ރައީސް ސޯލިޙު ސިފައިންނާއި ފުލުހުންނާ ބައްދަލު ކުރައްވަނީ
އާދިއްތަ ދުވަހުގެ ރޭ 09:00 ގައި ރައީސް ސޯލިޙު ސިފައިންނާވެސް ބައްދަލު ކުރައްވާނެ
ރައީސުލްޖުމްހޫރިއްޔާ އިބްރާޙިމް މުޙައްމަދު ސޯލިޙު- ރައީސް ސޯލިޙު ސިފައިންނާ ފުލުހުންނާ ބައްދަލު ކުރެއްވުމަށް ހަމަޖެހިފައިވަނީ އާދިއްތަ ދުވަހު
ރައީސުލްޖުމްހޫރިއްޔާ އިބްރާޙިމް މުޙައްމަދު ސޯލިޙު ދިވެހި ސިފައިންނާއި ފުލުހުންނާ ބައްދަލު ކުރެއްވުމަށް ހަމަޖެހިއްޖެއެވެ.
ފުލުހުން ބުނީ، އާދިއްތަ ދުވަހުގެ ހަވީރު 16:15 ގައި ރައީސް ސޯލިޙު މޯލްޑިވްސް ޕޮލިސް ސަރވިސްގެ މުވައްޒަފުންނާ ބައްދަލު ކުރެއްވުމަށް ނިންމާފައިވާ ކަމަށެވެ. އެގޮތުން މި ބައްދަލު ކުރެއްވުން އޮންނާނީ އިސްކަންދަރު ބިލްޑިންގ ގެ މަލްޓި ޕާރޕޯސް ހޯލުގައި ކަމަށް ފުލުހުން ބުނެއެވެ.
އޭގެ އިތުރުން، އާދިއްތަ ދުވަހުގެރޭ 09:00 ގައި ރައީސް ސޯލިޙު ސިފައިންނާ ވެސް ބައްދަލު ކުރެއްވުމަށް ވަނީ ނިންމާފައެވެ. މި ބައްދަލު ކުރެއްވުން އޮންނާނީ ކަޅުތުއްކަލާ ކޮށީގައެވެ.
ރައީސް ސޯލިޙު ފުލުހުންނާ ސިފައިންނާ ބައްދަލު ކުރެއްވުމަށް ނިންމަވާފައިވާއިރު، މި ދަނޑިވަޅަކީ ފުލުހުންގެ ޚިދުމަތުގެ ބިލުގެ މަސައްކަތްވެސް ކުރިއަށްދާ ދަނޑިވަޅެކެވެ. އޭގެ އިތުރުން، ކޮވިޑް-19ގެ މި ޙާލަތާއި ގުޅިގެން ޤައުމީ ސަލާމަތީ ބާރުތަކުން ގިނަ މަސައްކަތްތަކެއްވެސް ފާއިތުވި ދުވަސްތަކުގައި ވަނީ ކޮށްފައެވެ.
