ބޮޑެތި ބަލިތަކުގެ ފަރުވާއަށް އިތުރު 59 މީހަކު އިންޑިއާއަށް
ފުރަތަމަ ބުރުގައި ގެންދިޔައީ 28 މީހުން
އެއާޕޯޓުގައި މީހަކު ފުރަންވެގެން މަޑުކޮށްލައިގެން
ރާއްޖެއިން އެއްވެސް ގޮތަކަށް ފަރުވާދެވެން ނެތް ބަލިތަކުގެ އިތުރު 59 ބަލި މީހަކު އާސަންދައިގެ ދަށުން އިންޑިއާއަށް ފުރުވާލައިފިއެވެ.
އެކަން ހާމަކުރެއްވީ އަންގާރަ ދުވަހު ފޮރިން މިނިސްޓަރު އަބްދުﷲ ޝާހިދު އެވެ. މިނިސްޓަރު ކުރައްވާފައިވާ ޓްވީޓެއްގައި ވިދާޅުވީ، ކޮންމެހެން ފަރުވާ ބޭނުންވާ 59 މީހަކު އިންޑިއާގެ ކޮއްޗީގެ އިތުރުން ޓްރިވަންޑްރަމްއަށް ފުރުވާލާފައިވާ ކަމަށެެވެ. އެކަން ފަހިކޮށްދިން ކަމަށްޓަކައި ޝާހިދު ވަނީ އިންޑިއާ ސަރުކާރަށް ހާއްސަ ޝުކުރެއް އަދާކުރައްވާފައެވެ.
އާސަންދައިގެ ދަށުން 28 މީހަކު ވަނީ ފުރަތަމަ ބުރުގައި އިންޑިއާއަށް ގެންގޮސްފައެވެ. ބަލި މީހުންނާއެކު އެ މީހުންގެ އެހީތެރިންނަށް ވެސް ދެވެއެވެ. އިންޑިޔާގައި ބަލި މީހުންނަށް ފަރުވާ ދިނުމަށް ހަމަޖެހިފައިވަނީ އަމްރީތާ އިންސްޓިޓިއުޓް އޮފް މެޑިކަލް ސައިންސަސް އެންޑް ރިސަރޗް ސެންޓަރ، އެއިމްސްގައެވެ. ކަރަންޓީނުގައި ތިބޭނީ އެތަނުގެ އެކޮމޮޑޭޝަން ބްލޮކެއްގައި ކަމަށާއި ކަރަންޓީނުގެ މުއްދަތުގައި ވެސް އެމީހުންގެ ފަރުވާ ކުރިއަށް ގެންދެވޭނެ ކަމަށް އާސަންދައިން ބުނެއެވެ.
އިންޑިއާގެ ބޯޑަރު ބަންދުކޮށް، އަދި ބައެއް ސަރަހައްދުތައް ލޮކްޑައުންގައި އޮތުމުން އިންޑިއާއަށް މިވަގުތު ދަތުރުނުކުރެވޭތީ، ކްރިޓިކަލް ފަރުވާ ހޯދުމަށް އެގައުމަށް އެތެރެވުމަށް ދިވެހިންނަށް ދިން ޚާއްސަ ހުއްދައަކީ މިގޮތަށް އެގައުމަކަށް ދިން ފުރަތަމަ ހުއްދައެވެ.
