ކިޔަވައިގެން އަންނަ ދަރިވަރުންނަށް ވަޒީފާ ހޯދައިދިނުމުގައި މުއައްސަސާތައް އެކުގައި މަސަައްކަތް ކުރަންޖެހޭ: ހަޔަރ އެޑިއުކޭޝަން
ކިޔަވައިގެން އަންނަ ކުދިންނަށް ވަޒީފާ ހޯދައިދިނުމުގައި ހާއްސަ ރޯލެއް އަދާ ކުރަން ޖެހޭ
މިނިސްޓަރ އޮފް ހަޔަރ އެޑިއުކޭޝަން ޑރ އިބްރާހިމް ހަސަން ހަފުލާއެއްގައި ވާހަކަފުޅު ދައްކަވަނީ | ރައީސް އޮފީސް
ކިޔަވައިގެން އަންނަ ދަރިވަރުންނަށް ވަޒީފާ ހޯދައިދިނުމުގައި ހުރިހާ މުއައްސަސާތައް ގުޅިގެން މަސައްކަތް ކުރަންޖެހޭ ކަމަށް މިނިސްޓަރ އޮފް ހަޔަރ އެޑިއުކޭޝަން ޑރ އިބްރާހިމް ހަސަން ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަފުޅު ދައްކަވަމުން މިނިސްޓަރު ވިދާޅުވީ، ތަޢުލީމު ހާސިލުކޮށްގެން މާލެ އަންނަ ކުއްޖާއަށް ވަޒީފާ ހޯދުމުގައި ގިނަ ގޮންޖެހުންތަކާއި ކުރިމަތިލާންޖެހޭ ކަމަށެވެ.
ވަޒީފާ ދޭ ފަރާތްތަކުން އިސްކަން ދެނީ ތަޖުރިބާ ހުރި މީހަކަށް ވަޒީފާ ދިނުމަށްކަން ފާހަގަކޮށް މިނިސްޓަރު ވިދާޅުވީ، ކިޔަވައިގެން އަންނަ ކުއްޖާއަށް ވަޒީފާއެއް ހޯދައިގެން މެނުވީ ތަޖުރިބާ އެއް ނުލިބޭނެ ކަމަށެވެ. އަދި މުސްތަގުބަލުގައި ހަޔަރ އެޑިއުކޭޝަން މިނިސްޓްރީން ކިޔަވައިގެން އަންނަ ކުދިންނަށް ވަޒީފާ ހޯދައިދިނުމުގައި ހާއްސަ ރޯލެއް އަދާ ކުރަން ޖެހޭ ކަމަށްވެސް ވިދާޅުވިއެވެ.
މިސާލެއްގެ ގޮތުގައި، ކޮވިޑް-19ގެ ހާލަތާއި ގުޅިގެން ފަތުރުވެރިކަމުގެ ދާއިރާއިން މީހުން ބިނާކުރުމަށް ކުރަައްވާ މަސައްކަތް ފާހަގަކުރައްވަމުން މިނިސްޓަރު ވިދާޅުވީ، މި މަސައްކަތުގައި ސަރުކާރުގެ ކަމާބެހޭ ވުޒާރާތައް ގުޅިގެން މަސައްކަތް ކުރެއްވުމަކީ ވަރަށް މުހިންމު ކަމެއް ކަމަށެވެ.
އެގޮތުން ކޯހުގެ ތިއަރީ ބައި އޮންލައިންކޮށް ކުރިއަށް ގެންގޮސް، ޕްރެކްޓިކަލް ބައި ރިސޯޓުގައި ވަޒީފާ އަދާކުރާ މާހައުލުގައި އެ މަސައްކަތް ކުރާ ގޮތަށް މަޝްވަރާކުރައްވަމުން ގެންދަވާ ކަމަށް މިނިސްޓަރު ވިދާޅުވިއެވެ.
ޕްރޮގުރާމުގައި އިތުރަށް ވާހަކަ ދައްކަވަމުން މިނިސްޓަރު ވިދާޅުވީ، ސަރުކާރުގެ ވިސްނުން އޮތީ ވަކި މަސައްކަތެއް ކުރަން އިކޮނޮމިކް މިނިސްޓްރީގެ ޖޮބް ސެންޓަރުގައި ރެޖިސްޓަރ ވެފައިވާނަމަ ބިދޭސީއަކަށް ރާއްޖެ އައިސް އެ މަސައްކަތް ކުރުމުގެ ކޯޓާ ނުދޭން ކަމަށެވެ.
މިނިސްޓަރު ވަނީ މިއީ މަތީ ތަޢުލީމު ހާސިލުކޮށް ރާއްޖެ އަންނަ ކުއްޖާއަށް ވަޒީފާގެ ފުރުސަތު އިތުރަށް ލިބިގެން ދާނެ ކަމެއްގެ ގޮތުގައި ސިފަކުރައްވާފައެވެ.
