އާސެނަލްގެ އެއްބަސްވުން އިތުރު އެއް އަހަރަށް ލުއިޒް އާކޮށްފި

އާސެނަލާއެކު ބްރެޒިލްގެ ޑިފެންޑަރު ޑޭވިޑް ލުއިޒް ހަދާފައިވާ އެއްބަސްވުން އިތުރު އެއް އަހަރަށް އާކޮށްފިއެވެ.

ޗެލްސީ ދޫކޮށް ލުއިޒް އާސެނަލަށް ބަދަލުވީ 8 މިލިއަން ޕައުންޑުގެ އަގަކަށް މިދިޔަ އަހަރުގެ އޮގަސްޓް މަހުގެ ތެރޭގައެވެ. އޭރު މީޑިއާތަކުން ވަނީ ލުއިޒް އާސެނަލަށް ބަދަލުވީ ދެ އަހަރުގެ އެއްބަސްވުމެއްގެ ދަށުން ކަމަށް ރިޕޯޓުކޮށްފައެވެ. އެކަމަކު ސްކައި ސްޕޯޓްސްއިން ވަނީ ލުއިޒް އާސެނަލާއެކު ހެދީ އެއް އަހަރުގެ އެއްބަސްވުމެއް ކަމަށް ރިޕޯޓުކޮށްފައެވެ.

އޮގަސްޓް މަހު ލުއިޒްގެ އެއްބަސްވުމުގެ މުއްދަތު ހަމަވަން އޮތް ނަމަވެސް، ދާދި ފަހުން ލުއިޒް ވަނީ އާސެނަލްގެ އެއްބަސްވުން އިތުރު އެއް އަހަރަށް އާކޮށްފައެވެ.

އާސެނަލްގެ އެއްބަސްވުން ލުއިޒް އާކުރި ނަމަވެސް، މީގެ ކުރިން މީޑިއާތަކުން ވަނީ އާސެނަލުން ލުއިޒް ދޫކޮށްލަން ނިންމާފައިވާ ކަމަށް ރިޕޯޓުކޮށްފައެވެ.

އާސެނަލްގެ އެއްބަސްވުން އިތުރު އެއް އަހަރަށް ލުއިޒް އާކުރިއިރު، އޭނާ މިހާތަނަށް ވަނީ އާސެނަލަށް 33 މެޗު ކުޅެދީފައެވެ. އެކަމަކު އޭނާގެ ފަރާތުން މި ސީޒަނުގައި އެންމެ އެދެވޭ ކުޅުމެއް ފެނިފައެއް ނުވެއެވެ.

މީގެ ކުރިން ޗެލްސީއަށް ވެސް ދެ ފަހަރެއްގެ މަތިން ކުޅެފައިވާ ލުއިޒް ވަނީ އޭނާގެ ކެރިއަރުގައި ގިނަ ކާމިޔާބީތަކެއް ހޯދާފައެވެ. ލުއިޒްގެ ކާމިޔާބީތަކަށް ބަލާލާއިރު އޭނާ ވަނީ 2016-2017 ވަނަ އަހަރުގެ ސީޒަނުގައި ޗެލްސީ އާއެކު އިނގިރޭސި ޕްރިމިއާ ލީގު ކާމިޔާބު ކުރުމުގެ އިތުރުން 2011-2012 ވަނަ އަހަރުގެ ސީޒަންގެ ޔުއެފާ ޗެމްޕިއަންސް ލީގު ޗެލްސީ އާއެކު ކާމިޔާބުކޮށްފައެވެ. އަދި ޕީއެސްޖީ އާއެކު ފްރެންޗު ލީގު ދެ ފަހަރެއްގެ މަތިން ކާމިޔާބުކޮށްފައެވެ.

ބްރެޒިލް ގައުމީ ޓީމާއެކު 2013 ވަނަ އަހަރު ފީފާ ކޮންފެޑެރޭޝަންސް ކަޕް ކާމިޔާބު ކޮށްފައިވާ ލުއިޒް ވަނީ އެ ޓީމަށް މިހާތަނަށް 57 މެޗު ކުޅެދީފައެވެ.