ވަޒީފާ ގެއްލުނު މީހުންނަށް އެލަވަންސް ދޭން ގޮވައިލާ ޖާބިރު ހުށަހެޅުއްވި ކުއްލި މައްސަލަ މަޖިލީހުން ބޭރުކޮށްލައިފި
ޖާބިރު ވިދާޅުވަނީ ސަރުކާރުގެ ސިޔާސަތުތައް "ދޯހަޅި" ކަމަށް
ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު
ކޮވިޑް-19 ރޯގާއާ ގުޅިގެން ރާއްޖޭގެ ސިނާއަތްތަކުގައި ވަޒީފާ އަދާކުރަމުންދިޔަ އެތައްހާސް ބަޔެއްގެ ވަޒީފާ ގެއްލިފައިވާތީ، ވަޒީފާ ގެއްލުނު މީހުންނަށް މިހާރުން ފެށިގެން އެލަވަންސެއް ދިނުމަށް ގޮވާލައި، ރައްޔިތުންގެ މަޖިލީހަށް ހުށަހަޅުއްވި ކުއްލި މައްސަލަ މަޖިލީހުން ބޭރުކޮށްލައިފި އެވެ.
މި ކުއްލި މައްސަލަ ރައްޔިތުންގެ މަޖިލީހަށް ހުށަހެޅުއްވީ ކާށިދޫ ދާއިރާގެ މެމްބަރު އަބްދުﷲ ޖާބިރު އެވެ. ޖާބިރުގެ މި ކުއްލި މައްސަލަ މަޖިލީހަށް ބަލައިގަނެ، ބަހުސް ކުރަން ފެނޭތޯ ނެގި ވޯޓުގައި، ވޯޓުގައި ބައިވެރިވެވަޑައިގެންނެވި 28 މެމްބަރުންގެ ތެރެއިން 27 މެމްބަރުންގެ އަޣްލަބިއްޔަތުން އެ ކުއްލި މައްސަލަ މަޖިލީހަށް ބަލައި ނުގަތުމުން ނިންމުމުން، އެ ކުއްލި މައްސަލަ ވަނީ މަޖިލީހުން ބޭރުކޮށްލާފައެވެ.
ޖާބިރުގެ ކުއްލި މައްސަލާގައި މައިގަނޑު ގޮތެއްގައި ފާހަގަކުރައްވާފައިވަނީ، ކޮވިޑް-19 އާ ގުޅިގެން އެތައްހާސް ބައެއްގެ ވަޒީފާ ގެއްލުފައިވާތީ، އަދި އާމްދަނީއަށް ކުރަމުންދިޔަ މަސައްކަތް ހުއްޓިފައިވާތީ، ދިވެހި އެތައް ހާސް އާއިލާއެއް ބިކަހާލުގައި ޖެހިފައިވާ ކަަމަށެވެ. އެހެންކަމުން ވަޒީފާ ގެއްލުނު މީހުންނަށް މިހާރުން ފެށިގެން އެލަވަންސް ދިނުމަށް ޖާބިރު ވަނީ ގޮވާލައްވާފަ އެވެ.
މި ކުއްލި މައްސަލާގައި ޖާބިރު ވިދާޅުވެފައި ވަނީ، ކޮވިޑް-19 ރޯގާއާ ގުޅިގެން، ރާއްޖޭގެ އިގްތިޞާދު ނިކަމެތި ހާލަތަކަށް ވެއްޓި، އެތައްހާސް ބައެއްގެ ވަޒީފާ ގެއްލިގެންދިޔައީ ސަރުކާރުގެ "ދޯހަޅި" ސިޔާސަތުގެ ސަބަބުން ކަމަށެވެ.
ޖާބިރުގެ ކުއްލި މައްސަލާގައި ދެކަމެއް ކުރުމަށް ސަރުކާރަށް ގޮވާލައްވާފައި ވެއެވެ. ފުރަތަމަ ކަމެއްގެ ގޮތުގައި ޖާބިރު ފާހަގަކުރައްވާފައިވަނީ، ރާއްޖޭގެ އެކި ސިނާއަތްތަކުގައި މަސައްކަތްކުރާ އެންމެހާ ފަރާތްތަކަށް ލިބިފައިވާ ގެއްލުންތަކުން އަރައިގަނެވެންދެން ނުވަތަ ވަޒީފާ އަދާކޮށްގެން އާމްދަނީއެއް ލިބެން ފެށުމާ ހަމައަށް އެމީހުންނަށް ސަރުކާރުން އިނާޔަތް ދެމުން ގެންދިއުމުގެ އިންތިޒާމު މިހިނދުން މިހިނދަށް ހަމަޖެއްސުމަށެވެ.
ދެވަނަ ކަމެއްގެ ގޮތުގައި ޖާބިރު ހުށަހަޅުއްވާފައިވަނީ، ރާއްޖޭގެ ޓޫރިޒަމް އިންޑަސްޓްރީ ރިބައުންޑް ކުރުމަށް ބޭނުންވާ ރިސޯސަސް މިހާރުން މިހާރަށް ގާއިމުކޮށް ދިނުމަށާއި އެކަަމަށްޓަކައި ބިއުރޯއެއް އުފައްދަވާ ރާއްޖޭގެ ރައްޔިތުންނަށް ކުރިމަތިވެފައިވާ ދަތިތަކުން އަރައިގަތުމުގެ މަސައްކަތް މިހިނދުން މިހިނދަށް ފައްޓަވައި އެކަންކަން ހައްލުކޮށްދިނުމަށެވެ.
ވަޒީފާ ގެއްލުނު މީހުންނަށް އެލަވަންސެއް ދިނުމަށް ގޮވާލައި ޖާބިރު ކުއްލި މައްސަލައެއް މަޖިލީހަށް ހުށަހެޅުއްވިއިރު، ސަރުކާރުން ދަނީ ވަޒީފާ ގެއްލުނު މީހުންނަށް 5،000ރ ގެ އެލަވަންސެއް ދެމުން ނެވެ. އަދި ކޮވިޑް-19 ރޯގާއާ ގުޅިގެން ވާޒީފާ ގެއްލުނު ފަރާތްތަކާއި، ލިބެމުންދިޔަ އާމްދަނީ ގެއްލުނު ފަރާތްތަކަށް ވެސް ސަރުކާރުން ދަނީ އެހީތެރިކަން ވެދެމުންނެވެ. އެގޮތުން ސްޓިމިއުލަސް ޕެކޭޖްގެ ދަށުން ލޯނު ދިނުމާއި ކުރިން ނަގާފައިވާ ލޯނުތައް ދެއްކުމުގައި ލުއިތަކެއް ދީފައި ވެއެވެ.
ކޮވިޑް-19ގެ ރާއްޖޭގެ މިހާރުގެ ހާލަތަށް ރިއާޔަތްކޮށް، ސަރުކާރުން ދަނީ އަންނަ ޖުލައި މަހު، ރާއްޖޭގެ ބޯޑަރު ހުޅުވާލައި، ފަތުރުވެރިންނަށް ރާއްޖެ ހުޅުވާލުމުގެ މަސައްކަތް ކުރަމުން ނެވެ.
