އެމްޑީޕީގެ ދާއިރާތަކަށް ފައިސާ ދޭ އުސޫލު އިސްލާހު ކުރަނީ
ޤަރާރަށް އަންވަރު ހުށަހެޅުއްވި އިސްލާހު ވަނީ ފާސްވެފައި
އައްޑޫ ސިޓީގެ ރައީސް އަހުމަދު އަދުހަމް ޤަރާރު ހުށަހަޅުއްވަނީ
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ދާއިރާތަކަށް ފައިސާދޭ އުސޫލު އިސްލާހު ކުރަން ހުށަހަޅައިފިއެވެ.
އަންގާދަ ދުވަހުގެ ރޭ ބޭއްވި އެޕާޓީގެ ގައުމީ މަޖިލީހުގެ 169 ވަނަ ބައްދަލުވުމުގައި އައްޑޫ ސިޓީގެ ރައީސް އަހުމަދު އަދުހަމް ހުށަހަޅުއްވާފައިވާ ޤާރާރަށް ވަނީ ބަހުސްކުރައްވާފައެވެ.
މި ޤަރާރުގައި ވަނީ ދައުލަތުން ޕާޓީއަށް ލިބޭ ފައިސާގެ 80 އިންސައްތަ އިދާރީ ދާއިރާތައް ހިންގުމަށްޓަކައި ދާއިރާތަކަށް މެންބަރުންގެ ނިސްބަތުން ކަނޑައަޅާ ފައިސާ އެ އިދާރީ ދާއިރާތަކަށް އެކައުންޓްތަކަށް ޖަމާކުރުމަށެވެ.
މި ޤާރާރު ފާސްވެއްޖެނަމަ އިދާރީ ދައިރާތަކުގެ ބޭންކް އެކައުންޓްތައް ހުޅުވި ކޮންމެ އެކައުންޓެއް އެދާއިރާއަކުން ކަނޑައަޅާ ފައިސާއެއް ޖަމާކުރުމަކީ އެމްޑީޕީގެ ޗެއަރޕާރސަންގެ ނައިބް މާލީގެ ޒިންމާ ކަމުގައި ކަނޑައެޅުމަށް ކަމަށް ޤަރާރުގައި ވެއެވެ.
މިޤާރަށް ތިމަރަފުށީ ދާއިރާގެ ރައީސް އަންވަރު އިބްރާހިމް ހުށަހެޅުއްވި އިސްލާހު ވަނީ ބައިވެރިވި ހުރިހާ މެންބަރުންގެ އަޤްލަބިއްޔަތުން ފާސްކޮށްފައެވެ.
އަންވަރު ހުށަހެޅުއްވި އިސްލާހުގައި ވަނީ ޕާޓީގެ ޗަންދާ އާއި މާލިއްޔަތު ކޮމިޓީން ދިރާސާ ކުރުމަށްފަހު ޤައުމީ މަޖިލީހަށް 21 ދުވަހުގެ ތެރެގައި ހުށަހެޅުމަށާއި ދިރާސާ ކުރާ ކޮމިޓީގައި ފަސް މެންބަރަކު ހިމެނުމަށެވެ. އެ މެންބަރުންނަކީ މަކުނުދޫ ދާއިރާގެ ރައީސް އަހުމަދު މައުސޫމާއި ނޮޅިވަރަމު ދާއިރާގެ ރައީސް އިބްރާހިމް ވަހީދު އައްޑޫ ސިޓީގެ ރައީސް އަހުމަދު އަދުހަމް އެމްޑީޕީގެ ޗެއަރޕާސަން ގެ ނައިބަ އިދާރީ އަލީ ނިޔާޒް އާއި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް އެވެ.
