ކޮވިޑް-19 އަށް ވެކްސިނެއް ހޯދިއްޖެ ކަމަށް އިޓަލީވިލާތުގެ ސައިންސްވެރިންގެ ޓީމަކުން ހާމަކޮށްފި އެވެ.

މި ވެކްސިން ކާމިޔާބުތޯ ބެލުމަށް މީދަލަށް ޖަހައިގެން ކުރި ޓެސްޓުތަކުގައި، އިންސާނުންގެ ހަށިގަނޑުން ނައްތާލެވޭ އެންޓިބޮޑީސް އުފެދުނު ކަމަށް މި ވެކްސިން އުފެއްދި ޓާކިސް ކުންފުންޏާ ހަވާލާދީ އިންޑިޕެންޑެންޓް ގައި ރިޕޯޓްކޮށްފައި ވެއެވެ. މި ޓެސްޓުތައް ހަދާފައިވަނީ، ގައިންގަޔަށް އަރާ ބަލިތަކަށް ހާއްސަ ރޯމްގެ ލަޒާރޯ ސްޕްލަންޒީނީ ހޮސްޕިޓަލުގެ އެވެ.

މިކަމާއި ގުޅޭ މައުލޫމާތު ހިއްސާކުރައްވަމުން ޓާކިސް ކުންފުނީގެ ސީއީއޯ ލުއީޖީ އައުރީޗިއޯ ބުނީ، މި ވަގުތު ވެކްސިނެއް އުފެއްދުމަށް އިޓަލީވިލާތުގައި ކުރާ މަސައްކަތުގައި އެންމެ ކުރި ހޯދާފައިވަނީ އެ ކުންފުނިން ކަމަށެވެ. އަދި މިއީ ދުނިޔޭގައި މިހާތަނަށް މި ވައިރަހަށް ފަރުވާކުރަން އުފެއްދި ވެކްސިންތަކުގެ ތެރެއިން، ވައިރަސްގެ ބާރު ކަނޑުވާލާ ހަމައެކަނި ވެކްސިންކަމަށް ގަބޫލުކުރާ ކަމަށް އޭނާ ބުނެފައި ވެއެވެ.

އިންސާނުންގެ ގަޔަށް ޖަހައިގެން ޓެސްޓު ކުރުމުގެ މަރުހަލާއާ ގުޅިގެން އައުރީޗިއޯ ބުނީ، ހޫނު މޫސުން ނިމުމަކަށް އައުމުން (ސެޕްޓެމްބަރު މަހު) ހިއުމަން ޓްރައަލްސް ފަށާނެ ކަމަށެވެ. މި ވެކްސިން ކާމިޔާބުވާނެ ކަމަށް އުއްމީދުކުރާ ކަމަށްވެސް އޭނާ ބުންޏެވެ.

ވެކްސިންގެ އެއް ޑޯޒަށް ފަހު، ވައިރަސް ނައްތާލާ އެންޓިބޮޑީޒް އުފެދުނެވެ. ޓެސްޓިންގގެ ދެން އޮތް މަރުހަލާއަކީ، އެންޓިބޮޑީޒްތައް ދިފާއީ ނިޒާމުގައި ހުންނަނީ ކިހާ ދުވަހަކަށްތޯ ބެލުމެވެ.

ކޮވިޑް-19 ޖެހެން މެދުވެރިވާ ޖަރާސީމު ނައްތާލަން ވެކްސިނެއް ހޯދަން ކުރާ މަސައްކަތުގައި ކާމިޔާބު ލިބޭނީ އިތުރު ފަރާތްތަކުގެ އެހީއާއެކު ކަމަށް އައުރީޗިއޯ ބުންޏެވެ. އަދި މި ނުރައްކާތެރި ބައްޔަށް ޝިފާއެއް ހޯދުމަށް ކުރާ މަސައްކަތަށް އެހީވުމަށް އޭނާ ވަނީ ގޮވާލާފަ އެވެ.