މެމްބަރުންގެ ކޮއްތު މެނދުކަނޑާލައިފި، ދެން ގެންނަންޖެހޭނީ ތަށިބަރި
22 ޖޫން 2020 | ހޯމަ 07:48މަޖިލީހުގެ އިދާރާގައި މަސައްކަތްކުރާ 22 މުވައްޒަފަކު އައިސޮލޭޝަންގައިވޭ
ރައްޔިތުންގެ މަޖިލީހުގެ ޖަލްސާގެ ތެރެއިން
ރައްޔިތުންގެ މަޖިލީހުގައި މަސައްކަތްކުރާ މުވައްޒަފަކު ކޮވިޑް-19 އަށް ޕޮޒިޓިވްވެ، މުވައްޒަފުންތަކެއް އައިސޮލޭޝަނަށް ދާންޖެހުމުން މަޖިލީހުގެ ޚަރަދުގައި މެމްބަރުންނަށް ދެމުން އަންނަ ކެއުމާއި ސައި މެދުކަނޑާލާ، މެމްބަރުންނަށް ގެއިން ތަށިބަރި ގެނެވިދާނެކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އަންގަވައިފި އެވެ.
ހޯމަ ދުވަހުގެ ޖަލްސާގައި ވާހަކަ ދައްކަވަމުން ރައީސް ނަޝީދު ވިދާޅުވީ މުވައްޒަފަކު ޕޮޒިޓިވްވުމާއި ގުޅިގެން މަޖިލީހުގެ އިދާރާގައި މަސައްކަތްކުރާ 22 މުވައްޒަފަކު އައިސޮލޭޝަންގައިވާ ކަމަށެވެ. އަދި މީގެތެރޭގައި ގިނަ އަދަދަކަށް ސަޔާއި ކެއުމުގެ ކަންކަމުގައި ހަރަކާތްތެރިވާ މުވައްޒަފުން ހިމެނޭ ކަމަށް ރައީސް ނަޝީދު ވިދާޅުވި އެވެ.
އެހެންކަމުން މެމްބަރުންގެ ސަޔާއި ކެއުމުގެ އިންތިޒާމް މަޖިލީހުން މިހާރު މަޑުޖައްސާލާފައިވާ ކަމަށް ރައީސް ނަޝީދު ވިދާޅުވިއެވެ. އަދި މެމްބަރުން ގެއިން ތަށިބަރި ގެންނަ ނަމަ، ޗެކް ކުރާނެ ކަމަށް ރައީސް ނަޝީދު ވިދާޅުވި އެވެ.
ރައީސް ނަޝީދު ވިދާޅުވީ މަޖިލީހުގެ އިދާރާގައި ޖަލްސާތައް ބާއްވަނީ ކޮވިޑް-19 ގެ ނުރައްކާތެރިކަން އޮތްކަން އެނގިވަޑައިގެން ކަމަށާއި އެހެންނަމަވެސް އަބަދު އެގޮތުގައި ނުތިބެވޭނެ ކަން ގަބޫލު ކުރަންޖެހޭ ކަމަށެވެ.
މީގެކުރިން ރައްޔިތުންގެ މަޖިލީހުގެ ޖަލްސާތައް ވަނީ ވީޑިއޯ މެދުވެރިކޮށް ކުރިޔަށް ގެންގޮސްފަ އެވެ. އަދި ފަހުން މާސްކު އަޅައިގެން ގައިދުރުކަން ބަހައްޓައިގެން ޖަލްސާތައް މަޖިލީހުގެ އިދާރާގައި އަންނަނީ ބާއްވަމުންނެވެ. ރައީސް ނަޝީދު ވިދާޅުވީ ރައްކާތެރިކަމުގެ ފިޔަވަޅުތަކާއެކު މަޖިލީހުގެ ޖަލްސާތައް ކުރިޔަށް ގެންދެވޭނެ ކަމަށެވެ.
