ޖުލައި 15 ގައި ރާއްޖޭގެ ބޯޑަރު ހުޅުވާލައި، ރިސޯޓްތައް ހުޅުވާލަނީ
23 ޖޫން 2020 | އަންގާރަ 11:57ގެސްޓް ހައުސް ހުޅުވާލުމުގެ މަސައްކަތް ކުރައްވަމުންދާ ކަމަށް ވިދާޅުވި
ނޫސްވެރިންގެ ބައްދަލުވުމުގައި ރައީސް ސޯލިހް ވާހަކަފުޅުދައްކަވަނީ
ކޮވިޑް-19ގެ ސަބަބުން ރާއްޖޭގެ ބޯޑަރުތައް ބަންދުކޮށްފައި އޮތް އޮތުން ނިމުމަށް ގެނެސް ޖުލައި މަހުގެ 15 ވަނަ ދުވަހު އަލުން ބޯޑަރުތައް ހުޅުވާާލާނެކަން ރައީސް އިބްރާހިމް މުހައްމަދު ސޯލިހު ރަސްމީކޮށް އިއުލާންކުރައްވައިފިއެވެ.
ރައީސް އޮފީހުގައި މިހާރު ކުރިޔަށްދާ ނޫސްވެރިންގެ ބައްދަލުވުމުގައި ރައީސް ސޯލިހު ވިދާޅުވީ، ޖުލައި މަހުގެ 15 ވަނަ ދުވަހު ރިސޯޓްތައްވެސް ހުޅުވާލަން ހަމަޖެހިފައިވާ ކަމަށެވެ. ރައީސް ވިދާޅުވީ، ބޯޑަރު ހުޅުވާލާއިރު ރާއްޖެއަށް ލިބޭ އެންމެ މުހިއްމު ހިތްހަމަޖެހުމަކީ ރާއްޖެއަކީ ދަތުރުކުރުމަށް ރައްކާތެރި ގައުމެއް ކަމަށް ރާއްޖެއަށް އެންމެ ގިނައިން ފަތުރުވެރިން އަންނަ ޖަރުމަނުވިލާތުން ކަނޑައަޅާފައިވުން ކަމަށެވެ.
ރައީސް ވިދާޅުވީ، ފަތުރުވެރިކަން އަލަށް ފަށައިގަންނައިރު ސަރުކާރުގެ ވިސްނުން ހުރީ އިގްތިސާދީ އަވަސް ރިކަވަރީއަކާއި ދިމާލަށް ކަމަށެވެ. އެކަމަށްޓަކައި ކަމާއިގުޅޭ ހުރިހާ ދާއިރާއެއްގެ ބައިވެރިވުމާއި، ހިޔާލާއި މަޝްވަރާގެ މަތިން ކުރާނެ ކަންކަން ރާވައި، ހިންގުމުގެ އިތުރުން ފައިސާ ހޯދުމުގައިކުރަން ޖެހޭ މަސައްކަތްތައް ކުރުމަށް ޓާސްކުފޯސް އެއް އެކުލަވާލާފައިވާކަން ރައީސް ސޯލިހު ފާހަގަކުރެއްވިއެވެ.
ރައީސް ސޯލިހު ވިދާޅުވި ގޮތުގައި، ބޯޑަރު ހުޅުވާލާނީ ހުރިހާ ގައުމުތަކަށް ކަމަށާއި، އެއްވެސް ގައުމެއް އިސްތިސްނާ ނުކޮށް ކަމަށެވެ. ނޫސްވެރިޔަކު ކުރި ސުވާލަކަށް ޖަވާބު ދެއްވަމުން ރައީސް ވިދާޅުވީ، މި އަހަރުގެ ކުރިޔަށް އޮތް ތަނުގައި ފަސް ލައްކަ އާއި ހަ ލައްކަ އާއި ދެމެދު އަދަދެއް ފަތުރުވެރިން ރާއްޖެއަށް ޒިޔާރަތްކުރާނެ ކަމަށް ލަފާކުރެވޭ ކަމަށެވެ.
އެމަނިކުފާނުގެ އަންދާޒާ އަކީ މި އަހަރުގެ ތެރޭގައި ރާއްޖެއަށް ޖުމްލަ 8 ލައްކައެއްހާ ފަތުރުވެރިން ޒިޔާރަތް ކުރުމެވެ. ރައީސް ވިދާޅުވީ، އޭގެ މާލީ ފައިދާ ލިބެން ފަށާނީ އަންނަ އަހަރުގައި ކަމަށެވެ. ޓޫރިޒަމް މިނިސްޓްރީން ވަނީ ރާއްޖެ އަލުން ފަތުރުވެރިކަމަށް ހުޅުވާލާއިރު، ފަތުރުވެރިން އަމަލުކުރާނެ ގޮތުގެ އުސޫލެއް އެކުލަވާލައި އާއްމުކޮށްފައެވެ.
