ޗައިނާއިން ހިންގާ މަޝްރޫއުތަކާއި ދެއްވާ އެހީތެރިކަމާއި ގުޅޭގޮތުން މަޝްވަރާކޮށްފި
ފޮރިން މިނިސްޓަރ ވަނީ ޗައިނާއިން ދެއްވާ އެހީތެރިކަމަށް ޝުކުރު އަދާކުރައްވާފައި
ފޮރިން މިނިސްޓަރ އަބްދުﷲ ޝާހިދު (ވ) އަދި ޗައިނާގެ ސަފީރު ލިޒޮންގ (ކ) ބޭއްވި ބައްދަލުވުމުގެ ތެރެއިން
ޗައިނާއިން ރާއްޖޭގައި ހިންގާ މަޝްރޫއުތަކާއި، އެގައުމުން ދެމުންދާ އެހީތެރިކަމާއި ގުޅޭގޮތުން ފޮރިން މިނިސްޓަރ އަބްދުﷲ ޝާހިދާއި ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ޒަންގ ލިޒޮންގާއި ދެބޭފުޅުން މަޝްވަރާ ކުރައްވައިފިއެވެ.
ދެ ބޭފުޅުންގެ މަޝްވަރާއަށްފަހު ފޮރިން މިނިސްޓަރ ޝާހިދު ކުރެއްވި ޓްވީޓެއްގައި ވިދާޅުވީ މަޝްވަރާ ބައްދަލުވުމަކީ ފައިދާ ކުރަނިވި ބައްދަލުވުމެއް ކަމަށެވެ. އަދި މި ބައްދަލުވުމުގައި ރާއްޖޭގައި ކުރިއަށްދާ މަޝްރޫއުތަކާއި ކޮވިޑް-19އާ ގުޅިގެން ދެއްވަމުން ގެންދަވާ އެހީތެރިކަމާއި ގުޅޭގޮތުން ވާހަކަ ދެކެވުނު ކަމަށެވެ.
ފޮރިން މިނިސްޓަރ ޝާހިދު ވަނީ ކޮވިޑް-19 ބަލި މަޑުކަމުގެ ތެރޭގައި ޗައިނާގެ ސަރުކާރުންނާއި ރައްޔިތުން ހުއްޓުމެއް ނެތި ވެދެއްވަމުން ގެންދަވާ އެހީތެރިކަމަށް ޝުކުރު އަދާ ކުރައްވާ ކަމަށެވެ.
ޗައިނާގެ އެކި ކުންފުނިތަކުން ރާއްޖޭގައި ގިނަ މަޝްރޫއުތަކެއް ހިންގަމުން އަންނަ އިރު، ކޮވިޑް-19އާ ގުޅިގެން އެގައުމުން ވަނި ރާއްޖެއަށް އެކި ފަހަރުމަތިން އެހީތެރިކަން ފޯރުކޮށްދީފައެވެ. އެގޮތުން 3 ފަހަރެއްގެ މަތިން، ފްރަންޓް ލައިންގައި މަސައްކަތް ކުރާ ފަރާތްތަކަށް ބޭނުންވާ މާސްކާއި އެހެނިހެން ސާމާނުތައް ވަނީ ހަދިޔާ ކޮށްފައެވެ.
