ބިދޭސީންގެ ހަމަނުޖެހުންތަކާއި ގުޅިގެން ގައުމީ ސަލާމަތަށް ނުރައްކާވާތީވެ ކުއްލި މައްސަލައެއް ހުށަހަޅައިފި

ގަވާއިދާ ޚިލާފަށް އެތެރެފައިވާ ބިދޭސީން މެދުވެރިކޮށް ރާއްޖޭގެ ގައުމީ ސަލާމަތަށް ނުރައްކާތެރިވާ ގޮތަށް ރާއްޖޭގެ ސަލާމަތީ ބާރުތަކާއި ކުރިމަތިލާ މުދަލަށް ގެއްލުންދިނުމަށް ހިތްވަރު ލިބޭގޮތަށް އަމަލުކުރަމުންދާތީ އެކަން ކުށްވެރިކުރުމުގެ ގޮތުން ބިލެތްދޫ ދާއިރާގެ މެމްބަރު އަހުމަދު ހަލީމް ރައްޔިތުންގެ މަޖިލީހަށް ކުއްލި މައްސަލައެއް ހުށަހަޅުއްވައިފި އެވެ.

ހޯމަ ދުވަހުގެ ޖަލްސާއަށް މިމައްސަލަ ހުށަހެޅުމާއެކު މައްސަލަ ބަލައިގަތުމަށް ފެނޭތޯ ނެގުނު ވޯޓުގައި ބައިވެރިވެވަޑައިގެންނެވި 35 މެމްބަރުން ވަނީ މައްސަލަ ބަލައިގަންނަން ފެންނަކަމަށް ވޯޓު ދެއްވާފަ އެވެ. މިމައްސަލަ ހުށަހަޅުއްވަމުން ހަލީމް ވިދާޅުވީ ދިވެހިރާއްޖޭގައި ބޮޑުވެފައިވާ ބިދޭސީންގެ މައްސަލަ ހައްލުކުރުމުގެ ގޮތުން ގަވާއިދާ ޚިލާފަށް އެތެރެވެފައިވާ ބިދޭސީންގެ މައްސަލަ އަވަސް އަދި ދާއިމީ ހައްލެއް ހޯދުމަށް ކުރަންޖެހޭ މަސައްކަތްތައް މިހާރުން މިހާރަށް ކުރުމަށާއި ރާއްޖެއަށް ގަވާއިދާ ޚިލާފަށް ގިނަ އަދަދެއްގެ ބިދޭސީން އެތެރެވެފައިވާ ގޮތް ބަލާ އެކަމާއި ގުޅޭގޮތުން އަޅަންޖެހޭ ފިޔަވަޅުތައް އެޅުމަށް ސަރުކާރުގެ ކަމާބެހޭ އިދާރާތަކަށް ގޮވާލައްވާ ކަމަށެވެ.

މިމައްސަލަ އަށް ބަހުސްކުރުމަށް ހުޅުވާލުމުގެ ކުރިން މަޖިލީހުގެ ރައީސް، ރައީސް މުހައްމަދު ނަޝީދު ވަނީ މިކުއްލި މައްސަލައަކީ ބިދޭސީންނާއި ގުޅުންހުރި މައްސަލައެއް ކަމަށެވެ. އެހެންކަމުން މެމްބަރުން ވާހަކަ ދައްކަވާއިރު ބިދޭސީންނާއި ގުޅޭގޮތުން ބޭއަދަބީކޮށް ކުޑާމީސްކޮށް ވާހަކަ ނުދެއްކެވުމަށް އެދިވަޑައިގަންނަވާ ކަމަށެވެ.

ކުއްލި މައްސަލައަށް ބަހުސްކުރައްވަމުން ހަލީމް ވިދާޅުވީ މިއީ ވަރަށް ހައްސާސް މައްސަލައެއް ކަމަށެވެ. މިމައްސަލަ ހައްލުކުރުމަށް އެމްޑީޕީން 2008 ވަނަ އަހަރު ވެރިކަމާއި ހަވާލުވުމަށްފަހު މަސައްކަތް ފެށިކަމަށާއި ނަމަވެސް ސަރުކާރު ބަދަލުވެގެންދިޔުމާއި ގުޅިގެން އެކަން މަޑުޖެހިފައި އޮތްކަމަށެވެ. އެއާއެކު ފާއިތުވި 7 އަހަރު މިމައްސަލަ ހައްދުން ނައްޓައިގެން ގޮސްފައިވާކަމަށް ހަލީމް ވިދާޅުވި އެވެ. ވަކިން ޚާއްސަކޮށް ރައީސް އަބްދުﷲ ޔާމީންގެ ސަރުކާރުގައި މިމައްސަލަ ހައްދު ފަހަނައަޅައިގެން ދިޔަކަމަށް ހަލީމް ވިދާޅުވި އެވެ.

މިކަމުގެ ސަބަބުން އެތައް ބަޔަކު ގަވާއިދާ ޚިލާފަށް ރާއްޖެ ގެނެސްފިކަމަށް ހަލީމް ވިދާޅުވި އެވެ. އަދި މީގެ ނަތީޖާއަކަށް ވީ އެމެރިކާގެ ހިޔުމަން ރައިޓްސް ރިޕޯޓްގެ ތިން ވަނަ ކެޓަގަރީގައި ރާއްޖެ ހިމެނުމަށް ދެ ފަހަރެއްގެ މަތިން މަސައްކަތް ކޮށްފައިވުން ކަމަށް ހަލީމް ވިދާޅުވި އެވެ. އެރިޕޯޓްގައި ރާއްޖެ ހިމެނިފައިނެތީ އެމެރިކާ އާއި ރާއްޖެ އާ ދެމެދު އޮތް ގުޅުމުގެ ސަބަބުންނާއި އޮންނަ އިތުބާރުގެ ތެރެއިން ބިދޭސީންގެ މައްސަލަ ހައްލުކުރުމަށް ސަރުކާރުންވެސް މަސައްކަތްތަކެއް ކުރަމުންދާތީ ކަމަށް ހަލީމް ވިދާޅުވި އެވެ.

ހަލީމް ވިދާޅުވީ މިހިސާބަށް މިކަން އައުމުގައި އިމިގްރޭޝަން ހިންގުމަށް އެކި ދުވަސްވަރު ތިބި ވެރިންގެ އިހުމާލު އޮތްކަމަށް ދެކެވަޑައިގަންނަވާ ކަމަށެވެ.

ހަލީމް އިތުރަށް ވިދާޅުވީ މި ހާލަތުގެ ފައިދާ އިދިކޮޅު ފަރާތްތަކުން ނަގައިގެން އެމީހުންގެ ބޮލަށް އެރި ގައުމުގެ ހަމަޖެހުން ނަގާލަން މަސައްކަތް ކުރަމުންދާ ކަމަށެވެ.