ސިއްހީ ދާއިރާގެ ބޭނުމަށް އެތެރެކުރެވޭ ތަކެތީގެ ތެރެއިން މިހާތަނަށް 20 މިލިއަން ރުފިޔާ މައާފްކޮށްދީފި
23 ޖޫން 2020 | އަންގާރަ 18:22އެންމެ ގިނައިން ޑިއުޓީ މައާފް ކޮށްދެވުނީ ޑިސްއިންފެކްޓް ކުރަން ބޭނުންކުރާ އާލާތްތަކުން
ފަލަސުރުހީ ޕްރޮގްރާމްގައި ކޮމިޝަނަރ ޖެނެރަލް އޮފް ކަސްޓަމްސް އަބްދުﷲ ޝަރީފު ވާހަކަދައްކަވަނީ
ކޮވިޑް-19އާ ގުޅިގެން ސިއްހީ ދާއިރާގެ ބޭނުމަށް އެތެރެކުރެވޭ ތަކެތީގެ ތެރެއިން މިހާތަނަށް 20 މިލިއަން ރުފިޔާ މައާފްކޮށްދީފައިވާ ކަމަށް ކޮމިޝަނަރ ޖެނެރަލް އޮފް ކަސްޓަމްސް އަބްދުﷲ ޝަރީފު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ޝަރީފް ވިދާޅުވީ ކޮވިޑް-19އާ ގުޅިގެން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ދެފަހަރެއްގެ މަތިން ޑިއުޓީ މައާފް ކޮށްދެއްދެއްވި ކަމަށެވެ. އެގޮތުން ޚާއްސަ ގޮތެއްގައި ޑިއުޓީ މައާފްކުރި ތަކެތީގެ ތެރޭގައި ހިމެނެނީ ޑިސްއިންފެކްޓް ކުރަން ބޭނުންކުރާ އާލާތްތައް ކަމަށް ޝަރީފް ވިދާޅުވިއެވެ.
ޝަރީފް ވިދާޅުވީ ޕްރޮޓެކްޓިވް އެކިއުޕްމެންޓްގެ އިތުރުން ޑިއުޓީ މައާފްކުރި ތަކެތީގެ ތެރޭގައި އަތްދޮންނަ ސާމާނު ފަދަ އާލާތްތައް ހިމެނޭ ކަމަށެވެ. އެގޮތުން މިހާތަނަށް މިހާތަނަށް 20 މިލިއަން ރުފިޔާގެ ޑިއުޓީ މައާފް ކޮށްދީފައިވާ ކަމަށް ޝަރީފް ވިދާޅުވިއެވެ.
މީގެއިތުރުން ޝަރީފް ވިދާޅުވީ ލޮކްޑައުންއާ ގުޅިގެންވެސް އިތުރު އާލާތްތަކުން ޑިއުޓީ ފްރީ ކުރުމަށް މިިނިސްޓްރީ އޮފް އިކޮނޮމިން ޑެވެލޮޕްމެންޓްއާއެކު މަޝްވަރާތައް ކުރެވިގެން ދިޔަ ކަމަށެވެ.
ދުނިޔޭގެ ކަސްޓަމްސް ޖަމިއްޔާއިން އެންމެ ފުރަތަމަ ނެރުނު ގައިޑްލައިންއަށް އަލިއަޅުއްވާލައްވާ ޝަރީފް ވިދާޅުވީ ކޮވިޑް-19 އާ ގުޅުން ހުރި މުދާތައް ކްލިއަރ ކުރުމުގައި އަމަލުކުރީ އެއުސޫލާ އެއްގޮތަށް ކަމަށެވެ.
މުދާތައް އެއްގައުމުން އަނެއް ގައުމުގެ ބޯޑަރަށް މޫވް ކުރުމުގައި ވީހާ ވެސް ރިސްކް މެނޭޖްކޮށްގެން އެގައުމުން އަނެއް ގައުމަށް ފޯރުކޮށްދޭނެ ނިޒާމެއް ގާއިމް ކުރެވިފައިވާ ކަމަށެވެ. ޚާއްސަކޮށް އެދުވަސްވަރު ވަރަށް ގިނަ މީހުންގެ ބޭސްތައް ވެސް ވަކިވަކިން އައި ކަމަށާއި، މަސައްކަތްތައް ކުރިއަށް ގެންދިޔައީ ފަސޭހަ ނިޒާމެއްގެ ތެރެއިން ކަމަށް ޝަރީފް ވިދާޅުވިއެވެ.
އާއްމު ސިއްހަތު ރައްކާތެރިކުރުމުގެ ގާނޫނުގެ ދަށުން ރާއްޖޭގައި ސިއްހީ ކުއްލި ނުރައްކަލުގެ ހާލަތު އިއުލާން ކޮށްފައިވާ މުއްދަތުގެ ތެރޭގައި ދިވެހިރާއްޖެއަށް އެތެރެކުރުމަށް އެދޭ މުދަލުގެ ތެރެއިން، ސިއްހީ ދާއިރާގެ ބޭނުމަށް އިމްޕޯޓުކުރެވޭ ގޮގުލްސް، ޕްރޮޓެކްޓިވް ފައުންސް އަދި ކަވަރއޯލް، ހަޒްމަޓް ސޫޓްސް، ސަރޖަންސް ކެޕްސް އަދި ޝޫ ކަވަރު ފަދަ ރައްކާތެރިކަމުގެ ފިޔަވަޅުތަކަށް ބޭނުންވާ ތަކެތީގެ އިމްޕޯޓު ޑިއުޓީ އާއި ޕްރޮސެސިންގ ފީ ރައީސް އިބްރާހިމް މުހައްމަދު ސޯލިހު ވަނީ މައާފުކޮށްދެއްވާފައެވެ. އަދި ރައްކާތެރި ކަމުގެ ގޮތުން ބޭނުން ކުރެވޭ އަންގިއާއި މާސްކާއި ފޭސް ޝީލްޑް، އަދި ސައިބޯންޏާއި ސެނިޓައިޒަރ ފަދަ ގިނަ ބާވަތްތަކެއްގެ މުދަލުގެ ޑިއުޓީ ވަނީ މައާފުކޮށްދެއްވާފައެވެ.
