މާސްކު އެޅުން މަޖުބޫރު ކޮށްދެއްވުމަށް ރައީސްގެ އަރިހުން އެދިވަޑައިގެންފި
14 ޖުލައި 2020 | އަންގާރަ 01:50އިލްތިމާސްތަކަށް ގިނަ ބަޔަކު ބޯ ނުލަނބާ
ރައީސް ސޯލިހުއާއި ރައީސް މައުމޫން
ރާއްޖޭގައި ކޮވިޑް-19ށް ޕޮޒިޓިވްވާ މީހުން އިތުރުވަމުން ދާތިވެ އަޅާފައިވާ ފިޔަވަޅުތައް ވަރުގަދަކޮށް ބޭރަށް ނުކުމެ އުޅޭއިރު ގައިދުރުކަން ބެހެއްޓުމާއި، މާސްކު އެޅުމަކީ މަޖުބޫރު ކަމެއްގެ ގޮތުގައި ހެދުމަށް މޯލްޑިވްސް ރިޕޯމް މޫވްމަންޓް (އެމްއާރްއެމް) އިން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ އަރިހުން އެދިވަޑައިގެންފިއެވެ.
އެމްއާރްއެމްގެ ވަގުތީ ރައީސް މައުމޫން އަބްދުލްގައްޔޫމް ވަނީ ރައީސް ސޯލިހު އަށް އެޑްރެސް ކުރައްވާ ސިޓީއެއް ފޮނުއްވާފައެވެ.
އެ ސިޓީގައި ރައީސް މައުމޫން ވިދާޅުވީ، ކޮވިޑުން ރައްކާތެރިވުމުގެ ގޮތުން އަޅާފައިވާ ފިޔަވަޅުތައް ލުއިދޭން ފަށާފައިވިޔަސް ސަރުކާރުން ކުރަމުންދާ އިލްތިމާސްތަކަށް ގިނަ ބަޔަކު އަމަލު ކުރަމުން ނުދާ ކަމަށެވެ.
އެކަމުގެ ކަންބޮޑުވުން ފާޅުކުރައްވަމުން ރައީސް މައުމޫން ވިދާޅުވީ، އޭގެ ސަބަބުން ބައްޔަށް ޕޮޒިޓިވްވާ މީހުންގެ އަދަދު އިތުރުވަމުންދާ ކަމަށެވެ. އަދި ސަރުކާރުން ދީފައިވާ ލުއިތަކަށް ބަދަލުގެނެސް، މިހާރަށް ވުރެ ހަރުދަނާ ފިޔަވަޅުތަކެއް އަޅަން ޖެހޭ ކަމަށް ވެސް އެމަނިކުފާނު ވިދާޅުވިއެވެ.
ކޮވިޑް-19އާ ގުޅިގެން ސަރުކާރުން އަންގާފައިވާ އެންގުންތަކާއި އާންމުން އަމަލުކުރޭތޯ މިހާރަށްވުރެން ރަނގަޅަށް ބެލެހެއްޓޭނެ އިންތިޒާމު ހަމަޖައްސާ ރައްޔިތުންގެ ސަލާމަތާއި ރައްކާތެރިކަން ކަަށަވަރު ކޮށްދިނުމަށް އެމްއާރްއެމްގެ ސިޓީ ނިންމާލަމުން ވަނީ، ރައީސް ސޯލިހު އަރިހުން އެދިވަޑައިގެންފައެވެ.
