ފުރަބަންދަށް ދިން ލުއިތަކުގެ ނަތީޖާތަކާއި ގުޅޭގޮތުން ރައީސް މަޝްވަރާކުރައްވައިފި

ފުރަބަންދުގެ ހާލަތަށް ދިން ލުއިތަކާއި ގުޅިގެން ނުކުތް ނަތީޖާތަކާއި ގުޅޭގޮތުން، ކަމާގުޅޭ އިދާރާތަކުގެ އިސް ވެރިންނާއި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މަޝްވަަރާ ކުރައްވައިފިއެވެ.

ބުރާސްފަތި ދުވަހު ހަވީރު ރައީސް އޮފީހުގައި ބޭއްވި ބައްދަލުވުމުގައި މަޝްވަރާ ކުރެވުނީ މިހާރު ދީފައިވާ ލުއިތަކުގެ ނަތީޖާތަކުގެ މައްޗަށް ބިނާކޮށް، ކުރިއަށް އޮތް ދުވަސްތަކުގައި އަމަލު ކުރާނެ ގޮތަކާއި ގުޅޭގޮތުންނެވެ. އަދި މިއީ ނެޝަނަލް އެމަރޖެންސީ އޮޕަރޭޝަންސް ސެންޓަރު އުވާލުމަށްފަހު ކޯވިޑް-19 ގެ ޙާލަތު ބަދަލުވަމުންދާ ގޮތް ގާތުން ބެއްލެވުމަށް ސިލްސިލާ ގޮތަކަށް ބޭއްވުމަށް ނިންމާފައިވާ ބައްދަލުވުންތަކެއް ކަމަށް ރައީސް އޮފީހުން ވަނީ މައުލޫމާތު ދީފައެވެ.

މި ބައްދަލުވުމުގައި އާންމު ދިރިއުޅުން ބަހައްޓަންވީ ގޮތްތަކާއި، މީހުން ހޭލުންތެރިވެ ސަމާލުކަން ދޭންވީ ކަންކަމާއި ގުޅޭގޮތުން ކަމާބެހޭ ފަރާތްތަކުން މަޝްވަރާ ކުރެވުނެވެ. އަދި ސިއްހީ ދާއިރާގެ ތައްޔާރީތަކާއި، ދިމާވާ ގޮންޖެހުންތަކާއި، މި ކަންކަމުގައި އިތުރަށް ކުރިއަތްދާނެ ގޮތްތަކާއި ބެހޭގޮތުން ރައީސް މަޝްވަރާ ކުރެއްވި ކަމަށް ވެސް ރައީސް އޮފީހުން މައުލޫމާތު ދީފައިވެއެވެ.

މި ބައްދަލުވުމުގައި ނައިބު ރައީސް ފައިސަލް ނަސީމާއި، ކެބިނެޓްގެ ބައެއް ވަޒީރުންނާއި، ރައީސް އޮފީހުގެ ބައެއް އިސްވެރިންނާއި، ސިއްހީ މާހިރުން އަދި ހެލްތް އެމަރޖެންސީ އޮޕަރޭޝަންސް ސެންޓަރުގެ އިސްވެރިންނާއި، ސަލާމަތީބާރުތަކުގެ އިސްވެރިން ބައިވެރިވެ ވަޑައިގެންނެވިއެވެ.

ފުރަބަންދުގެ ހާލަތަށް ލުއިދިނުމުގެ އެންމެ ފުރަތަމަ މަރުހަލާ ފަށާފައިވަނީ މާރޗު މަހުގެ 28 ގައެވެ. އޭގެ ފަހުން ދެ ފަހަރަކަށް އިތުރު ލުއިތަކެއް ދީފައިވާއިރު، މިހާތަނަށް ނޫސްވެރިންގެ ބައްދަލުވުންތަކުގައި ޑޮކްޓަރުން ބުނެފައިވަނީ އަދި ހަރުކަށި ފުރަބަންދުގެ ހާލަތަށް ދާން ޖެހޭ އަދަދަކަށް ކޭސްތައް ފެންނަމުން ނުދާ ކަމަށެވެ.