވޭނީ imuga.immigration.gov.mv އިން ކަމަށާއި، އިމިގްރޭޝަންގެ ވެބްސައިޓަށް ގޮސް މެނޫ ބަރ އިން "އިމުގާ" ޕޯޓަލް ހިޔާރު ކުރުމުން ވެސް މިޕޯޓަލްއަށް ޒިޔާރަތް ކުރެވޭނެ ކަމަށެވެ.
މީގެ އިތުރުން ރާއްޖެއަށް ޒިޔާރަތްކުރާ ހުރިހާ ފަރާތްތަކުން ވެސް މިފޯމު ހުށަހަޅުއްވަން ވާނެ ކަމަށާއި، އެގޮތުން ޓުއަރިސްޓުންނާއި، ވާރކް ވިޒާ އަދި އެހެނިހެން ވީޒާ ތަކުގައި ރާއްޖެ އަންނަ ބިދޭސީންނާއި އަދި ދިވެހިން ވެސް މި ފޯމު ފުރިހަމަ ކުރައްވަން ވާނެ ކަމަށް އިމިގްރޭޝަނުން ބުނެއެވެ.
އިމިގްރޭޝަންގެ މަޤްސަދަކީ، މި ނާޒުކު ދަނޑިވަޅުގައި ބޯޑަރުގެ ކަންތައްތައް ހަރުދަނާކޮށް ބަލަހައްޓާ، ދަތުރުވެރިން އެއަރޕޯޓުގައި ހޭދަކުރަންޖެހޭ ވަގުތު މަދުކުރުމާއިއެކު ލުއިފަސޭހަ ގޮތްތަކެއް ހަމަޖައްސައިދިނުން ކަމަށް އެ އިދާރާއިން ބުނެއެވެ.
