އެމެރިކާގެ އިގްތިޞާދު މާ އަވަހަށް ހުޅުވާލައިފިނަމަ މިހާރު ހަލުވިކަމާއެކު ފެތުރެމުންދާ ކޮވިޑް-19 ޖެހިގެން އެމެރިކާގައި މަރުވާ މީހުންގެ އަދަދު އެއަށްވުރެ އިތުރު ވެގެންދާނެ ކަމަށް އެމެރިކާގެ ނޭޝަނަލް އިންސްޓްޓިއުޓް އޮފް އެލަރޖީ އެންޑް އިންފެކްޝަސް ޑިޒީޒްގެ ޑިރެކްޓަރު ޑރ. އެންތަނީ ފައުޗީ ވިދާޅުވެއްޖެ އެވެ.

އެމެރިކާއަކީ މިވަގުތު ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 އެންމެ ގިނަ އަދަދެއްގެ މީހުންނަށް ޖެހި އަދި މަރުވަމުންދާ ގައުމެވެ. އެމެރިކާގައި ވައިރަސް ޖެހުނު މީހުންގެ އަދަދު 1.3 މިލިއަނަށް އަރާއިރު އެގައުމުގައި މަރުވި މީހުންގެ އަދަދު އަށްޑިހަ ހާހަށްވުރެ މައްޗަށް ވަނީ އަރާފަ އެވެ.

ރޮއިޓަރސް އިން ރިޕޯޓުކުރާ ގޮތުގައި ފައުޗީ ފޮނުއްވި އީމެއިލެއްގައި ވިދާޅު ވެފައިވަނީ އެމެރިކާއިން ވައިރަސް ކޮންޓްރޯލް ކުރުމަށް އެކުލަވާލާފައިވާ ގައިޑްލައިންގައިވާ ކަންކަމަށް ތަންފީޒު ނުކޮށް އެމެރިކާ ހުޅުވާލައިފިނަމަ ވައިރަސް ފެތުރުމުގެ އިތުރު ފުރުސަތުތަކެއް ފަހިވެގެންދާނެ ކަމަށެވެ.

ފައުޗީ ވިދާޅުވެފައިވަނީ ސެނެޓްގެ ހެލްތު އެޑިޔުކޭޝަން، ޕެންޝަން ކޮމިޓީ އަދި ލޭބަރ އިން ބާއްވާ ބައްދަލުވުމަށް ދެއްވަން ބޭނުންވާ މައިގަނޑު މެސެޖަކީ ގައުމު އަވަހަށް ހުޅުވާލުމަކީ ނުރައްކާތެރި ކަމެއް ކަމެވެ. އެހެންނަމަވެސް މިކަމަށް އިންސްޓްޓިއުޓް އޮފް އެލަރޖީ އެންޑް އިންފެކްޝަސް ޑިޒީޒްގެ ބަހެއް ނުލިބޭކަމަށް ރޮއިޓަރސް އިން ބުނެ އެވެ.

އެމެރިކާއިން މިހާތަނަށް ކޮވިޑް-19 އަށް 9.3 މިލިއަން ޓެސްޓް ކޮށްފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕްގެ ސީނިއަރ އެޑްވައިޒަރ އަދި ދަނބި ދަރިކަލުންޖެރެޑް ކުޝްނަރ ވަނީ ފޮކްސް ނިއުސްއަށް ދެއްވި އިންޓަރވިއު އެއްގައި ވިދާޅުވެފަ އެވެ.

އެމެރިކާގައި ވައިރަސް ޖެހޭ މީހުންގެ އަދަދު އިތުރުވަމުން ދިޔުމާއެކު ގިނަ ބަޔަކު ވައިރަސް އަށް ޓެސްޓް ކުރުމުގެ ކަންކަން އަންނަނީ ކުރަމުންނެވެ.