އެޓަލާންޓާއިން ލާޒިއޯ ބަލިކޮށްފި

އެޓަލާންޓާއިން އިޓާލިއަން ލީގުގެ ޗެމްޕިއަންކަމަށް ވާދަކުރަމުން އަންނަ ލާޒިއޯ ބަލިކޮށްފިއެވެ.

ލީގުގައި ބުދަ ދުވަހުގެރޭ ކުޅުނު މެޗުން ލާޒިއޯގެ މައްޗަށް އެޓަލާންޓާ ކުރިހޯދީ 3-2 ގެ ނަތީޖާއަކުންނެވެ. މިއީ ނުވަ މަސް ދުވަހަށް ފަހު، ފުރަތަމަ ފަހަރަށް ލީގުގައި ލާޒިއޯ ބަލިވި މެޗެވެ.

އެޓަލާންޓާގެ ދަނޑުގައި ކުޅުނު މި މެޗުގެ ވަރަށް ކުރީކޮޅު ލާޒިއޯއިން ވަނީ ލީޑު ނަގާފައެވެ. މެޗުގެ ފަސްވަނަ މިނެޓުގައި ލާޒިއޯއިން ލީޑު ނެގީ އެޓަލާންޓާގެ މާޓިން ޑި ރޫން އަތުން ބައި ކޮޅަށް ވަން ލަނޑާއެކުއެވެ. އަދި އޭގެ ހަ މިނެޓު ފަހުން ސާޖެއީ މިލިންކޮވިޗް-ސަވިޗް ވަނީ ލާޒިއޯއަށް ލީޑު ފުޅާކޮށްދީފައެވެ.

މެޗުގައި އެޓަލާންޓާއިން ފަރަގު ކުޑަކުރީ 38 ވަނަ މިނެޓުގައެވެ. މި ލަނޑު އެޓީމަށް ކާމިޔާބުކޮށްދިނީ ރޮބިން ގޮސެންސްއެވެ. އަދި މެޗުގެ 66 ވަނަ މިނެޓުގައި ރުސްލަން މަލިނޮވްސްކީ ވަނީ އެޓަލާންޓާއަށް ނަތީޖާ އެއްވަރުކޮށްދީފައެވެ. މި މެޗުން އެޓަލާންޓާ މޮޅުވީ 80 ވަނަ މިނެޓުގައި ހޯސޭ ލުއިސް ޕަލޮމިނޯ ކާމިޔާބުކުރި ލަނޑުންނެވެ.

މި މެޗުން ބަލިވުމުން ލާޒިއޯއަށް ވަނީ އެއްވަނައިގައި އޮތް ޔުވެންޓަސްގެ ފަރަގު ކުޑަކުރަން ލިބުނު ފުރުސަތު ގެއްލިފައެވެ. މި ހަފުތާގައި ކުޅުނު މެޗުން ޔުވެންޓަސް ވަނީ ބޮލޯނިއާ އަތުން 2-0 އިން މޮޅުވެ، އެއްވަނައިގައި ހަތަރު ޕޮއިންޓުގެ ލީޑެއް ނަގާފައެވެ. ޔުވެންޓަސްއަށް 27 މެޗުން 66 ޕޮއިންޓު ލިބިފައިވާއިރި، ލާޒިއޯ ދެވަނައިގައި އޮތީ 27 މެޗުން 62 ޕޮއިންޓާއެކުއެވެ. އެ ދެ ޓީމާ ދެން ވާދަކުރާ އިންޓަ މިލާން ބުދަ ދުވަހުގެރޭ ސައުސޮލޯއާ 3-3 އިން އެއްވަރުވިއިރު، އެ ޓީމު އޮތީ 27 މެޗުން 58 ޕޮއިންޓާއެކު ތިންވަނައިގައެވެ. ލާޒިއޯ އަތުން ބުދަ ދުވަހުގެރޭ މޮޅުވި އެޓަލާންޓާ އޮތީ 27 މެޗުން 54 ޕޮއިންޓާއެކު ހަތަރުވަނައިގައެވެ.