މަރުކޮމިޝަންގެ ތަހުޤީގަށް ރާއްޖެއިން ބޭރުގެ ފަންނީ މާހިރަކު އައްޔަން ކޮށްދިނުމަށް ނޫސްވެރިޔާ ރިލްވާން އަބްދުﷲ އާއި ބްލޮގަރ ޔާމީން ރަޝީދުގެ އާއިލާއިން ރައީސުލްޖުމްހޫރިއްޔާ އިބްރާހިމް މުހައްމަދު ސާލިޙުގެ އަރިހުން އެދިވަޑައިގެންފިއެވެ.
ޔާމީން ރަޝީދާއި ރިލްވާންގެ އާއިލާއިން ބުރާސްފަތި ދުވަހު ނެރެފައިވާ ނޫސްބަޔާނެއްގައި ވަނީ މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ތަހުޤީގު ކުރާ ކޮމިޝަނުން މައްސަލަތައް ތަހުޤީގުކޮށް ފުރިހަމަކުރުމަށްޓަކައި އިތުރަށް ބޭނުންވާ އެހީތެރިކަން ކަށަވަރުކުރުމަށް އެދި ،2014 ވަނަ އަހަރުގެ އޮގަސްޓް މަހުގައި ވަގަށް ނަގައި ގެއްލުވާލާފައިވާ ނޫސްވެރިޔާ އަހުމަދު ރިލްވާން އަބްދުﷲ އާއި 2017 ވަނަ އަހަރުގެ އެޕްރީލް މަހުގައި ގަތުލު ކޮށްފައިވާ ބްލޮގަރ ޔާމީން ރަޝީދުގެ އާއިލާއިން ބުރާސްފަތި ދުވަހު ރައީސް ސާލިޙާއި ބައްދަލުކުރައްވާފައިވާ ކަމަށެވެ.
މި ބައްދަލުވމުގައި ކޮމިޝަން މަސައްކަތްތަކުގައި މިހާތަނަށް ފާހަގަ ކުރެވިފައިވާ ބައެއް ކަންތައްތައް ރައީސުލްޖުމްހޫރިއްޔާ އާ ހިއްސާކޮށްފައިވާނެ ކަމަށެވެ.
އަދި ކޮމިޝަންގެ މަސައްކަތްތައް އިތުރަށް ފުރިހަމަކޮށް ކޮމިޝަނުން ތަރައްޤީ ކުރަމުންދާ މައްސަލަތަކުގައި ހިމެނޭ އެންމެހާ އާއިލާތަކަށް އިންސާފު ޤާއިމުކުރެވޭނެކަން ކަށަވަރު ކުރުމަށްޓަކައި ދިވެހިރާއްޖެއިން ބޭރުން ތަހުޤީގުގެ ދާއިރާގެ މާހިރަކު އައްޔަންކޮށްދެއްވައި ކޮމިޝަންގެ މަސައްކަތަށް އެހީތެރިކަން ފޯރުކޮށްދެވޭނެ އިންތިޒާމް ހަމަޖައްސައިދިނުމަށް އެދިފައިވާނެ ކަމަށެވެ.
އާއިލާތަކުގެ މި އެދުމަށް ރައީސުލްޖުމްހޫރިއްޔާ އިޖާބަދެއްވާފައިވާކަން ބަޔާނުގައި ވަނީ ފާހަގަކޮށްފައެވެ.
އުއްމީދަކީ އެންމެހާ އާއިލާތަކަށް ލަސްނުވެ އިންސާފު ލިބުން ކަމަށް ރިލްވާން އާއި ޔާމީންގެ އާއިލާއިން ބުނެއެވެ.
ރިލްވާނު މަރުގެ މައްސަލައާއި، ޔާމީން ރަޝީދުގެ މަރުގެ މައްސަލަ އަކީ ރައީސުލްޖުމްހޫރިއްޔާ އުފައްދަވާފައިވާ މަރުކޮމިޝަނުން ތަހުޤީގު ކުރަމުންދާ މައްސަލަތަކެކެވެ.
މި މައްސަލައިގެ ފޮރިންސިކް އެނަލައިސިސް ރިޕޯޓުން ލިބިފައިވާ މައުލޫމާތާއެކު ތަހުގީގަށް އާ ހޯދުންތަކެއް ލިބިފައިވާކަމަށް މަރު ކޮމިޝަނުން ބުނެފިއެވެ.
ފޮރިންސިކް އެނަލައިސިސް ރިޕޯޓު އަދި ފައިނަލް ރިޕޯޓުވެސް ވަރަށް އަވަހަށް ނިންމާނެކަމަށް ރާއްޖެ އެމްވީއަށް މައުލޫމާތު ދެއްވަމުން ފަރީޝާ އަބްދުﷲ ވަނީ ވިދާޅުވެފައެވެ.
ރިލްވާން މަރާލި މައްސަލައިގައި މަރު ކޮމިޝަނުން މީގެކުރިން ބުނެފައިވަނީ، ރިލްވާން ރަހީނުކޮށް، ޑިންގީއަކަށް ލައިގެން ގެންގޮސް ދޯންޏަކަށް އެރުވުމަށް ފަހު ޝަހާދަތް ލައިދިނުމަށް ފަހު މަރާލާފައިވާކަން މިހާތަނަށް ހޯދުނު ހެކިތަކުން އެނގިފައިވާ ކަމަށެވެ.
ފައިނަލް ރިޕޯޓުން މަރާލުމަށް ފައިސާދިން ވިޔަފާރިތަކުގެ މައުލޫމާތާއި އެ މައްސަލައިގެ ޝާމިލްވާ ހުރިހާާ ފަރާތްތަކާއި ތުހުމަތު ކުރެވިފައިވާ ހުރިހާ މައުލޫމާތެއް އެނގިގެންދާނެއެވެ.
