ތަހުޤީޤު އިތުރަށް ކުރިޔަށް ގެންދެވެން ނެތް ކަމަށް މަރު ކޮމިޝަނުން އަންގައިފި: ރައީސް ނަޝީދު
22 ޖޫން 2020 | ހޯމަ 06:50މަރު ކޮމިޝަނުން ދެކޭގޮތުގައި މިހާރު އެކުލަވާލާފައިވާ ޑްރާފްޓަށް ދެން އިތުރު ހެއްކެތް ހޯދޭކަށް ނެތް
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
ގޮތްނޭންގޭ މަރުތަކާއި ގެއްލުވާލާފައިވާ މީހުންގެ މައްސަލަތައް ބަލާ ކޮމިޝަންގެ ތަހުގީގުތައް އިތުރަށް ކުރިޔަށް ނުގެންދެވޭނެކަމަށް ބުނެ އެކޮމިޝަނުން ރައްޔިތުންގެ މަޖިލީހަށް ސިޓީ އެއް ފޮނުވާފައިވާކަމަށް، ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގައި ވަޒީރުންނާއި ސުވާލުކުރުމުގެ އެޖެންޑާގެ ދަށުން އިސްލާމިކް މިނިސްޓަރ ޑޮކްޓަރ އަޙްމަދު ޒާހިރު އާއި ހަރުކަށި ފިކުރާގުޅޭގޮތުން މިސްކިތްތަކުގައި ހިނގާ ކަންކަމާއި ގުޅޭގޮތުން މެމްބަރަކު ސުވާލުކުރެއްވުމުން ރިޔާސަތުގައި އިންނެވި މަޖިލީހުގެ ރައީސް ވަނީ މަރު ކޮމިޝަންގެ ސިޓީގެ ވާހަކައިގެ މައުލޫމާތުތަކެއް ހިއްސާކުރައްވާފަ އެވެ. ރައީސް ނަޝީދު ވިދާޅުވީ ކޮމިޓީގެ ރިޕޯޓް މެމްބަރުންނާ ހަމައަށް އައުމުން މިކަން އިތުރަށް ސާފުވެގެންދާނެ ކަމަށެވެ.
ރައީސް ނަޝީދު ވިދާޅުވީ މަރު ކޮމިޝަނުން ދެކޭގޮތުގައި މިހާރު އެކުލަވާލާފައިވާ ޑްރާފްޓަށް ދެން އިތުރު ހެއްކެތް ހޯދޭކަށް ނެތްކަމަށެވެ. ކޮމިޝަނުން ބޭނުންވަނީ ހަމައެކަނި ވަޅި ޖެހި މީހާއަށް ދައުވާކުރަން ކަމަށް ރައީސް ނަޝީދު ވިދާޅުވި އެވެ.
ރައީސް ނަޝީދު ވިދާޅުވީ އެމަނިކުފާނު ދެކެވަޑައިގަންނަވާ ގޮތުގައި މިކަން މިއީ މުއުޖިޒާތުގެ ބާވަތުގެ ކަމެއްކަމަށެވެ.
މަރު ކޮމިޝަނުން ބަލަމުން އައި މައްސަލަތަކުގެ ތެރެއިން، ދީނީ އިލްމުވެރިޔާ އަދި އުނގޫފާރު ދާއިރާގެ ކުރީގެ މެމްބަރު ޑރ. އަފްރާޝީމް އަލީ އަވަހާރަކޮށްލި ގޮތާ ބެހޭ ޑްރާފްޓް ރިޕޯޓަކާއި ނޫސްވެރިޔާ އަހުމަދު ރިލުވާން އަބްދުﷲ ގެއްލުވައިލި ޖަރީމާއާ ގުޅޭ ރިޕޯޓެއް މަޖިލީހަށް ވަނީ ފޮނުވާފަ އެވެ. އަދި ކޮމިޝަނުން އަމިއްލައަށް ވެސް އޭގެ ބައެއް މައުލޫމާތު އާއްމުކޮށްފައިވެ އެވެ. ނަމަވެސް މުޅި ރިޕޯޓް އާއްމުކުރީ ރައްޔިތުންގެ މަޖިލީހުންނެވެ. އަދި މަޖިލީހުގައި އެރިޕޯޓްތަކާއި ގުޅިގެން ބަހުސްތަކެއްވެސް ވަނީ ކުރިޔަށް ގެންގޮސްފަ އެވެ.
ގޮތްނޭންގޭ ގޮތްގޮތަށް މަރާލާފައިވާ މީހުންނާއި ގެއްލުވާލާފައިވާ މީހުންނަށް އިންސާފުހޯދައި ދިނުމަކީ މިސަރުކާރުގެ ރިޔާސީ ވައުދެކެވެ. އަދި އެކަމާއި ގުޅިގެން ރައީސުލްޖުމްހޫރިއްޔާ އަށް ލިބިދޭ ބާރުގެ ދަށުން މަރުކޮމިޝަން އުފެއްދެވިއިރު އެކޮމިޝަނަށް ވަނީ ޤާނޫނީ ގޮތުން ބާރުތަކެއްވެސް ދީފަ އެވެ.
