އިންޑިއާގެ ހުއްދަލިބި، 36 ބަލިމީހަކު އަންނަ ހަފްތާގައި ފުރުވާލުމުގެ މަސައްކަތް ކުރަނީ
ބަލިމީހުން ފަރުވާ ހޯދުމަށް ދިޔުމަށް ހަމަޖެހިފައިވަނީ އިންޑިއާގެ ކޮޗިންއަށް
އިންޑިއާގެ ބޮޑު ވަޒީރު ނަރެންދްރަ މޯދީ އާއި ފޮރިން މިނިސްޓަރ އަބްދުﷲ ޝާހިދު
އިންޑިއާގެ ހޯމް މިނިސްޓްރީގެ ޚާއްސަ ހުއްދައެއްގެ ދަށުން، ރާއްޖެއިން ފަރުވާލިބެން ނެތް، ބޮޑެތި ބަލިތަކަށް ފަރުވާކުރާ ފަރާތްތަކުގެ ތެރެއިން 36 ޕޭޝަންޓުން އަންނަ ހަފްތާގައި އިންޑިއާއަށް ގެންދިޔުމަށް އާސަންދަ ކުންފުންޏާ ގުޅިގެން މަސައްކަތް ކުރަމުންދާ ކަމަށް ފޮރިން މިނިސްޓްރީން ބުނެފިއެވެ.
މި ހުއްދައިގެ ދަށުން ފަރުވާ ހޯދުމަށް ދިޔުމަށް ހަމަޖެހިފައިވަނީ އިންޑިއާގެ ކޮޗިންއަށެވެ.
އިންޑިއާ ސަރުކާރުން މިކަމަށް ޚާއްސަ ހުއްދަ ލިބުނުކަން ރައީސުލްޖުމްހޫރިއްޔާ އަންގާރަ ދުވަހު ވަނީ އިއުލާންކުރައްވާފައެވެ.
މިދިޔަ ހަފްތާތަކުގެ ތެރޭގައި އިންޑިއާއިން ރާއްޖެއަށް ކަނޑައަޅާފައި ހުންނަވާ ސަފީރު ސަންޖޭ ސުދީރު އާއި މިނިސްޓަރ ޝާހިދު އާ ދެމެދު ބޭއްވުނު ބައްދަލުވުންތަކުގައި މިކަމާ ގުޅޭ މަޝްވަރާތައް ކުރެވުނު ކަމަށާއި ދެ ގައުމުގެ ފޮރިން މިނިސްޓްރީގެ މެދުގައި ގިނަ މަޝްވަރާތަކެއް ކުރެވިފައިވާކަމަށް ފޮރިން މިނިސްޓްރީން ބުންޏެވެ.
ރާއްޖެއިން ފަރުވާލިބެން ނެތް، ބޮޑެތި ބަލިތަކަށް ބޭސްފަރުވާކުރަން ޖެހޭ ފަރާތްތަކަށް އިންޑިއާއަށް ގޮސް ފަރުވާ ހޯދުމަށް އިންޑިއާ ސަރުކާރުން ރާއްޖެއަށް ޚާއްސަ ހުއްދައެއް ދެއްވިކަމަށްޓަކައި އިންޑިއާގެ ބޮޑުވަޒީރު ނަރެންދްރަ މޯދީއަށާއި، ޚާރިޖީ ވަޒީރު ޑރ. އެސް ޖައިޝަންކަރް އަދި ރާއްޖޭގައި ހުންނަ އިންޑިއާގެ ހައިކޮމިޝަނަށް މިނިސްޓަރ ޝާހިދު ޝުކުރު އަދާކުރައްވައިފިއެވެ.
މިނިސްޓަރ ޝާޙިދު ވިދާޅުވީ މިއީ ރާއްޖެއާ އިންޑިއާ ދެމެދު އޮންނަ ޚާއްސަ ގުޅުމުގެ ރަމްޒެއްކަމަށެވެ.
ރާއްޖެއިން ފަރުވާލިބެން ނެތް، ބޮޑެތި ބަލިތަކަށް ފަރުވާކުރާ ފަރާތްތައް ފުރުވާލުމުގެ ޚާއްސަ ހުައްދަ އިންޑިއާ ސަރުކާރުން ދިން ނަމަވެސް އިންޑިއާއިން އެގައުމުގެ ބޯޑަރު އަދި އާއްމުކޮށް ހުޅުވާލާފައެއް ނުވެއެވެ.
