ޓެކްނޮލޮޖީގެ އެހީއާއެކު މޯލްޑިވްސް ޗެސް އެސޯސިއޭޝަނުން އޮންލައިން ރާޒުވާ މުބާރާތެއް ފަށައިފިއެވެ.

ދުނިޔޭގައި ހަލުވިކަމާއިއެކު ފެތުރެމުންދާ ކޮރޯނާވައިރަސް (ކޮވިޑް-19) ގެ އަސަރު ރާއްޖެއަށް ވެސް ކޮށްފައިވާއިރު، ރާއްޖޭގެ ކުޅިވަރުގެ ހަރަކާތްތައް ވަނީ ހުއްޓިފައެވެ. އެހެންކަމުން ޗެސް އެސޯސިއޭޝަނުން ހުޅުވާލި އޮންލައިން ރާޒުވާ މުބާރާތަށް ވަނީ ބޮޑު ތަރުހީބެއް ލިބިފައެވެ. މި މުބާރާތުގައި އަންހެން އަދި ފިރިހެން ކުޅުންތެރިން ބައިވެރިވާއިރު، މުބާރާތް ބަހާލާފައި ވަނީ ތިން އުމުރު ފުރައަކަށެވެ.

އޮންލައިން ޗެސް ޗެމްޕިއަންޝިޕް 2020 ގައި 18 ކުޅުންތެރިން ބައިވެރިވާއިރު، ކުޅުންތެރިން ވާދަކުރާ އުމުރު ފުރާތަކަކީ 13 އަހަރުން ދަށް، 15 އަހަރުން ދަށް އަދި 17 އަހަރެވެ. މި މަހުގެ 19 ވަނަ ދުވަހު ފެށި މި މުބާރާތުގައި ބައިވެރިވި ކުޅުންތެރިން ކުޅުމަށް ހަމަޖެހިފައިވަނީ އެ ކުޅުންތެރިއެއްގެ ގޭގައި ތިބެގެން "ޗެސް.ކޮމް" ގެ އެހީއާއެކުއެވެ.

މޯލްޑިވްސް ޗެސް އެސޯސިއޭޝަން ކުރިއަށްގެންދާ މި މުބާރާތަކީ ރާއްޖޭގައި މިހާތަނަށް ބާއްވާ ފުރަތަމަ އޮންލައިން މުބާރަތެވެ. ފުރަބަންދުވެ ސްކޫލަށް ނުދެވި ކުދިން ތިބި ހާލަތެއްގައި މިފަދަ މުބާރަތަކީ ގޭގައި ތިބެގެން ކުޅުންތެރިންނަށް އެކުދިންގެ ހުނަރު ކުރިއަރުވައި، މުޅިން އައު ތަޖުރިބާއެއް ލިބިގެންދާނެފަދަ މުބާރާތަކަށް ވެގެންދާނެ ކަމަށް ޗެސް އެސޯސިއޭޝަނުން ބުނެއެވެ.

މި މުބަރާތުގެ އެންމެ ފަހު ރައުންޑް ކުރިއަށް ގެންދިޔުމަށް ހަމަޖެހިފައިވަނީ މި މަހުގެ 26 ވާ ހުކުރު ދުވަހުއެވެ. މި މުބާރާތުގެ ހަނދާނީ ލިޔުން ދިނުމަށް ހަމަޖެހިފައިވަނީ މެއިލް މެދުވެރިކޮށް އޮންލައިންކޮށް ކަމަށް ވެސް މޯލްޑިވްސް ޗެސް އެސޯސިއޭޝަނުން ވަނީ ބުނެފައެވެ.

ކޮވިޑް-19 އާ ގުޅިގެން ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އެޅި ފިޔަވަޅުތަކެއް ލުއިތަކެއް ދޭން ފަށާފައިވާއިރު، ކުޅިވަރުގެ ހަރަކާތްތައް ފެށުމަށް މިހާރު ވަނީ ފުރުސަތުތަކެއް ދީފައެވެ. އެގޮތުން އެޗްޕީއޭގެ ގައިޑްލައިންތަކާ އެއްގޮތަށް ގައުމީ ޓީމުތަކުގެ ފަރިތަކުންތައް ފެށުމަށް ފުރުސަތު ދިނުމާއެކު، ބައެއް އެސޯސިއޭޝަންތަކުގެ ގައުމީ ޓީމުތައް މިހާރު ވަނީ ފަރިތަކުންތަކަށް ނުކުމެފައެވެ. އަދި ބައެއް އެސޯސިއޭޝަންތަކުން މިހާރު ދަނީ މުބާރާތްތައް ފެށުމަށްޓަކައި ވާން ޖެހޭ ތައްޔާރީތައް ވަމުންނެވެ.

މީގެ ކުރިން ކުޅިވަރާ ބެހޭ ވަޒީރު އަޙްމަދު މަޙްލޫފް ވަނީ ކޮވިޑް-19 އާ ގުޅިގެން އެންމެ ބޮޑު ގޮންޖެހުމަކާއި ކުރިމަތިލާން ޖެހޭނެ ދާއިރާއަކަށް ވެގެންދާނީ ކުޅިވަރުގެ ދާއިރާ ކަމަށާއި އެ ގޮންޖެހުމުން އަރައިގަތުމަށް ހުރިހާ ކުޅިވަރު އެސޯސިއޭޝަންތަކެއް ގުޅިގެން މަސައްކަތް ކުރުމަށް ގޮވާލައްވާފައެވެ.