ކުރީގެ ރައީސް އަބްދުﷲ ޔާމީންގެ ވެރިކަމުގައި ފެށި ހިޔާ މަޝްރޫއުގެ 7000 ފްލެޓާ ގުޅޭ މައުލޫމާތު ހޯދުމަށް، ކުރީ ސަރުކާރުގެ ހައުސިންގ މިނިސްޓަރ ޑރ. މުހައްމަދު މުއިއްޒު ހާޒިރު ކުރުމަށް ރައްޔިތުންގެ މަޖިލީހުގެ ގައުމީ ތަރައްގީއާއި ތަރިކައިގެ ކޮމެޓީން އަންގައިފިއެވެ.

ރައީސް ޔާމީންގެ ސަރުކާރުގައި ހައުސިންގ މިނިސްޓަރަކަށް ހުންނެވި، އަދި މި މަޝްރޫއުގައި ސަރުކާރުގެ ފަރާތުން އެންމެ އިސްކޮށް އުޅުއްވީ ޑރ. މުއިއްޒުއެވެ.

މިކަމާއި ގުޅޭގޮތުން ރާއްޖެއެމްވީއަށް ޑރ. މުއިއްޒު ވިދާޅުވީ ހިޔާ މަޝްރޫއުއާ ގުޅޭ މައުލޫމާތު ހޯއްދެވުމަށް، މަޖިލީހުގެ ގައުމީ ތަރައްގީއާއި ތަރިކައިގެ ކޮމެޓީއަށް، މި މަހުގެ 16 ވަނަ ދުވަހު 11 ޖަހާއިރަށް ހާޒިރުވުމަށް ހާޒިރުވުމަށް ސިޓީއެއް ފޮނުވާފައިވާ ކަމަށެވެ. މުއިއްޒު ވިދާޅުވީ، ކޮމެޓީގެ ބައްދަލުވުމަށް ވަޑައިގެން، ދޭންޖެހޭ އެއްބާރުލުން ދެއްވުމަށް ތައްޔާރަށް ހުންނެވި ކަމަށެވެ.

ހިޔާ މަޝްރޫއުގެ ދަށުން 25 ބުރީގެ 16 ޓަވަރު އިމާރާތްކުރުމަށް ޗައިނާ ސްޓޭޓް ކޮންސްޓަރަކްޝަން އިންޖީނިއަރިންގ ކޯޕަރޭޝަން ލިމިޓެޑާ ހަވާލުކުރުމުގެ އެއްބަސްވުމުގައި ސޮއިކުރީ، 20 ޖުލައި 2016 ގައެވެ. ދެ އަހަރު ދުވަހުގެ ތެރޭގައި ނިންމުމަށް، އެއްބަސްވުމުގައި ވެއެވެ. އިމާރާތް ކުރުމުގެ މަސައްކަތް ފަށާފައިވަނީ، 19 ޑިސެމްބަރު 2017 ގައެވެ.

މިއީ ދިވެހި ސަރުކާރުން، 434 މިލިއަން ޑޮލަރުގެ ލޯނެއް ނަގައިގެން ހިންގާ ޕްރޮޖެކްޓެކެވެ. 25 ބުރީގެ 16 ޓަވަރުގައި ހުރި 7000 އެޕާޓްމަންޓުގެ ތެރެއިން މި ސަރުކާރުން ދިނުމަށް ނިންމާފައިވަނީ އޭގެ ތެރެއިން 6720 އެޕާޓްމަންޓެވެ.

ސަރުކާރުން ނަގާފައިވާ ގްރައުންޑް ފްލޯގެ އެޕާޓްމަންޓްތައް ހުރި ޖާގަތައް ބޭނުން ކުރާނީ ފިހާރަތަކަށާއި ބުކްޝޮޕްތަކަށާއި ސެކިއުރިޓީއާއި ކުނި މެނޭޖް ކުރުމާއި އިމާރާތުގެ މެއިންޓެނެންސް އަދި އިދާރީ ކަންކަމުގެ އިތުރުން، ގުރްޢާން ކްލާސްތައްފަދަ ތަންތަން ހިންގުމަށެވެ.

މިފްލެޓްތަކުގައި ހުރީ މުޅީންވެސް 2 ކޮޓަރީގެ އެޕާޓްމަންޓް ތަކެކެވެ. ފްލެޓްގެ ހުރިހާ ފާރުތަކެއް ހިމެނޭގޮތަށް، ފްލެޓެއްގެ އެވްރެޖް ބޮޑުމިނަކީ 570 އަކަފޫޓެވެ. މިއީ އެވަރެޖް ދިވެހި އާއިލާއެއް އުޅެން އެކަށީގެންވާ ސައިޒެއް ނޫންކަމަށް ބައެއް ފަރާތްތަކުން ބުނަމުން އަންނައިރު، އެޕާޓްމަންޓަށް ވަންނަން ކުރަން ޖެހޭ ހަރަދުތައް ބޮޑުވުމާއި ގުޅިގެން ވެސް ގިނަ ބައެއްގެ ޝަކުވާތައް އެބަހުއްޓެވެ.

ފްލެޓް އިމާރާތް ކުރުމުގެ އެއްބަސްވުމުގެ ދަށުން، ޓައިލްސް ޖެހުމާއި، ދެ ކޮޓަރިއާއި ދެ ފާހާނާގެ ދޮރު ހަރުކުރުމާއި، ފަންކާއާއި ބޮކި، އަދި ޓީވީ ކޭބަލް ފަދަ ވައިއިރިންގގެ މަސައްކަތެއް ނުހިމެނެއެވެ. އެހެންކަމުން އެހުރިހާކަމެއް ކުރަންޖެހޭނީ ފްލެޓް ލިބޭ ފަރާތުންނެވެ.

މީގެކުރިން ވެސް މަޖިލީހުގެ މާލިއްޔަތު ކޮމެޓީން ބެލި "ނޫމަޑި" (ހައުސިންގ ޔުނިޓްތަކެއް އިމާރާތްކުރުމަށް ހަވާލުކުރި ކުންފުންޏެއް) މައްސަލާގައި މުއިއްޒު އެ ކޮމެޓީއަށް ހާޒިރު ކޮށްފައިވެއެވެ. އެ މައްސަލައިގެ ގެއްލުމުގެ ބަދަލުގައި ނޫމަޑި ކުންފުންޏަށް ދައުލަތުން 55 މިލިއަން ޑޮލަރު (849،750،000ރ) ދައްކަން ޖެހުނެވެ.

މި މައްސަލާގައި މުއިއްޒުގެ މައްޗަށް ތުހުމަތު ކުރެވެނީ، ރައީސް ޔާމީނުގެ ސަރުކާރުން ބާޠިލުކުރި ދެ އެއްބަސްވުމެއްގެ މައްސަލަ ނޫމަޑިން ވަނީ ނެދަލޭންޑްސްގެ ދަ ހޭގްގައި ހުންނަ ޕާރމަނަންޓް ކޯޓް އޮފް އާބިޓްރޭޝަނަށް ހުށައެޅި މައްސަލައިގައި، އެ ކުންފުންޏަށް ކާމިޔާބު ވާނެހެން ދައުލަތާ ދެކޮޅަށް ބަޔާނެއް ދިން ކަމަށެވެ. މި މައްސަލަ ފުލުހުން ވެސް އަންނަނީ ތަހުގީގު ކުރަމުންނެވެ. އަދި މި ފަހުން ފުލުސް އޮފީހަށް ވެސް ވަނީ ހާޒިރުކޮށްފައެވެ.