މާލެ ސަރަހައްދުގައި ހިންގި އިންސްޕެކްޝަންގައި 1475 ތަނެއް ބަލައިފި
15 ޖުލައި 2020 | ބުދަ 03:39ހުރިހާ ކަމެއް ފުރިހަމަ ވެފައިވަނީ 1000 އެއްހާ ތަނެއްގައި
މާލޭގެ މާރުކޭޓް ސަރަހައްދުގައި ހުރި ފިހާރައަކުން މީހުން ތަކެތި ގަންނަނީ
ކޮވިޑް-19 އާ ގުޅިގެން ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ހެދިފައިވާ ޤާވާއިދުތަކާއި އުސޫލްތަކާއި އެއްގޮތަށް އަމަލުކުރަމުންދޭތޯ ބެލުމަށް މާލެ ސަރަހައްދުގައި ކުރިއަށް ގެންދާ މާސް އިންސްޕެކްޝަންގައި މިހާތަނަށް 1475 ތަނެއް ބަލާފައިވާ ކަމަށް މާލެ ސިޓީ ކައުންސިލްގެ ޑެޕިއުޓީ މޭޔަރު ޝަމާއު ޝަރީފް ވިދާޅުވެއްޖެއެވެ.
އަންގާރަ ދުވަހުގެ ރޭ ހެލްތް އިމަޖެންސީ އޮޕަރޭޝަން ސެންޓަރ (އެޗްއީއޯސީ) އިން ނޫސްވެރިންގެ ބައްދަލުވުމުގައި ޝަމާއު ވިދާޅުވީ މިހިނގާ ޖުލައި މަހުގެ 12 ވަނަ ދުވަހު ކުރިއަށް ގެންދަންފެށި މި މާސް އިންސްޕެކްޝަންގައި 44 އިންސްޕެކްޓަރުން ބައިވެރިވެފައިވާ ކަމަށެވެ. ހަތަރު ދުވަހު އިންސްޕެކްޝަން ހިންގިފައިވާއިރު މިހާތަނަށް 1475 ތަނެއް ވަނީ ބެލިފައި ކަމަށް އޭނާ ވިދާޅުވިއެވެ.
މި މަސައްކަތް ކުރިއަށް ގެންގޮސްފައިވަނީ އެޗްޕީއޭއާއި އެމްއެފްޑީއޭ، މާލެ ސިޓީ ކައުންސިލާއި، މިނިސްޓްރީ އޮފް އިކޮނޮމިކް ޑިވެލޮޕްމަންޓާއި، މޯލްޑިވްސް ޕޮލިސް ސާރވިސްއާއި، އެމްއާރުސީ، އެޗްޑީސީ އަދި ވެމްކޯ އާއި ގުޅިގެންނެވެ.
މާލެ އޭރިއާގައި ހިމެނޭ (މާލެ، ހުޅުމާލެ، ވިލިމާލެ، ތިލަފުށީ) ގައި ކުރިއަށް ގެންދިޔަ މި އިންސްޕެކްޝަންގައި ކާބޯތަކެތީގެ ޚިދުމަތްދޭ ތަންތަނާއި ފިހާރަތަކާއި، ސެލޫންތަކާއި، ބޯކޮށާ ތަންތަނާއި، ޖިމް އަދި އެކި ގޮތްގޮތަށް ހެދިފައިހުރި މާރުކޭޓްތައް ވަނީ ޗެކް ކުރެވިފައެވެ.
ޝަމާއު ވިދާޅުވީ ބެލިބެލުމުގައި ހުރިހާ ކަމެއް ފުރިހަމަ ވެފައިވަނީ 1000 އެއްހާ ތަނުގައި ކަމަށާއި، މެދުމިންގަނޑެއްގައި ގިނަ ތަންތަން ހުރި ކަމަށްވިޔަސް އެޗްޕީއޭގެ މިންގަނޑަށް ނުފެތޭ ވަރަށް ގިނަތަންތަން ހުރިކަން ފާހަގަވެފައިވާ ކަމަށެވެ.
މީގެތެރެއިން ރަށުތެރޭގައި މާރުކޭޓްގޮތުގައި ހެދިފައި ހުރި ތަންތަން އެޗްޕީއޭގެ މިންގަނޑު ތަކަށް ވަރަށް ބޮޑަށް ނުފެތޭކަން އޭނާ ފާހަގަ ކުރެއްވިއެވެ. ޚާއްސަކޮށް ބިދޭސީން ތިބޭ ތަންތަނުގައި އެޗްޕީއޭގެ މިންގަނޑުތަކާއި ޚިލާފަށް ކަންކަން ހުރިކަމަށް ޝަމާއު ވިދާޅުވިއެވެ.
މިއިންސްޕެކްޝަންގައި އެންމެ ބޮޑަށް ފާހަގަވެގެންދިޔަ އެއްކަމަކީ ގިނަ ފިހާރަތަކުގައި ތިބޭ ފަރާތްތަކަށް ކޮވިޑާއި ގުޅިގެން އަޅަން ޖެހޭ ފިޔަވަޅުތަކަށް ހޭލުންތެރިވެފައި ނެތްކަން ކަމަށެވެ.
ޝަމާއު ވިދާޅުވީ މިހާރު ނުބެލި ހުރީ ވަރަށް މަދު ތަނެއްކަމަށާއި ކުރިއަށް އޮތް ދެ ދުވަހެއްގެ ތެރޭގައި މި އިންސްޕެކްޝަން އެއްކޮށް ނިންމާލެވޭނެ ކަމަށެވެ.
