މަސްތުވާތަކެތީގެ އޮޕަރޭޝަން: ރަސްގަތީމަށް އެތެރެކުރަން އުޅުނު ގިނަ އަދަދެއްގެ ތަކެތި ފުލުހުންގެ ހޯދައިފި

މަސްތުވާތަކެއްޗާ ދެކޮޅަށް ފުލުހުން ކުރަމުންދާ މަސައްކަތްތަކުގެ ތެރެއިން ހިންގި ހާއްސަ އޮޕަރޭޝަނެއްގައި ރ. ރަސްގަތީމަށް އެތެރެކުރަން އުޅުނު ގިނަ އަދަދެއްގެ މަސްތުވާތަކެތި ފުލުހުން ހޯދައިފިއެވެ.

މިކަމާއި ގުލިގެން ފުލުހުން ބުނީ، މި ތަކެތި ފުލުހުންގެ ބެލުމުގެ ދަށަށް ގެނެސްފައިވަނީ މި ހިނގާ ޖޫން މަހުގެ 24 ވަނަ ދުވަހު، މާލެއިން ފުރައިގެން ރ. އަތޮޅަށް ދަތުރުކުރި ބޯޓަކުން ރ. ވާދުއަށް ބާލާފައި ހުރި ފޮށިގަނޑެއް ބަލައި ފާސްކޮށްގެން ކަމަށެވެ. ވެރިއަކު ނެތި ވާދޫ ބަނދަރުގައި ހުރި އެ ފޮށިގަނޑު ފުލުހުންގެ ބެލުމުގެ ދަށަށް ގެނެސް ބަލައި ފާސްކުރިއިރު މަސްތުވާތަކެތި ކަމަށް ބެލެވޭ އެއްޗެއް ހުރި ދެ ރަބަރު ޕެކެޓު ފެނިފައިވާ ކަމަށެވެ.

މި މައްސަލައާ ގުޅިގެން މިހާތަނަށް އެއްވެސް މީހަކު ހައްޔަރުކޮށްފައި ނުވާއިރު ފުލުހުންނަށް ވަނީ އެ ތަކެއްޗަކީ ރަސްގެތީމަށް އެތެރެކުރަން އުޅުނު މަސްތުވާތަކެތި ކަމަށް އެނގިފައެވެ.

މި މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.