ކ. މާފުށި ޖަލުގައި ތާރމަލް ކެމެރާ ހަރުކޮށްފައިވާ ކަމަށް މޯލްޑިވްސް ކަރެކްޝަނަލް ސާރވިސް އިން ބުނެފިއެވެ.
ކަރެކްޝަންސް އިން ބުނީ އައު އާންމު ހާލަތުގައި ޖަލަށް ވަދެ ނިކުމެ ހަދާ ފަރާތްތަކުގެ ހުން ބެލުމަށްޓަކައި ހުރިހާ ޖަލުތަކެއްގައި ތާރމްލް ކެމެރާ ހަރުކުރުމުގެ މަސައްކަތް ފަށާފައިވާ ކަމަށެވެ.
އަދި މި މަޝްރޫޢުގެ ދަށުން މާފުށީ ޖަލުގައި ތަރމަލް ކެމެރާ ހަރުކޮށް ބޭނުން ކުރަން ފަށާފައިވާ ކަމަށެވެ.
އެތައް ފަހަރެއްގެ މަތިން ޖަލުތަކުން ރެންޑަމްކޮށް ސާމްޕަލް ނެގިކަމުގައި ވިޔަސް އަދި މިހާތަނަށް އެއްވެސް ޖަލަކުން ކޮވިޑް-19 ފެނިފައެއް ނުވެއެވެ.
ނިއު ނޯމަލްގައި ޖަލުތަކުގައި އަމަލު ކުރާނެ އުސޫލުތައް އެކުލަވާލަމުންދާ ކަމަށާއި ކޮވިޑް-19 އާ ގުޅިގެން ޖަލުތަކުގައި އަމަލު ކުރަމުން ދިޔަ ބައެއް އުސޫލުތައް ނިއު ނޯމަލްގައި ވެސް ދަމަހައްޓަމުން ގެންދާނެ ކަމަށް ކޮމިޝަނަރ އޮފް ޕްރިޒަންސް އަހުމަދު މުހައްމަދު ފުޅު މީގެ ކުރިން ވަނީ ވިދާޅުވެފައެވެ.
އެގޮތުން ކޮވިޑް-19އާ ގުޅިގެން ސްކައިޕް މެދުވެރިކޮށް ކުރިއަށް ގެންދަން ފެށި އާއިލީ ބައްދަލުވުންތައް ވެސް ދާއިމީކޮށް ކުރިއަށް ގެންދާނެ ކަމަށް އޭނާ ވިދާޅުވިއެވެ. އަދި ކެންޓީން މެދުވެރިކޮށް ގަންނަން ބޭނުންވާ ތަކެތި ގަތުމުގެ ފޮނުވާ ފައިސާ އޮންލައިންކޮށް ފޮނުވޭނެ އިންތިޒާމް ހަމަޖައްސާފައިވާ ކަމަށް ވިދާޅުވިއެވެ.
މީގެ އިތުރުން ނިއު ނޯމަލް އަކަށް ދާއިރު އާއިލީ ބައްދަލުވުންތަކާއި އެކަހެރި ބައްދަލުވުންތަކަށް ޖަލަށް ވަދެ ނުކުތުމުގެ ކަންކަމަށް ބަދަލުތަކެއް ގެންނަން މަސައްކަތް ކުރަމުންދާ ކަމަށް ވެސް އޭނާ ވިދާޅުވިއެވެ.
