ކޮވިޑް-19 ވެކްސިންއަކާއި ނުލާވެސް މަރުވެދާނެ ކަމަށް އިޓަލީގެ ޑޮކްޓަރެއް ވިދާޅުވެއްޖެ

ކޮވިޑް-19 ވައިރަސް ދަނީ ބަލިކަށިވަމުން ކަމަށާއި ވެކްސިންއަކާއި ނުލާވެސް މަރުވެދާނެ ކަމަށް އިޓަލީގެ ގައިން ގަޔަށް އަރާ ބަލިތަކާއި ބެހޭ މާހިރެއް ވިދާޅުވެއްޖެއެވެ.

މިހާތަނަށް 9 މިލިއަނަށް ވުރެ ގިނަ މީހުންނަށް ބަލި ޖެހިފައިވާއިރު އެތައްހާސް ބަޔަކު ވަނީ މި ބަލީގައި މަރުވެފައެވެ. އެއާއި އެކު އެކި ގައުމުތަކުން މި ބައްޔަށް ވެކްސިންއެއް ހޯދުމަށް ދަނީ މަސައްކަތް ކުރަމުންނެވެ.

އިޓަލީގެ ހޮސްޕިޓަލެއްގައި މަސައްކަތްކުރާ ގައިން ގަޔަށް އަރާ ބަލިތަކުގެ ޚާއްސަ ޑޮކްޓަރެއް ކަމަށްވާ މަތޭއޯ ބަސެތީ ވިދާޅުވީ ފާއިތުވި މަސްތަކުގައި ވައިރަހަށް ވަރަށް ބޮޑެތި ބަދަލުތަކެއް އައިސްފައިވާ ކަމަށެވެ.

އެގޮތުން މާރޗު މަހާއި އޭޕްރިލް މަހު ވައިރަސް ޖެހުނު މީހުން ސީރިއަސް ހާލަތަށް ދިޔަ ކަމަށާއި ގިނަ މީހުންނަށް ވެންޓިލޭޓަރުގައި ފަރުވާ ދޭން ޖެހުނު ކަމަށެވެ. އެހެންނަމަވެސް، މިހާރު މި ވައިރަސް ޖެހޭ މީހުންގެ ތެރެއިން ހާލު ސީރިއަސް ވަނީ ވަރަށް މަދު ބަޔެއް ކަމަށާއި އެއީ ވައިރަހުގެ ޖެނެޓިކް މިއުޓޭޝަންއެއްގެ ސަބަބުން ވެދާނެ ކަމެއް ކަމަށް ބަސެތީ ވިދާޅުވިއެވެ.

ބަސެތީ ވިދާޅުވީ ވެކްސިންއަކާއި ނުލާ ވެސް ވައިރަސް މަރުވެދާނެ ކަމަށް ގަބޫލުކުރެވޭ ކަމަށެވެ.