ދައުލަތަށް ރައްދުވާ 66 މައްސަލައަކާއެކު، މިއަހަރު އޭޖީ އޮފީހުން 465 އަޑުއެހުމަކަށް ހާޒިރުވެފައިވޭ

މިއަހަރު އެޓަރނީ ޖެނެރަލް އޮފީސް (އޭޖީ އޮފީސް) އިން 465 އަޑުއެހުމަކަށް ހާޒިރުވެފައިވާ ކަމަށް އެ އޮފީހުން ބުނެފިއެވެ.

މިއަހަރުގެ ފުރަތަމަ 6 މަސް ދުވަހުގެ ތަފާސްހިސާބުތައް ހިއްސާކޮށް އޭޖީ އޮފީހުން ކުރި ޓްވީޓެއްގައި ބުނީ، ފާއިތުވި ހަ މަސް ދުވަހު އެޓަރނީ ޖެނަރަލްގެ އޮފީހުން 465 އަޑުއެހުމަކަށް ހާޒިރުވެ، 126 މައްސަލާގައި ވަކާލާތު ކޮށްފައިވާ ކަމަށެވެ.

އޭގެ އިތުރުން، ފާއިތުވި 6 މަސް ދުވަހުގެ ތެރޭގައި އޭޖީ އޮފީހުން 60 މައްސަލައެއްގައި ދައުވާ ކޮށްފައިވާއިރު، ދައުލަތަށް ދައުވާ ރައްދުވާ 66 މައްސަލައެއް ހިމެނޭކަންވެސް ތަފާސްހިސާބުތަކުން ދައްކައެވެ. އެގޮތުން އޭޖީ އޮފީހުން ދައުވާ ކޮށްފައިވާ 60 މައްސަލައާއި، ދައުލަތަށް ދައުވާ ރައްދުވާ މައްސަލަތަކުގެ ތެރެއިން ގިނަ މައްސަލަތައް ކުރިއަށް ގެންގޮސްފައިވަނީ ސިވިލް ކޯޓުގައެވެ.

ދައުލަތަށް ދައުވާ ރައްދުވާ މައްސަލަތަކުގެ ތެރެއިން 46 މައްސަލައެއް ސިވިލް ކޯޓުގައި ކުރިއަށް ގެންގޮސްފައިވާއިރު، 11 މައްސަލައެއް ހައިކޯޓުގައިވެސް ކުރިއަށް ގެންގޮސްފައިވެއެވެ. އަދި މެޖިސްޓްރޭޓް ކޯޓު ތަކުގައި ކުރިއަށްދިޔަ 7 މައްސަލައަކާއި، ވަޒީފާއާބެހޭ ޓްރައިބިއުނަލްގައި ކުރިއަށްދިޔަ 2 މައްސަލައެއްވެސް ހިމެނެއެވެ.

އޭޖީ އޮފީހުން ބުނީ، އަހަރުގެ ފުރަތަމަ 6 މަސް ދުވަހުގެ ތެރޭގައި އެންމެ ގިނައިން އަޑުއެހުންތަކަށް ގޮސްފައިވަނީ ޖެނުއަރީ މަހު ކަމަށެވެ. އެގޮތުން ޖެނުއަރީ މަހު 143 މައްސަލައެއްގެ އަޑުއެހުމަށް ހާޒިރުވެފައިވާއިރު، ކޮވިޑް-19 ގެ ނުރައްކަލުގެ ސަބަބުން މިއަހަރުގެ މާރޗު މަހުން ފެށިގެން އަޑުއެހުންތައް ކޮންމެސް ވަރަކަށް މަޑުޖެހިފައިވާކަން އޭޖީ އޮފީހުން ފާހަގަ ކޮށްފައިވެއެވެ.

އެކަމާ ގުޅިގެން އެޓަރނީ ޖެނެރަލް އިބްރާހިމް ރިއްފަތު ކުރެއްވި ޓްވީޓެއްގައި ވިދާޅުވީ، ފާއިތުވެދިޔަ މަސްތަކަކީ ހުރިހާ ގޮތަކުންވެސް ދަތި އުނދަގޫވި ދުވަސްވަރެއް ކަމަށެވެ. އެގޮތުން މަސައްކަތްކުރުން އައު ގޮތްތަކަކަށް ބައްޓަން ކުރަން ޖެހުނުކަން ފާހަގަ ކުރައްވައި ރިއްފަތު ވިދާޅުވީ، ޤާނޫނީ ލަފާ ދިނުމާއި މައްސަލަތަކާ ގުޅިގެން މުވައްޒަފުން ކުރި މަސައްކަތަށްވެސް ތަޢުރީފު ޙައްޤު ކަމަށެވެ.