އެޗްއީއޯސީގެ ތަރުޖަމާނަކަށް ޑރ. ނަޒްލާ ހަމަޖައްސައިފި
ޖުލައި 1 ގައި ސަރުކާރުން ވަނީ އެންއީއޯސީ އުވާލައްވާ އެތަނުގެ ދަށުން ކުރަމުންގެންދިޔަ މަސައްކަތްތައް އެޗްއީއޯސީގެ ދަށަށް ބަދަލުކުރައްވާފަ
ޑރ ނަޒްލާ އެންއީއޯސީގެ ނޫސްވެރިންގެ ބައްދަލުވުމެއްގައި މައުލޫމާތު ދެއްވަނީ
ހެލްތު އިމަރޖެންސީ އޮޕަރޭޝަން ސެންޓަރ (އެޗްއީއޯސީ) ގެ ތަރުޖަމާނަކަށް ޑރ. ނަޒްލާ ރަފީގް ހަމަޖައްސަވައިފިއެވެ.
ކޮވިޑް-19އާ ގުޅިގެން ސަރުކާރުން ވަނީ ނޭޝަނަލް އެމަޖެންސީ އޮޕަރޭޝަން ސެންޓަރ (އެންއީއޯސީ) ގެ ނަމުގައި ސެންޓަރެއް އުފައްދައިގެން މަސައްކަތްކޮށްފައެވެ. ނަމަވެސް ޖުލައި މަހުގެ 1 ވަނަ ދުވަހު ސަރުކާރުން ވަނީ އެންއީއޯސީ އުވާލާ، އެތަނުގެ ދަށުން ކުރަމުންގެންދިޔަ މަސައްކަތްތައް އެޗްއީއޯސީގެ ދަށަށް ބަދަލޮކޮށްފައެވެ.
ޑރ. ނަޒްލާ އެޗްއީއޯސީގެ ތަރުޖަމާނަކަށް ހަމަޖައްސާފައިވާކަމަށް ހާމަކޮށްފައިވަނީ ހެލްތު މިނިސްޓްރީން ކޮށްފައިވާ ޓްވީޓެއްގައެވެ.
ޑރ. ނަޒްލާއަކީ ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ސީނިއަރ މެޑިކަލް އޮފިސަރުގެ މަގާމު ފުރުއްވަމުން ގެންދަވާ ބޭފުޅެކެވެ. އަދި ކޮވިޑް-19އާ ގުޅިގެން ރައްޔިތުން ހޭލުންތެރިކުރުވާ ސަމާލުކަން ދޭންވީ ކަންތައްތަކާއި ގުޅޭގޮތުން ޑރ. ނަޒްލާ ވަނީ ނޫސްވެރިންގެ ބައްދަލުވުންތަކުގައި ރައްޔިތުންނަށް މައުލޫމާތު ދެއްވާފައެވެ.
ކޮވިޑް-19ގައި ޑރ. ނަޒްލާ ބޮޑަށް ޚާއްސަ ވެފައި ވަނީ އެ ބަލި ޖެހޭ މީހުންގެ ކޮންޓެކްޓް ޓްރޭސިންއާ ގުޅޭ ކަންކަމުގައެވެ.
ތަރުޖަމާނުކަމަށް އައްޔަނުކުރެއްވުމާއި ގުޅިގެން ޑރ. ނަޒްލާ ކުރެއްވި ޓްވީޓެއްގައި ވިދާޅުވެފައިވަނީ މިއީ ބޮޑު ޒިންމާއެއް ކަމަށެވެ. އަދި ކޮވިޑް-19އާ ގުޅިގެން އެންމެ ފަހުގެ މައުލޫމާތުތަކާއި ރައްކާތެރިވުމުގެ ގޮތުން ކުރަންޖެހޭ ކަންތައްތަކާއި ގުޅޭގޮތުން މައުލޫމާތު ދެއްވަމުން ގެންދަވާނެ ކަމަށެވެ.
އެންއީއޯސީގެ މަސައްކަތްތައް އެޗްއީއޯސީއަށް ބަދަލު ކުރި ނަމަވެސް އެ ސެންޓަރުން ދެމުން އައި ހިދުމަތްތައް އެއްވެސް ދަތިކަމެއް ނެތި ދެވޭނެ ކަމަށް ހެލްތް މިނިސްޓަރު އަބްދުﷲ އަމީން ވަނީ ވިދާޅުވެފައެވެ. އެ ސެންޓަރަށް ގެނައި ހަމަ އެކަނި ބަދަލަކީ އޮޕަރޭޝަން ކުޑަކޮށް، އިދާރީ ގޮތުން ހިންގުމަށް ގެނެސްފައިވާ ބަދަލުކަމަށް އަމީން ވަނީ ވިދާޅުވެފައެވެ.
