ބާންލީ ސަޕޯޓަރުންގެ މައްސަލަ ބަލަނީ

ބާންލީ ސަޕޯޓަރުން ދަނޑުގެ މަތިން އެއަރކްރާފެއްޓެއްގައި ބެނާއެއް ހަރުކޮށްގެން ދުއްވި މައްސަލަ ބަލައި، އެ ސަޕޯޓަރުންނާ މެދު ފިޔަވަޅު އަޅާނެ ކަމަށް ބާންލީގެ ޝީފް އެގްޒެކުޓިވް ނެއިލް ހާޓް ވިދާޅުވެއްޖެއެވެ.

މެންޗެސްޓާ ސިޓީގެ އިއްތިހާދު ސްޓޭޑިއަމުގައި ހޯމަ ދުވަހުގެ ރޭ ސިޓި އާއި ބާންލީ ބައްދަލުކުރި މެޗް ފެށިގެން ކުޑައިރުކޮޅެއްގެ ތެރޭގައި ބާންލީގެ ސަޕޯޓަރުން ދަނޑު މަތިން ބެނާއެއްގެ އުދުއްސި މައްސަލަ ވަނީ ހޫނުވެފައެވެ. ސަޕޯޓަރުންގެ ބަޔަކު ދަނޑުގެ މަތިން އެއަރކްރާފެއްޓެއްގައި ހަރުކޮށްގެން ދުއްވި ބެނާގައި ޖަހާފައިވަނީ "ވައިޓް ލައިވްސް މެޓާ ބާންލީ" މިހެނެވެ.

ބާންލީ ސަޕޯޓަރުން ވައިޓް ލައިވްސް މެޓާ ބާންލީ ޖަހައިގެން އެއަރކްރާފެއްޓެއް ދުއްވިއިރު، ސިޓީ އާއި ބާންލީ ކުޅުންތެރިން ވަނީ މެޗު ފެށުމުގެ ކުރިން "ބްލެކް ލައިވްސް މެޓާ" ކެމްޕެއިންގައި ބައިވެރިވުމުގެ ގޮތުން ކަކޫ މައްޗަށް ތިރިވެ އިސް ދަށަށް ޖަހާފައެވެ.

މި މައްސަލައިގައި ބާންލީގެ ޝީފް އެގްޒެކުޓިވް ނެއިލް ހާޓް ވިދާޅުވީ މިފަދަ އަމަލުތަކަކީ ބަލައިގަނެވޭނެ އަމަލުތަކެއް ނޫން ކަމަށާއި ބާންލީގެ ކުޅުންތެރިންނާއި ބޯޑު މެމްބަރުންގެ އިތުރުން ކޯޗިންގ ސްޓާފުން އެއްވެ މިތިބީ ނަސްލީ ތަފާތުކުރުން ނައްތައިލުމަށް ކަމަށާއި، ނަސްލީ ތަފާތު ކުރުމަކީ ދުނިޔެއިން ފުހެލަންވެއްޖެ ކަމެއް ކަމަށެވެ.

ހާޓް އިތުރަށް ވިދާޅުވީ މި މައްސަލަ ބެލުމަށްފަހު އެކަން ކުރި ސަޕޯޓަރުން ބާންލީގެ މެޗުތައް ބަލަން ނުވައްދަން ނިންމައިފައިވާ ކަމަށާއި މި ސަސްޕެންޝަނަކީ އުމުރު ދުވަހަށް ދިގު ދެމިގެންދާނެ ސަސްޕެންޝަނެއް ކަމަށެވެ.

މީގެ އިތުރުން ހޯމަ ދުވަހުގެ ރޭ ގެ މެޗަށްފަހު ބާންލީގެ ކެޕްޓަން ބެން މީ ބުނީ މިއީ ވަރަށް ދެރަ ކަމެއް ކަމަށާއި އެފަދަ ކަމެއް ސަޕޯޓަރުންގެ ފަރާތުން ފެނުނީތީ ކުޅުންތެރިން ވެސް ވަރަށް ބޮޑަށް ލަދުގަތް ކަމަށެވެ.

މި ކަމުގައި ބައިވެރިވި ސަޕޯޓަރުން ހޯދައި ހަރުކަށި އަދަބު ދޭނެ ކަމަށް ބާންލީން ބުނިއިރު، މި މައްސަލަ ބާންލީގެ ފުލުހުން ވެސް އަންނަނީ ތަހުޤީޤު ކުރަމުންނެވެ.