ކޮވިޑް-19ށް ފަރުވާ ހޯދަމުންދާ ތިން މީހަކަށް އައިސީޔޫގައި ފަރުވާ ދެމުންދޭ: ޑރ. މުރާދު
10 ޖުލައި 2020 | ހުކުރު 08:17ޑީއެޗް-11 ގައި އެކަކަށް ދަނީ ފަރުވާ ދެމުން
ބުރާސްފަތި ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގެ ތެރެއިން
ކޮވިޑް-19ށް ފަރުވާ ހޯދަމުންދާ ތިން މީހަކަށް އައިސީޔޫގައި ފަރުވާ ދެމުންދާ ކަމަށް ހެލްތު އިމަރޖެންސީ އޮޕަރޭޝަން ސެންޓަރ (އެޗްއީއޯސީ) އިން ބުނެފިއެވެ.
ބުރާސްފަތި ދުވަހުގެރޭ އެޗްއީއޯސީގައި ބޭއްވި ނޫސްވެރިންގެ ބައްދަލުވުމުގައި އިންދިރާ ގާނދީ މެމޯރިއަލް ހޮސްޕިޓަލް (އައިޖީއެމްއެޗް)ގެ އެތެރެހަށީގެ ޚާއްސަ ޑރ. މޫސާ މުރާދު ވިދާޅުވީ ބަލި މީހުން ބައިތިއްބައިގެން ފަރުވާ ދިނުމަށް މައިގަނޑު ގޮތެއްގައި މިހާރު ބޭނުން ކުރަމުންދަނީ ދެ މަރުކަޒެއް ކަމަށެވެ.
އެއް މަރުކަޒަކީ ހުޅުމާލޭގައި ހުންނަ ހުޅުމާލެ މެޑިކަލް ފެސިލިޓީ ކަމަށާއި، ދެވަނަ ތަނަކީ ޑީއެޗް11 ކަމަށް ޑރ. މުރާދު ވިދާޅުވިއެވެ. އަދި ވިދާޅުވީ މިދެތަނުގައި ވެސް އައިސީޔޫގެ ޚިދުމަތްދޭން ޖެހޭ ބަލި މީހުންނަށް އައިސީޔޫގައި ފަރުވާ ދެމުންދާ ކަމަށެވެ.
އެގޮތުން ދަރުމަވަންތަ ހޮސްޕިޓަލްގެ 11 ވަނަ ފަންގިފިލާގައި އެއް ބަލި މީހަކަށް ފަރުވާ ދެމުންދާއިރު، ހުޅުމާލެ ފެސިލިޓީގެ އައިސީޔޫގައި ދެ ބަލި މީހަކަށް ފަރުވާ ދެމުންދާ ކަމަށް ޑރ. މުރާދު ވިދާޅުވިއެވެ.
ޑރ. މުރާދު ވިދާޅުވީ ކޮވިޑް-19ށް ފަރުވާ ހޯދަމުންދާ މީހުންގެ ތެރެއިން ޖެނަރަލް ވޯޑުގައި ތިބި ބަލި މީހުންގެ ހާލަތު ވެސް ރަނގަޅު ވަމުން އަންނަ ކަމަށާއި، އެހެން މައްސަލަތަކެއް ދިމާނުވާ ކަމަށެވެ.
އެގޮތުން ހުޅުމާލެ ފެސިލިޓީގެ ވޯޑުގައި 14 މީހަކު އެޑްމިޓް ކުރެވިގެން ފަރުވާ ދެމުންދާކަން ޑރ. މުރާދު ފާހަގަކުރެއްވިއެވެ.
