ކުއާޓާގައި ރޮނާލްޑޯ ރެއާލާ ދެކޮޅަށް ކުޅުމުގެ ފުރުސަތު

ޔުއެފާ ޗެމްޕިއަންސް ލީގުގެ ކުއާޓާ ފައިނަލުގައި ކްރިސްޓިއާނޯ ރޮނާލްޑޯގެ ޔުވެންޓަސް އޭނާގެ ކުރީގެ ޓީމު ރެއާލް މެޑްރިޑާ ދެކޮޅަށް ކުޅެން ޖެހުމުގެ ފުރުސަތު ތަނަވަސްވެއްޖެއެވެ.

ކޮރޯނާވައިރަސް (ކޮވިޑް-19) އާ ގުޅިގެން ޗެމްޕިއަންސް ލީގު ދެވަނަ ބުރުގެ މެޗުތަކުގެ ތެރެއިން މެދުކަނޑާލިއިރު، ފޯމެޓަށް ގެނެސް އޮގަސްޓް މަހު ޗެމްޕިއަންސް ލީގު އަލުން ފެށުމަށް މިހާރު ވަނީ ނިންމާފައެވެ.

ހުކުރު ދުވަހު ޗެމްޕިއަންސް ލީގުގެ ކުއާޓާ ފައިނަލުގެ ގުރުއަތުލުން ބޭއްވިއިރު، އަދި ދެވަނަ ބުރުގައި ރެއާލް މެޑްރިޑާއި މެންޗެސްޓާ ސިޓީ، ޗެލްސީ އާއި ބަޔާން މިއުނިކް، ލިޔޯން އާއި ޔުވެންޓަސް އަދި ނާޕޮލީ އާއި ބާސެލޯނާގެ ދެވަނަ ލެގުގެ މެޗުތައް ކުޅެން އެބައޮތެވެ.

ކުއާޓާގެ ގުރުއަތުލުމުގައިވާ ގޮތުން މެންޗެސްޓާ ސިޓީ އާއި ރެއާލް ކުޅޭ މެޗުން މޮޅުވާ ޓީމެއް ކުއާޓާގައި ނުކުންނަން ޖެހޭނީ ލިޔޯނާއި ޔުވެންޓަސް ކުޅެގެން މޮޅުވާ ޓީމަކާއެވެ. ދެވަނަ ބުރުގެ ފުރަތަމަ ލެގުގައި ޔުވެންޓަސް އަދި ރެއާލް ވެސް ވަނީ ބަލިވެފައެވެ. ލިޔޯން ދަނޑުގައި ޔުވެންޓަސް ބަލިވީ 1-0 ންނެވެ. އަދި ރެއާލް އަމިއްލަ ދަނޑުގައި ސިޓީ އަތުން ބަލިވީ 2-1 ންނެވެ.

މީގެ އިތުރުން މުބާރާތުގެ އެންމެ ފަހުގެ ޗެމްޕިއަން ލިވަޕޫލް ކަޓުވާލި އެތުލެޓިކޯ މެޑްރިޑް ކުއާޓާގައި ނުކުންނާނީ އާރުބީ ލެއިޕްޒީގާ ދެކޮޅަށެވެ. ކުއާޓާގައި ނާޕޮލީ އާއި ބާސާގެ ތެރެއިން މޮޅުވާ ޓީމެއް ނުކުންނާނީ ބަޔާން މިއުނިކާއި ޗެލްސީގެ ތެރެއިން މޮޅުވާ ޓީމަކާ ދެކޮޅަށެވެ. އަދި އެޓަލަންޓާ ކުއާޓާގައި ނުކުންނާނީ ޕީއެސްޖީއާ ދެކޮޅަށެވެ.

މިފަހަރުގެ ޗެމްޕިއަންސް ލީގުގެ ފޯމެޓަށް ގެނައި ބަދަލާއެކު، ދެވަނަ ބުރުގެ މެޗުތަކަށްފަހު، ކުއާޓާ ފައިނަލުން ފަށައިގެން މެޗުތައް ކުޅޭނީ ވޯލްޑް ކަޕް ކުޅޭ އުސޫލަށެވެ. އެގޮތުން ދެ ލެގުގެ ބަދަލުގައި އެއް ލެގު ކުޅޭއިރު، ހުރިހާ މެޗެއްވެސް ކުރިއަށް ގެންދާނީ ޕޯޗުގަލްގެ ލިޒްބަން ގައެވެ.

އޮގަސްޓް މަހުގެ ހަތްވަނަ ދުވަހާއި އަށްވަނަ ދުވަހު ދެވަނަ ބުރުގެ މެޗުތައް ކުރިންވެސް ކުޅެން ތާވަލުކޮށްފައި ހުރި ދަނޑުތަކުގައި ކުޅޭއިރު، ކުއާޓާގެ މެޗުތައް ލިޒްބަންގައި ފަށާނީ އޮގަސްޓް މަހުގެ 12 ވަނަ ދުވަހެވެ. އަދި ފައިނަލް މެޗު ކުޅޭނީ އޮގަސްޓް މަހުގެ 23 ވަނަ ދުވަހެވެ.