ފަރުވާއަށް އިންޑިއާއަށް ދާ 37 މީހުން ފުރާނީ ހޯމަ ދުވަހު
27 ޖޫން 2020 | ހޮނިހިރު 22:0337 މީހަކަށް އިންޑިއާ އަށް ބޭސް ފަރުވާ އަށް ދެވޭނެ އިންތިޒާމް ވަނީ ހަމަޖައްސާފައި
ހޮނިހިރު ދުވަހުގެރޭ އެންއީއޯސީގައި ބޭއްވި ނޫސްވެރިންގެ ބައްދަލުވުމުގައި މަބްރޫކް އަޒީޒް ވާހަކަ ދައްކަވަނީ
ރާއްޖެއިން އެއްވެސް ގޮތަކަށް ފަރުވާދެވެން ނެތް ބަލިތަކުގެ 37 މީހުން ހޯމަ ދުވަހު ފަރުވާ އަށް އިންޑިއާ އަށް ފުރުވާލާން ހަމަޖެހިފައިވާ ކަމަށް ސަރުކާރުން ބުނެފިއެވެ.
ހޮނިހިރު ދުވަހުގެރޭ އެންއީއޯސީ ގައި ބޭއްވި ޕްރެސްކޮންފަރެންސް ގައި އެ ސެންޓަރުގެ ތަރުޖަމާނު މުހައްމަދު މަބްރޫކް އަޒީޒް ވިދާޅުވީ، އެ 37 މީހުން ހޯމަ ދުވަހު އިންޑިއާ އަށް ފުރުވާލާނެ ކަމަށެެވެ. އެ މީހުންގެ ތެރޭގައި 25 ބަލި މީހުންގެ އިތުރުން އެ ބަލި މީހުންގެ އެހީތެރިންވެސް ހިމެނޭ ކަމަށް އޭނަ ވިދާޅުވީއެވެ. އެ މީހުން ފަރުވާ ހޯދުމަށް ދިޔުމަށް ހަމަޖެހިފައިވަނީ އިންޑިއާގެ ކޮޗިންއަށެވެ.
އިންޑިއާ އަށް ދާ މީހުން 14 ދުވަހުގެ ކަރަންޓީނުގެ މުއްދަތެއް ފުރިހަމަ ކުރަންޖެހޭތޯ ނޫސްވެރިޔަކު ސުވާލު ކުރުމުން މަބްރޫކް ވިދާޅުވީ، އިންޑިއާ ގައި އެމީހުން ކަރަންޓީނު ނުކުރާނެ ކަަމަށެވެ.
މަބްރޫކް ވިދާޅުވީ އޭގެ އިތުރުން، އިތުރު 51 މީހަކު ސިއްހީ ފަރުވާއަށް އިންޑިއާ އަށް ފޮނުވާލުމުގެ މަސައްކަތް އާސަންދަ އާއި ފޮރިން މިނިސްޓްރީ ގުޅިގެން ކުރަމުންދާ ކަމަށެެވެ.
އިންޑިއާ ލޮކްޑައުން ކޮށްފައިވާ މި ދަނޑިވަޅުގައި އެ ގައުމުގެ ސަރުކާރުން ވަނީ ރާއްޖެއިން ފަރުވާ އަށް ދާ މީހުންނަށް ހާއްސަ ހުއްދައެއް ދޫކޮށްފައެވެ.
