ކުށުގެ ރެކޯޑާއި ދަރަނީގެ ރެކޯޑް ސާފުކުރުން، ޑީޖޭއިން އޮންލައިންކޮށް ހިދްމަތް ދޭން ނިންމައިފި
ވަޒީފާއާ ގުޅޭ ކަންކަމުގައި ވަރަށް ގިނައިން ކުށުގެ ރެކޯޑު ސާފުކުރަން ޖެހޭ
ޖުޑީޝަލް އެޑްމިނިސްޓްރޭޓަރ ޑރ. ޢަބްދުﷲ ނަޒީރު (ކ)
ކުށުގެ ރެކޯޑާއި ދަރަނީގެ ރެކޯޑް ސާފުކުރުމުގެ ހިދްމަތް ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން އޮންލައިންކޮށް ދޭން ނިންމައިފި އެވެ.
އާދިއްތަ ދުވަހު ޑީޖޭއޭއިން އާންމުކޮށްފައިވާ އިއުލާނެއްގައި ބުނެފައި ވަނީ، ކޮވިޑް-19 އާގުޅިގެން ސަރުކާރުގެ އޮފީސްތައް ބަންދުކޮށްފައި އޮތުމަށްފަހު، ޖުލައި 5 ވަނަ ދުވަހުން ފެށިގެން، ސަރުކާރުގެ އޮފީސްތައް ހުޅުވާލެވި، ސަރުކާރުގެ އިދާރާތަކަށް ހާޒިރުވެގެން، ހިދްމަތް ހޯދޭގޮތަށް ހަމަޖެހިފައި ވީނަމަވެސް، އާންމުންނާއި ޑީޖޭއޭގެ މުވައްޒަފުންގެ ސަލާމަތާއި ރައްކާތެރި ކަމަށްޓަކައި، އަދި އާންމުންނަށް ފަސޭހައިން ހިދްމަތް ހޯދޭނެ މަގުފަހިކޮށް ދިނުމުގެ ގޮތުން ޑީޖޭއިން ދެމުންގެންދާ ރެކޯޑް ސާފުކުރުމުގެ ހިދްމަތް އޮންލައިންކޮށް ވެސް ދެމުންގެންދާ ގޮތަށް ހަމަޖެހިފައިވާ ކަމަށެވެ.
ކުށުގެ ރެކޯޑް ސާފުކުރުމުގައި ދަށު ކޯޓުތައް ކަމަށްވާ ކްރިމިނަލް ކޯޓާއި ސިވިލް ކޯޓު ފަދަ ސްޕީރިއަރ ކޯޓުތަކާއި އަތޮޅުތަކުގެ ރަށްތަކުގައި ގާއިމުކޮށްފައިވާ މެޖިސްޓްރޭޓް ކޯޓުތަކުން ކުށުގެ ރެކޯޑާއި ދަރަނީގެ ރެކޯޑްތައް ސާފުކުރުމަށް ހުށަހަޅާ ފޯމް ފުރުމުގެ ހިދްމަތް ޑީޖޭއޭއިން ދެއެވެ.
މީގެކުރިން ޑީޖޭއޭއަށް ގޮސް ފޯމް ހުށަހަޅައިގެން ކުށުގެ ރެކޯޑް ސާފު ކުރެވުނު ނަމަވެސް، އޮންލައިންކޮށް ވެސް، މި ހިދްމަތް މިހާރު ލިބެމުންދިއުމަކީ، ރެކޯޑް ސާފުކުރަން ބޭނުންވާ ފަރާތްތަކަށް ލިބުނު ހިތްހަމަ ޖެހުމަކަށް ވާނެ އެވެ.
ވަޒީފާއަށް އެދި ފޯމް ހުށަހެޅުމާއި މަގާމުތަކަށް ބޭފުޅުން އައްޔަން ކުރުމުގައި ނުވަތަ ކުރިމަތި ލުމުގައި، ކުށުގެ ރެކޯޑާއި ދަރަނީގެ ރެކޯޑް ސާފު ކުރަންޖެހޭ މަގާމުތަކާއި ވަޒީފާތައް ހުރެއެވެ. ކުށުގެ ރެކޯޑު ސާފުކުރުމަށް ގިނައިން ހުށަހެޅެމުންދަނީ ވެސް ވަޒީފާއާ ގުޅޭ ކަންކަމުގަ އެވެ.
