ކަނީ ބިރިޔާނީއާ ތަންދޫރީ، ބަލަނީ ކަސޯޓީއާއި ދަރޭއާއި، އަމީތާބް އަދި ރޭކާ"

ދިވެހި ސަރުކާރާ އިންޑިއާ ސަރުކާރުގެ ގުޅުން ކުޑަވެގެންދާ ވަގުތުތަކުގައި ވެސް ދިވެހިން އިންޑިއާ އެކުގައި ހިއްސާކުރާ ސަޤާފަތްތައް ދޫނުކުރާ ކަމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެއެވެ.

އިންޑިއާ ސަރުކާރުގެ ހިލޭ އެހީގައި ރާއްޖޭގެ 61 ރަށުގައި ގާއިމްކުރާ އައުޓްޑޯރ ޖިމްތައް ރާއްޖޭގެ ސަރުކާރާ ޙަވާލު ކުރުމަށް ހޯމަ ދުވަހު ޤައުމީ ފުޓުބޯޅަ ސްޓޭޑިއަމްގައި ބޭއްވި ރަސްމިއްޔާތެއްގައި ވާހަކަ ދައްކަވަމުން ރައީސް ނަޝީދު ވިދާޅުވީ، އިންޑިއާއާއި ރާއްޖެއަކީ ޒަމާނުއްސުރެ ގާތް ގުޅުމެއް އޮންނަ ދެ ޤައުމު ކަމަށެވެ. އަދި ބައެއް ފަހަރު ދިވެހި ސަރުކާރާ އިންޑިއާ ސަރުކާރުގެ ގުޅުން ކުޑަވެގެންދާ ވަގުތުތަކުގައިވެސް އިންޑިއާ އެކުގައި ހިއްސާކުރާ ސަޤާފަތްތައް ދިވެހިން ދޫނުކުރާ ކަމަށް ރައީސް ނަޝީދު ވިދާޅުވިއެވެ.

ރައީސް ނަޝީދު ވަނީ އިންޑިއާގެ މަޝްހޫރު އެކްޓަރ އަމީތާބް ބައްޗަން ކޮވިޑް-19 އަށް ޕޮޒިޓިވްވުމާ ގުޅިގެން ބައްޗަންއަށް އަވަސް ޝިފާއަކަށް އެދިވަޑައިގެންފައެވެ.

ރަސްމިއްޔާތުގައި ވާހަކަ ދައްކަވަމުން ރައީސް ނަޝީދު އިތުރަށް ވިދާޅުވީ، އިސްލާމް ދީނާއި، ދިވެހިންގެ މިނިވަންކަން އަބަދުވެސް ދެމި އޮތުމަށް އެދިވަޑައިގަންނަވާ ކަމަށާއި، ރާއްޖޭގެ މިނިވަންކަން ދެމެހެއްޓުމަށް އިންޑިއާއާ އެކުގައި ގާތް ގުޅުމެއް ބޭއްވިދާނެ ކަމަށެވެ. އަދި އެފަދަ ކަންކަމުގައި އިންޑިއާ ކަނޑުގެ އަހުލުވެރިންގެ ގޮތުގައި ވިސްނަން ޖެހޭ ވިސްނުންތަކަށް އިންޑިއާ ފަރިތަވާނެ ކަމުގައި ރައީސް ނަޝީދު ވަނީ ސިފަ ކުރައްވާފައެވެ.

އޭގެ އިތުރުން، މަސްވެރިކަމާއި، ދަތުރުފަތުރުގައި ރާއްޖޭގެ 25،000 އެއްހާ މީހުން އަބަދުވެސް އިންޑިއާ ކަނޑުގެ އައްސޭރީގައި އުޅޭކަން ރައީސް ނަޝީދު ފާހަގަ ކުރެއްވިއެވެ.

ރައީސް ނަޝީދު ވިދާޅުވީ، އިންޑިއާ މިއަދު ތަރައްޤީވެ މުއްސަނދިވެފައިވާ ކަމަށާއި، ރާއްޖޭގެ ޤައުމީ އުފެއްދުންތެރިކަން އިތުރުކޮށް ރައްޔިތުންނަށް ތަނަވަސް ދިރިއުޅުމެއް ފޯރުކޮށްދިނުމަށް އިންޑިއާގެ ތަރައްޤީއާ ގުޅެން ޖެހޭ ކަމަށެވެ. އަދި އެކަމަށް މިހާރުވެސް އަމާޒުހިފައި މަސައްކަތް ކުރައްވަމުން ގެންދާވަކަމަށް ރައީސް ނަޝީދު ވިދާޅުވިއެވެ.

މި ރަސްމިއްޔާތުގައި އިންޑިއާގެ ފަރާތުން އައުޓްޑޯރ ޖިމްތައް ހަދިޔާ ކުރެއްވީ ދިވެހިރާއްޖެއިން އިންޑިއާއަށް ކަނޑައަޅާފައި ހުންނަވާ ހައިކޮމިޝަނަރު ސަންޖޭ ސުދީރެވެ. އަދި ރާއްޖޭގެ ފަރާތުން މި އެހީއާ ޙަވާލުވެވަޑައިގަތީ ޔޫތު މިނިސްޓަރ އަހުމަދު މަހުލޫފުއާއި، ފޮރިން މިނިސްޓަރ އަބްދުﷲ ޝާހިދުގެ އިތުރުން، މަޖިލީހުގެ ރައީސް، ރައީސް މުޙައްމަދު ނަޝީދެވެ.

އިންޑިއާ ސަރުކާރުގެ ހިލޭ އެހީގައި ރާއްޖޭގެ 61 ރަށުގައި ގާއިމްކުރާ އައުޓްޑޯރ ޖިމްގެ ސާމާނު ސަޕްލައިކޮށްދިނުމަށް މިދިޔަ އަހަރު މޯލްޑިވްސް ސްޕޯޓްސް ކޯޕަރޭޝަނާއެކު ވަނީ އެއްބަސްވުމެއްގައި ސޮއިކޮށްފައެވެ.

މި ޖިމްތަކުގެ މަސައްކަތް 90 ދުވަހުގެ ތެރޭގައި ސްޕޯޓްސް ކޯޕަރޭޝަނުން ނިންމަން ޖެހެއެވެ. އެގޮތުން ޖިމްތައް ގާއިމުކުރާނެ 61 ރަށެއް ކަނޑައަޅައި ކައުންސިލަށް ޖިމް ގާއިމްކުރަން ބޭނުންވާ ބިން ކަނޑައެޅުމަށް އޭރު ވަނީ އަންގާފައެވެ.