ރާއްޖޭގައި ބިދޭސީ މަސައްކަތްތެރިންގެ ގޮތުގައި 200،000 އާ ގާތްކުރާ އަދަދަކަށް މީހުން އެބަތިބި ކަމަށާއި، މީގެ ތެރެއިން 60،000ށް ވުރެ ގިނަ މީހުންނަކީ ގަވާއިދާ ހިލާފަށް ރާއްޖޭގައި މަސައްކަތްކުރަމުން އަންނަ މީހުން ކަމަށް އިމިގްރޭޝަނުން ހާމަކޮށްފިއެވެ.

ރާއްޖެ ޓީވީގެ ފަލަ ސުރުހީގައި ވާހަކަ ދައްކަވަމުން އިމިގްރޭޝަންގެ ޑެޕިއުޓީ ޗީފް އިމިގްރޭޝަން އޮފިސަރ މުހައްމަދު ޝިފާން ވިދާޅުވީ އިމިގްރޭޝަންގެ ހިސާބުތައް ދައްކާގޮތުން މި އަހަރުގެ މެއި މަހާ ހިސާބަށް 136،580 (އެއްލައްކަ ތިރީސް ހަ ހާސް ފައްސަތޭކަ އައްޑިހަ) ބިދޭސީން ވޯކް ވިސާގައި ރާއްޖޭގައި އެބަތިބި ކަމަށެވެ. އަދި ގަވާއިދާ ހިލާފަށް އުޅޭނަކަމަށް އަންދާޒާ ކުރެވެނީ 60،000 އެއްހާ ބިދޭސީން ކަމަށް އޭނާ ވިދާޅުވިއެވެ.

މީގެ އިތުރުން އިމިގެރޭޝަންގެ ހިސާބުތަކުން ދައްކާ 136،580 ބިދޭސީންގެ ތެރެއިން ވެސް ވިސާ ފީ ބައެއް ފަރާތްތަކުން ނުއްދައްކާ ހުރެދާނެ ކަމަށް އޭނާ ފާހަގަ ކުރެއްވިއެވެ. އަދި ގެންނަ ފަރާތް ނޫން އެހެން ފަރާތެއް ކައިރީގައި މަސައްކަތުގައި ވެސް އުޅެދާނެ ކަމަށާއި، ވިސާ ފީގެ ގޮތުގައި ލިބެން ޖެހޭ ވަރަށް ގިނަ އަދަދެއްގެ ފައިސާ އެބަހުރި ކަމަށް އޭނާ ފާހަގަ ކުރެއްވިއެވެ.

ޝިފާން ވިދާޅުވީ އެ ފައިސާ ހޯދުމުގެ މަސައްކަތް އިމިގްރޭޝަނުން ކުރަމުންދާ ކަމަށާއި، މި ފައިސާ ހޯދުމަށް އޮތް އެންމެ ބޮޑު ގޮންޖެހުމަކީ ބޭނުންކުރަން ހަދާފައި ހުރި ސިސްޓަމްތަކަކީ އެންމެ ފަސޭހައިން ބޭނުން ކުރުވޭނެ ނިޒާމެއް ނޫން ކަމަށްވުން ކަމަށް އޭނާ ވިދާޅުވިއެވެ. އެހެންކަމުން ވަކި ކުންފުންޏަކުން ދައްކަން ޖެހެނީ ކިހާވަރެއް ކަން ސީދަ އެއްފަހަރުން ބަލާލެވެން ނޯންނަ ކަމަށާއި، އެކަމަށް ގިނަ މަސައްކަތްތަކެއް ކުރައްވަން ޖެހޭ ކަމަށެވެ.