ދިއްގަރު ދާއިރާގެ މެމްބަރު ފާރިސް މައުމޫން ހައްޔަރުކުރައްވައިގެން ފުލުހުން ކުރަމުން ދަނީ ޖިނާޢީ ކުށުގެ އަމަލުތަކެއް ކަމަށް ފާރިސްގެ ޤާނޫނީ ވަކީލް މައުމޫން ހަމީދު ވިދާޅުވެއްޖެއެވެ.

ރާއްޖެޓީވީގެ ފަލަސުރުޙީ ޕްރޮގްރާމްގައި މައޫމުން ހަމީދު ވިދާޅުވީ ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު ފާރިސް މައުމޫންގެ މައްޗަށް ކޮށްފައިވާ ދަޢުވާއިން ފެނިގެންދަނީ ޤާނޫނާއި ހިލާފުކަންތައްތައް ކަމަށެވެ. އެންމެ ފުރަތަމަ ފާރިސް ހައްޔަރުކުރެވުނީ ނުނިމޭ ތަހްޤީޤެއްގެ މައްޗަށް ކަމަށާއި، އުފުލާފައިނުވާ ދަޢުވާގެ މައްޗަށް ކަމަށާއި، އަދި ނުފަށާ ޝާރީޢަތެއްގެ ނިނުމާއި ހަމައަށް ފާރިސް ބަންދުކޮށްފައިވާ ކަމަށް މައުމޫން ހަމީދު ވިދާޅުވިއެވެ.

މިއީ ފުލުހުންގެ ޤާނޫނާއި ޖިނާޢީ އިޖުރާތުގެ ޤާނޫނާއި ޕީޖީގެ ޤާނޫނާއި އަދި އެންޓިޓޯޗަރ ޤާނޫނާ ޙިލާފް ކަމެއް ކަމަށް ވެސް އޭނާ ވިދާޅުވި އެވެ.  

"އެހެންނަމަވެސް ޕްރޮސެކިއުޓަރ ޖެނަރަލްއަށް ފެނިވަޑައިގަތީ ފާރިސްކަމަށް ޤައުމަށް ނުރައްކާތެރި ބޭފުޅަކީ، ޤާނޫނީ ވަރަށް ބައިވަރު ހަމަތައް ޕީޖީ މި ދުއްވާލެއްވީ. އެއީ އެއްވެސް އެއްޗަކަށް ނުހައްދަވާ. ޤާނޫނާ ހިލާފު އެތައް ހަމަތަކެއް ދުއްވާލައިފައި ފާރިސްއާ ދިމާލަށް މި ވަޑައިގަންނަވަނީ ޕީޖީ،" މައުމޫން ހަމީދު ވިދާޅުވިއެވެ.

ޕީޖީން ވެސް ގާނޫނާ ހިލާފު އަމަލުތައް ހިންގަމުންދާއިރު ފާރިސް ހައްޔަރުކުރުމުގެ އަމުރެއް ޕީޖީ އޮފީހުން ނުހޯއްދެވި ނަަމަ، ގާނޫނާ ހިލާފު ކަމެއް ކުރުމަށް ފުލުހުންނަށް ހިތްވަރެއް ނުލިބޭނެ ކަމަށް މައުމޫނު ހަމީދު ވިދާޅުވި އެވެ.  

ފުލުހުން ތައްޔާރުކޮށްފައިވާ ރިޕޯޓުގައި ބަޔާންކޮށްފައިވާ ހެކިތަކަށް ބަލާއިރު ފާރިސްގެ ފޯނުކަމަށް ފުލުހުން ބުނާ ފޯނަކީ ފާރިސްގެ ފޯނު ނޫންކަމަށް ފާހަގަކުރައްވަމުން މައުމޫން ހަމީދު ވިދާޅުވީ ފޯނުގެ ވެރި ފަރާތުގެ ނަން ރިޕޯޓްގައި ހާމަކޮށްފައި ނުވާކަމަށެވެ. ސްކްރީންޝޮޓްތަކެއް ފޯނުން ފެނިފައިވާ ކަމަށް ފުލުހުން ބަޔާންކުރާއިރު އެ މުއްދަތުގައި ފޯނު އޮތީ ފުލުހުންގެ ބެލުމުގެ ދަށުގައި ކަމަށް އޭނާ ވިދާޅުވި އެވެ.

މުއައްސަސާތަކުން ގާނޫނާ ހިލާފު އަމަލުތައް ހިންގާއިރު، އެކަންކަމަށް އެ މުވައްޒަފުން ޒިންމާވާން ޖެހޭނެ ކަމަށާއި، ފުލުހުން މިހާރު ހިންގާ ގާނޫނާ ހިލާފު އަމަލުތަކަށް ފުލުހުން ޒިންމާ ވާނެ ޖެހޭނެ ކަމަށް މައުމޫން ވިދާޅުވި އެވެ.

އެކި އެކި މުއައްސަސާތަކަށް ފާރިސްގެ މައްސަލައިގައި ޖުމްލަ 45 ސިޓީ ހުށަހަޅުއްވާފައިވާ ކަމަށް މައުމޫން ހަމީދު ވިދާޅުވިއެވެ. އެހެން ނަމަވެސް އެކަށީގެންވާ ޖަވާބެއް އަދިވެސް ލިބިފައި ނުވާކަމަށް މައުމޫން ހަމީދު ވިދާޅުވިއެވެ.