ސްކޫލުތައް ހުޅުވުމަށް ގިނަ ތައްޔާރީތަކެއް ވަމުން އަންނަ ކަމަށް އެޑިއުކޭޝަން މިނިސްޓްރީން ބުނެފި

ސްކޫލުތައް ހުޅުވުމަށް ގިނަ ތައްޔާރީތަކެއް ވަމުން އަންނަ ކަމަށް އެޑިއުކޭޝަން މިނިސްޓްރީން ބުނެފިއެވެ.

އަންނަ ޖުލައި މަހުގެ ތެރޭގައި ސްކޫލުތައް ހުޅުވުމަށް ނިންމާފައިވާއިރު، މިކަމާއި ގުޅޭ އެންމެ ފަހުގެ މައުލޫމާތު ހިއްސާކޮށް އެޑިއުކޭޝަނުން ބުނެފައިވަނީ، ސްކޫލުތައް ހުޅުވުމަށް ބޭނުންވާ ބަޖެޓް ހަމަޔަށް ލިބިފައިވާ ކަމަށެވެ. އެގޮތުން، ސްކޫލު މާހައުލަކީ ދަރިވަރުންނަށް ރައްކާތެރި މާހައުލަކަށް ހެދުމަށް ހޯދަން ޖެހޭ ތަކެތި(ސެނިޓައިޒަރ، ޑިސްއިންފެކްޓް ކުރުމަށް ބޭނުންވާ ތަކެތި، އަތްދޮވުމަށް ސައިބޯނި) ހޯދައި ސްކޫލުތަކަށް ފޮނުވަމުންދާ ކަމަށެވެ.

ގިނަ ސްކޫލުތަކަށް މިހާރު ތަކެތި ފޮނުވާފައިވާކަން ފާހަގަކޮށް މިނިސްޓްރީން ބުނެފައިވަނީ މީގެތެރެއިން އަތް ދޮންނަ ސައިބޯނި ހޯދާފައިވަނީ ޔުނިސެފް ގެ އެހީތެރިކަމާއެކު ކަމަށާއި އެހެން ހުރިހައި ތަކެތި ގަނެފައި ވަނީ މިނިސްޓްރީގެ ބަޖެޓުން ކަމަށެވެ. ސްކޫލުތަކުގައި ގާއިމްކުރަން ޖެހޭ ހޭންޑްވޮޝިން ސްޓޭޝަންތައް މިހާރު ދަނީ ހަދަމުންދާއިރު ސްކޫލު ހުޅުވޭއިރު ހުރިހައި ސްކޫލެއްގައި ގާއިމުކޮށް ނިންމޭނެކަމަށް ވެސް އެޑިއުކޭޝަނުން ބުނެއެވެ.

އިތުރު މައުލޫމާތު ދެމުން އެޑިއުކޭޝަނުން ބުނެފައިވަނީ، ހުރިހާ ސްކޫލަކަށް ހުން ބަލަން މީޓަރ ފޯރުކޮށްދެމުންދާ ކަމަށެވެ. އަދި ސްކޫލު ހުޅުވޭއިރު ހުރިހައި ސްކޫލެއްގައި ކުރަންޖެހޭ މަރާމާތުތައްކޮށް ނިންމޭނެ ކަމަށާއި މި މަސައްކަތްތަކުގައި ބައެއް ކޮންސްޓްރަކްޝަން ކުންފުނިތަކުން ހިލޭ އެހީ ލިބޭ ކަން މިނިސްޓްރީން ވަނީ ފާހަގަކޮށްފައެވެ.

މީގެ އިތުރުން، މިފަދަ ބަލިމަޑުކަމަކަށްފަހު ގިނަ ދުވަސްތަކެއް ސްކޫލާއި ދުރުގައި ތިބުމަށްފަހު ދަރިވަރުން އެނބުރި ސްކޫލަށް އަންނައިރު ދިމާވެދާނެ ނަފްސާނީ ބަލިތަކަށް އެހީ ފޯރުކޮށްދިނުމަށްޓަކައި ރާއްޖޭގެ 11000 މުދައްރިސުންނަށް ބޭސިކް ސައިކޮސޯޝަލް ސަޕޯރޓާއި ސައިކޮލޮޖިކަލް ފަސްޓްއެއިޑްގެ ޓްރެއިނިންގް އެޑިއުކޭޝަނުން ވަނީ ފަށާފައެވެ. މީގެ އިތުރުން ސްކޫލުތަކުގެ ސަޕޯރޓް ސްޓާފުންނަށް ސެނިޓައިޒް އާއި ޑިސްއިންފެކްޓް ކުރާނެ ގޮތުގެ ތަމްރީނުތަކެއް ވެސް ދަނީ ހިންގަމުންނެވެ.

ސްކޫލު ހުޅުވުމުގެ މަސައްކަތް ކުރަމުންދަނީ ޔުނިސެފްގެ އެހީތެރިކަމާއެކު ތައްޔާރު ކޮށްފައިވާ، ތިން ބަޔަކަށް ބަހާލެވިފައިވާ 3 އަހަރު ދުވަހުގެ އެޑިއުކޭޝަން ރެސްޕޮންސް ޕްލޭނަކާ އެކުގައެވެ. މި ޕްލޭންގައި ސްކޫލުތައް ހުޅުވުމުގެ ކުރިން ވާންޖެހޭ ތައްޔާރީތަކާއި ސްކޫލުތައް ހުޅުވޭ މަރުހަލާގައި ކުރަން ޖެހޭ ކަންތަކާއި ސްކޫލުތައް ހުޅުވުމަށް ފަހު ކުރަންޖެހޭ ކަންތައް ހިމެނެއެވެ. އަދި ސްކޫލުތައް ހުޅުވަން ވާންޖެހޭ ތައްޔާރީތަކަށް ބޭނުންވާ ފައިސާ ހަމަޖައްސާފައިވަނީ ދިވެހި ސަރުކާރުގެ ބަޖެޓުންނާއި ޔުނިސެފް އާއި ޑަބްލިޔު.އެޗް.އޯ ގެ ދީލަތި އެހީތެރިކަމާއެކުގައި ކަމަށް އެޑިއުކޭޝަނުން ބުނެއެވެ.