ކޮވިޑް-19އާ ގުޅިގެން، ނުނަގައި ބެހެއްޓިފައިވާ ޕާސްޕޯޓުތައް ކެންސަލްވާ މުއްދަތު އިމިގްރޭޝަނުން އިތުރުކޮށްފި
25 ޖޫން 2020 | ބުރާސްފަތި 13:47ކެންސަލް ކުރެވޭނީ ސިއްހަތުގެ ކުއްލި ނުރައްކަލުގެ ހާލަތު އުވާލާ ތާރީޚުން ފެށިގެން އެއްއަހަރު ފަހުން
އިމިގްރޭޝަންގެ މުވައްޒަފުންތަކެއް ޕާސްޕޯޓުތަކެއް ޗެކްކުރުމުގެ މަސައްކަތްތައް ކުރިއަށްދަނީ
ކޮވިޑް-19އާ ގުޅިގެން، ނުނަގައި ބެހެއްޓިފައިވާ ޕާސްޕޯޓުތައް ކެންސަލްވާ މުއްދަތު މޯލްޑިވްސް އިމިގްރޭޝަނުން އިތުރުކޮށްފިއެވެ.
މޯލްޑިވްސް އިމިގްރޭޝަނުން ބުނީ ދިވެހި ޕާސްޕޯޓާބެހޭ ގަވައިދުގެ 19ވަނަ މާއްދާ (ޕާސްޕޯޓު ކެންސަލްކުރުން) ގެ (ށ) ގެ 5 ގައިވާ ގޮތުގެ މަތިން ޕާސްޕޯޓު ހެއްދުމަށްފަހު ބަލައި ނާންނަތާ 6 މަސްދުވަހަށް ވުރެ ގިނަ ދުވަހު އިމިގްރޭޝަނުގައި ބެހެއްޓިފައިވާ ޕާސްޕޯޓު ކެންސަލްވާނެ ކަމަށެވެ.
ނަމަވެސް ކޮވިޑް-19އާ ގުޅިގެން ސިއްހަތުގެ ކުއްލި ނުރައްކަލުގެ ހާލަތު އިއުލާން ކޮށްފައިވާތީ، ދިވެހި ޕާސްޕޯޓާބެހޭ ގަވައިދުގެ 20ވަނަ މާއްދާއިން ކޮންޓްރޯލަރ ޖެނެރަލަށް ލިބިދީފައިވާ އިޚްތިޔާރުގެ ތެރެއިން، ޕާސްޕޯޓު ހެއްދުމަށްފަހު ބަލައި ނާންނަ ޕާސްޕޯޓުތައް ކެންސަލް ކުރެވޭނެ މުއްދަތު އިތުރުކޮށްފައިވާ ކަމަށް އިމިގްރޭޝަނުން ބުނެއެވެ.
އެގޮތުން 2019 ސެޕްޓެމްބަރ 11ވަނަ ދުވަހުގެ ފަހުން ޕާސްޕޯޓު ހެއްދުމަށްފަހު ވެރިފަރާތުން ބަލައި ނައިސް ބެހެއްޓިފައިވާ ޕާސްޕޯޓު ކެންސަލް ކުރެވޭނީ، ކޮވިޑް-19އާ ގުޅިގެން ރާއްޖޭގައި އިއުލާނު ކޮށްފައިވާ ސިއްހަތުގެ ކުއްލި ނުރައްކަލުގެ ހާލަތު އުވާލާ ތާރީޚުން ފެށިގެން އެއް އަހަރު ފަހުން ކަމަށް އިމިގްރޭޝަނުން ބުނެއެވެ.
