މާދަމާ މާލެ ސަރަހައްދުގެ މިސްކިތްތަކުގައި ހުކުރު ނުކުރަން މިނިސްޓްރީން އަންގައިފި
މާދަމާ ހުކުރު ނުކުރާނީ މާލެ ސަރަހައްދުގެ މިސްކިތްތަކުގައި އެކަނި
މާލޭގައި ހުންނަ އިސްލާމީ މަރުކަޒު: މާލެ ސަރަހައްދުން ކޮވިޑް-19 ރޯގާއަށް މީހުން ޕޮޒިޓިވްވަމުންދޭ، އެހެންވެ ގިނަ އަދަދެއްގެ ބަޔަކު، ގިނަ ވަގުތު މިސްކިތުގައި ޖަމާވެގެން ތިބުމުން އިތުރަށް ރޯގާ ފެތުރުުމުގެ
ޖުލައި 3 ވާ ހުކުރު ދުވަހުގެ ހުކުރު ނަމާދު މާލެ ސަރަހައްދުގެ މިސްކިތްތަކުގައި ނުކުރަން އިސްލާމިކް މިނިސްޓްރީން ނިންމައިފިއެވެ.
އިސްލާމިކް މިނިސްޓްރީން ބުރާސްފަތި ދުވަހު ނެރެފައިވާ ސަރކިއުލަރ އެއްގައި ބުނެފައިވަނީ، ދުނިޔޭގައި ހަކުވިކަމާއެކު ފެތުރެމުންދާ ކޮވިޑް-19 ރޯގާ، ﷲގެ ވާގިފުޅާއެކު ރާއްޖޭގައި ފެތުރުން ހުއްޓުވުމަށްޓަކައި އަޅާ ރައްކާތެރިކަމުގެ މުހިއްމު ފިޔަވަޅެއްގެ ގޮތުން، އިސްލާމީ ފަތުވާދޭ އެންމެ މަތީ މަޖިލީހާއި، ދީނީ އިލްމުވެރިންނާއި ޑޮކްޓަރުންގެ ލަފާގެ މަތިން، 3 ޖުލައި 2020 ވާ ހުކުރު ނަމާދުގެ ޖަމާއަތް މާލޭ ސަރަހައްދުތަކުގެ ނުހެދުމަށް ނިންމާފައިވާ ކަމަށެވެ.
އެގޮތަށް އިސްލާމިކް މިނިސްޓްރީން ނިންމާފައިވަނީ، ހުކުރު ނަމާދުގެ ޖަމާއަތަކީ ވަރަށް ގިނަ އަދަދެއްގެ މީހުން އެއްތަންވެ، ގިނަ ވަގުތު ހޭދަވާ ޖަމާއަތަކަށްވުމުން، މި ދަނޑިވަޅަކީ މަރުހަލާތަކަކަށް ބަހާލައިގެން އާންމު ހާލަތަށް ލުއިތައް ދީ، އެ ލުއިތަކުގެ ސަބަބުން ބަލިމަޑުކަން ފެތުރޭ ގޮތް ދިރާސާކޮށް ދެނެގަނެ، އޭގެ މައްޗަށް ބިނާކޮށް، އިތުރު ނިންމުންތަކެއް ނިންމަންޖެހޭ ހާލަތަކަށްވާތީ އާއި، އަދިވެސް ބަލިމަޑުކަން ފެތުރުމުގެ ބިރުވެރިކަން އޮތް ކަމަށް ޑޮކްޓަރުން ލަފާ ކުރައްވާތީ އާއި، މިފަދަ ހާލަތެއްގައި އަމަލު ކުރުމަށް އިސްލާމްދީނުގައި އައިސްފައިވާ ޝަރުއީ ގަވާއިދުތަކާއި ހަމަތަކަށް ރިއާޔަތްކުރުމަށްފަހު، އިލްމުވެރިންގެ ލަފާގެ މަތިން ކަމަށެވެ.
މާލެ ސަރަހައްދުގެ މިސްކިތްތަކުގެ ހުކުރު ނަމާދު ޖަމާއަތް ނުހެދި ނަމަވެސް ރާއްޖޭގެ ރަށްތަކުގެ ހުރިހާ މިސްކިތްތަކުގައި ޖަމާއަތުގައި ހުކުރު ކުރާނެއެވެ.
ޖުލައި 3 ވާ ހުކުރު ދުވަހުގެ ހުކުރު ނަމާދު މާލެ ސަރަހައްދުގެ މިސްކިތްތަކުގައި ޖަމާއަތުގައި ނުކުރުމަށް އިސްލާމިކް މިނިސްޓްރީން ނިންމި ނަމަވެސް، ޖުލައި 1 ވަނަ ދުވަހުގެ މަޣްރިބް ނަމާދުން ފެށިގެން މާލެ ސަރަހައްުދުގެ މިސްކިތްތަކުގައި ޖަމާއަތުގައި ނަމާދު ކުރުމުގެ ހުއްދަ އިސްލާމިކް މިނިސްޓްރީން ވަނީ ދީފަ އެވެ.
ޖަމާއަތް ހެދުމަށް މިސްކިތްތައް ހުޅުވާލާފައިވާއިރު، މިސްކިތް ބެލެހެއްޓުމަށާއި، މިސްކިތައް ދާ މީހުން، ކޮވިޑް-19 ރޯގާއިން ރައްކާތެރިވުމަށް އަޅަންޖެހޭ ފިޔަވަޅުތަކާއި ސަމާލުވާން ޖެހޭ ކަންތައްތަކެއް، އިސްލާމިކް މިނިސްޓްރީންނާއި ހެލްތް ޕްރޮޓެކްޝަން އެޖެންސީން ވަނީ ކަނޑައަޅައި އާންމު ކޮށްފައެވެ.
މާލޭގެ ސަރަހައްދުގައި މިސްކިތްތަކުގައި ޖަމާއަތުގައި ނަމާދުކުރުން މެދުކަނޑާލީ މާރޗް މަހުގެ 18 ވަނަ ދުވަހުއެވެ.
