ރޭޕާއި ދެކޮޅަށް މިއަދު ވެސް އަޑު އުފުލައިފި
3 ޖުލައި 2020 | ހުކުރު 14:31މުޒާހަރާ އިންތިޒާމް ކުރީ ވޮއިސް އޮފް ޗިލްޑްރެންސް އިން
ހުކުރު ދުވަހުކުރި މުޒާހަރާގެ ތެރެއިން
ރާއްޖޭގައި މި ފަހަކަށް އައިސް ޖިންސީ ގޯނާތަކުގެ މައްސަލަތައް ގިނަވާތީވެ، އެކަމާއި ދެކޮޅަށް މާލޭގައި އަނެއްކާވެސް އަޑު އުފުލައިފިއެވެ.
ދާދި ފަހުން ވުޖޫދަށް އައި ވޮއިސް އޮފް ޗިލްޑްރެން (ވީއޯސީ) އިން އިންތިޒާމު ކޮށްގެން ބޭއްވި މުޒާހަރާ ފެށީ ހުކުރު ދުވަހު ހަވީރު ޖެންޑަރ މިނިސްޓްރީ ކުރިމަތިންނެވެ. މިނިސްޓްރީން ކުރިމަތީގައި އަޑު އުފުލުމަށް ފަހު މުޒާހަރާގެ ބައިވެރިން ވަނީ ހިނގާފައި ގޮސް ބޭންކް އޮފް މޯލްޑިވްސް ކުރިމަތީގައި އިށީންދެ ތިބެގެން އަޑުއުފުލާފައެވެ.
ބީއެމްއެލް ކުރިމަތީގައި ތިބެގެން މުޒަހަރާގެ ބައިވެރިން ވަނީ އެމީހުންނަށް މީގެ ކުރިން ދިމާވެފައިވާ ޖިންސީ ގޯނާތަކުގެ މައްސަލަތައް ބައިވެރިންނާ ހިއްސާކޮށްފައެވެ.
މުޒާހަރާ އިސްކޮށް ރާވާ ހިންގުމުގައި ބައިވެރިވި އިސް އޮފިޝަލަކު ބުނީ، އެ ޖަމިއްޔާގެ މަގްސަދަކީ ޖިންސީ ގޯނާތަކާއި ދެކޮޅަށް އަޑު އުފުލައި އެކަން މުއައްސަސާތަކުގެ ސަމާލުކަމަށް ގެނައުމާއި އެކު، ހުށައެޅޭ މައްސަލަތައް އަވަސްކޮށް ދިނުމަށް އަޑު އުފުލުން ކަމަށެވެ. އެ މީހުން ވަނީ ބީއެމްއެލް ކުރިމަތީ ސަރަހައްދުގައި ތިބި ފުލުހުންނަށް ބަހުގެ ހަމަލާތައްވެސް ފޮނުވާފައެވެ.
ގިނަ އަދަދެއްގެ ބައިވެރިންނާއެކު ކުރިޔަށް ދިޔަ މުޒާހަރާ ނިންމާލީ ފުލުހުންގެ ހުވާ ކިޔަމުން، ކުރިއަށް މުޒާހަރާ އޮންނާނެ ދުވަސް ޓްވީޓް ކުރާނެ ކަމަށް ބުނެ އިއުލާން ކުރަމުންނެވެ. ސިލްސިލާކޮށް މުޒާހަރާތަކެއް ފެށިފައި މިވަނީ މި ފަހަކަށް އައިސް ޖިންސީ ގޯނާގެ މައްސަލަތައް ރިޕޯޓް ކުރެވޭ އަދަދު އިތުރުވެފައި ވަނިކޮށެވެ.
