ހޮސްޕިޓަލުގައި ފަރުވާދޭން ޖެހޭ ކޮވިޑުގެ ބަލި މީހުން އިތުރުވަނީ
11 ޖުލައި 2020 | ހޮނިހިރު 17:55މާސްކު ނައަޅާ މީހުންގެ އަދަދު އިތުރުވަނީ
ޑރ. އަލީ ލަތީފް
ކޮވިޑް-19 ޖެހޭ މީހުންގެ ތެރެއިން ހޮސްޕިޓަލުގައި ފަރުވާދެން ޖެހޭ މީހުންގެ އަދަދު އިތުރުވާތީވެ ހެލްތް އިމަރޖެންސީ އޮޕަރޭޝަން ސެންޓަރުގެ ޑޮކްޓަރުން ކަންބޮޑުވުން ފާޅުކޮށްފިއެވެ.
ހޮނިހިރު ދުވަހު ހެލްތް އިމަރޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި ޑރ. އަލީ ލަތީފް ވިދާޅުވީ، ލޮކްޑައުންއަށް ދިން ލުއިތަކާއި އެކު މަގުމަތިން ފެންނަނީ އެންމެ އެކަށީގެންވާ މަންޒަރުތަކެއް ނޫން ކަމަށެވެ. އެންމެ ފުރަތަމަ ދިން ލުޔާއެކު މާސްކު އަޅާ މީހުންގެ އަދަދު އިތުރުވިޔަސް މިހާރު މާސްކުނާޅާ ބޭރުގައި އުޅޭ މީހުން އަދަދު އިތުރުވާން ފަށައިފި ކަމަށް ޑރ. ވިދާޅުވިއެވެ.
ގައިދުރުކަން އެއްވެސް ވަރަކަށް ބެލުމެއްނެތި އެކި ތަންތަނުގައި މީހުން ޖަމާވަމުންދާތީވެ އެކަމަށް އިޝާރާތް ކުރައްވާ ޑރ. ލަތީފް ވިދާޅުވީ، ބަލި އިތުރަށް ފެތުރިގެން ދިޔުމުގެ ބިރު އެބައޮތް ކަމަށެވެ.
މިދިޔަ މަހު ބަލި ޖެހިގެން ހޮސްޕިޓަލުގައި ފަރުވާދޭން ޖެހުނު މީހުންގެ އަދަދާއި މިހާރު ފަރުވާދޭން ޖެހޭ މީހުންގެ އަދަދު އިތުރަވަމުން އަންނާތީވެ އެޗްއީއޯސީން ވަނީ ކަންބޮޑުވުން ފާޅުކޮށްފައެވެ.
ޑރ. އަލީ ލަތީފް ވިދާޅުވީ، ދިވެހިންގެ ތެރެއިން ބަލި ޖެހޭ ގިނަ މީހުންނަކީ އެހެން ބަލިތައްވެސް ޖެހިފައިވާ މީހުންނަށްވާތިވެ އެމީހުންނަށް ބަލީގެ ނުރައްކާ ބޮޑުކަމަށެވެ.
އޭގެއިތުރުން ރޯގާ ޖެހިގެން ފްލޫ ކްލިނިކަަށް ދައްކާ މީހުންގެ އަދަދުވެސް ވަނީ މިހާރު އިތުރާވާން ފަށާފައެވެ. ފާއިތުވި ދެ ދުވަހު އެކަނިވެސް ޕޮޒިޓިވްވާ ކޭސްތަކުގެ އަދަދު ވަނީ އިތުރުވެފައެވެ. މީގެ ތެރެއިންވެސް ގިނަ މީހުންނަކީ ދިވެހިންނެވެ. ޕޮޒިޓިވްވާ ބިދޭސީންގެ އަދަދު ދަނީ މަދުވެފައެވެ.
