ޖިނާޢީ ކުށެއްގެ އަދަބު މާފު ކުރިތާ 10 އަހަރު ވެފައިވާނަމަ ފުލުހުންގެ ވަޒީފާއަށް ކުރިމަތިލެވޭ ގޮތަށް ހުށައަޅައިފި

ފުލުހުންގެ ޚިދުމަތުގެ ބިލާ ގުޅޭގޮތުން ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީގެ ސަބް ކޮމިޓީން އެޓަރނީ ޖެނެރަލް (އޭޖީ) އޮފީހުގެ ބޭފުޅުންނާ މަޝްވަރާ ކުރައްވައިފިއެވެ.

އާދިއްތަ ދުވަހު މަޖިލިސް އިދާރާގައި ބޭއްވި މި ބައްދަލުވުމުގައި އެޓަރނީ ޖެނެރަލް އޮފީހުގެ ފަރާތުން ބައިވެރިވެވަޑައިގެންފައިވަނީ އުސްތާޛާ އާއިޝަތު ނައީމްއާއި، އުސްތާޛާ އާއިޝަތު މުހައްމަދުއެވެ.

ކޮމިޓީގައި އޭޖީ އޮފީހުގެ ފަރާތުން ވަނީ ފުލުހުންގެ ޚިދުމަތުގެ ބިލާ ގުޅޭގޮތުން ކަމާބެހޭ ފަރާތްތަކާ މަޝްވަރާ ކުރައްވައި ހުށައަޅަންޖެހޭ އިސްލާޙުތައް ކޮމިޓީއާ ހިއްސާކޮށްފައެވެ. އެގޮތުން އޭޖީ އޮފީހުން ހުށައެޅި ބައެއް އިސްލާޙުތަކުގެ ތެރޭގައި، ޤާނޫނުގެ ދަށުން ހަދަންޖެހޭ ޤަވާއިދުތައް ހެދުމުގެ އިހުތިޔާރު ޕޮލިސް ކޮމިޝަނަރަށް ދިނުމުގެ ބަދަލުގައި، ކޮމިޝަނަރުގެ ލަފަޔާއެކު މިނިސްޓަރ ޤަވާއިދު އެކުލަވާލާ ގޮތަށް އިސްލާޙު ހުށައަޅާފައިވެއެވެ.

އޭގެ އިތުރުން، ލާމަރުކަޒުކޮށް ޚިދުމަތް ދިނުމާގުޅޭ ދާއިރާތައްވެސް ކޮމިޝަނަރުގެ ލަފަޔާއެކު މިނިސްޓަރ ކަނޑައަޅުއްވާ ގޮތަށް އޭޖީ އޮފީހުން ހުށައެޅި އިސްލާޙުގައި ބަޔާން ކޮށްފައިވެއެވެ.

ރެކްރޫޓު ކުރެވޭ ފުލުހުންގެ އާންމު ޝަރުތުތަކަށްވެސް އިސްލާޙުތަކެއް ގެނައުމަށް ވަނީ ހުށައަޅާފައެވެ. އެގޮތުން ޖިނާއީ ކުށެއް ސާބިތުވެ، ޙުކުމްކޮށް ނިމުނުތާ 10 އަހަރުވެފައިވާ މީހަކަށް ވާން ޖެހޭނެކަމަށް ބަޔާންކުރާ މާއްދާއަށް ޢަދަބު މާފުކުރިތާ 10 އަހަރުވެފައި ވުންވެސް އިތުރު ކުރުމަށް ވަނީ ހުށައަޅާފައެވެ.

އޭގެ އިތުރުން، އައު މާއްދާއެއްގެ ގޮތުގައި ފުލުހުންގެ ޚިދުމަތުން ވަކިވެ އަލުން ވަޒީފާއާ ގުޅޭ ފަރާތްތަކާ ގުޅޭ މާއްދާއެއް ވަނީ ހިމަނާފައެވެ. އެގޮތުން ވަޒީފާއިން ވަކިވުމަށްފަހު، އަލުން ވަނުމާމެދު 5 އަހަރު ނުވާނަމަ އަލުން އަސާސީ ތަމްރީނު ފުރިހަމަ ކުރަން ނުޖެހޭ ގޮތަށް ވަނީ ހުށައަޅާފައެވެ. އެހެން ނަމަވެސް އެފަދަ ފުލުހުންވެސް އަލުން ހުވާ ކުރަން ޖެހޭނެއެވެ.

އޭޖީ އޮފީހުން ބުނީ، ފުލުހުންގެ ރޭންކް ތަކުގެ ތެރޭގައި ހިމެނޭ "ކޮންސްޓެބަލްސް" ގެ ރޭންކް އުނިކޮށް، ކޮންސްޓެބަލުން "ނޮން-ކޮމިޝަންޑް" އޮފިސަރުންގެ ރޭންކުގައި ހިމެނުމަށް ހުށައަޅާފައިވާ ކަމަށެވެ. އަދި "ޕޮލިސް ކޯޕްރަލް" ގެ މަޤާމުވެސް އުނިކޮށް، އަލުން ދަރަޖަތައް ތަރުތީބު ކުރުމަށް ވަނީ ހުށައަޅާފައެވެ.

އޭޖީ އޮފީހުން ގިނަ އިސްލާޙުތަކެއް ހުށައަޅާފައިވާއިރު، އެކަންކަމަށް ކޮމިޓީން އިތުރަށް ދިރާސާކޮށް މަޝްވަރާ ކުރުމަށް ވަނީ ނިންމާފައެވެ.