މާވެޔޮ މިސްކިތް ހުޅުވޭނެ ތާރީހާ ގުޅޭގޮތުން މަޖިލިހުން އިސްލާމިކް މިނިސްޓަރާ ސުވާލުކުރަނީ
21 ޖޫން 2020 | އާދީއްތަ 13:42އިސްލާމިކް މިނިސްޓަރާ ސުވާލުކުރުމަށް ހުށަހަޅުއްވާފައިވަނީ މައްޗަންގޮޅި ދެކުނު ދާއިރާގެ މެމްބަރ އަހުމަދު ޚައިތަމް
ނައިބުރައީސް އާއި އިސްލާމިކް މިނިސްޓަރު މާވެޔޮ މިސްކިތް ބައްލަވާލެއްވުން
މާފަންނު ކޯރުކެނޑި މަގުގައި ހުންނަ މާވެޔޮ މިސްކިތް މަރާމާތު ކުރުމަށް ބަންދުކޮށްފައިވާއިރު އެ މިސްކިތް ނިމި އަލުން ހުޅުވޭނެ ތާރީޚެއް ސާފުކުރުމަށް އިސްލާމިކް މިނިސްޓަރ ޑރ. އަހުމަދު ޒާހިރާ ސުވާލުކުރުމަށް ހޯމަ ދުވަހު އޮންނަ ރައްޔިތުންގެ މަޖިލީހުގެ ޖަލްސާއަށް އެޖެންޑާކޮށްފިއެވެ.
ހޯމަ ދުވަހު އޮންނަ މި ދައުރުގެ 9 ވަނަ ޖަލްސާގައި އިސްލާމިކް މިނިސްޓަރާ ސުވާލުކުރުމަށް ހުށަހަޅުއްވާފައިވަނީ މައްޗަންގޮޅި ދެކުނު ދާއިރާގެ މެމްބަރ އަހުމަދު ޚައިތަމްއެވެ. ޚައިތަމް އިސްލާމިކް މިނިސްޓަރާއި ދެން ސުވާލުކުރައްވަނީ އެ މިސްކިތް މަރާމާތުކުރުމަށް ބަންދުކުރެވުނުތާ ކިހާ ދުވަހެއް ވެއްޖެތޯއެވެ.
ހޯމަ ދުވަހުގެ ޖަލްސާއަށް އިބްތިދާޢީ ބަހުސްކުރުމަށް އެޖެންޑާ ކޮށްފައިވަނީ ހިތަދޫ މެދު ދާއިރާގެ މެމްބަރ އަހުމަދު ރަޝީދު ހުށަހަޅުއްވާފައިވާ ކޮރޯނާ ވައިރަހުގެ ސަބަބުން އިޤްތިޞާދަށް ކުރިމަތިވެފައިވާ ގޮންޖެހުމާއި ކުރިމަތިލުމަށް ނިއު ނޯމަލްގެ ތެރެއިން ކޮވިޑް ފްރީޒޯން އެއް ކަނޑައަޅައި އިޤްތިޞާދީ ހަރަކާތްތައް ހިންގޭނެ ގޮތަކަށް ޤައުމު ހުޅުވާލުމަށް ޤަރާރެވެ.
ނުނިމިހުރި މަސައްކަތުގެ ތެރެއިން ހޯމަ ދުވަހުގެ ޖަލްސާގައި މެމްބަރުން ބަހުސްކުރެއްވުމަށް ހަމަޖެހިފައިވަނީ ފުވައްމުލަކު މެދު ދާއިރާގެ މެމްބަރ ހުސައިން މުހައްމަދު ދީދީ ހުށަހަޅުއްވާފައިވާ ޢާންމު ސިއްހަތުގެ ކުއްލި ނުރައްކަލުގެ ބިލް 2020އެވެ.
ހޯމަ ދުވަހުގެ ޖަލްސާއަށް ކޮމިޓީތަކުން ހުށަހަޅާ ތިން ރިޕޯޓެއް ވަނީ އެޖެންޑާކޮށްފައެވެ. އެއީ މެއި މަހުގެ ތެރޭގައި ގަދަ ވަޔާއެކު ރާއްޖެއަށް ކުރި ވިއްސާރާގައި ރަށްތަކަށް ލިބުނު ގެއްލުންތައް އެންވަޔަރަންމަންޓް އެންޑް ކްލައިމެޓް ޗޭންޖް ކޮމިޓީން ދިރާސާކޮށް ނިންމި ގޮތުގެ ރިޕޯޓެވެ. މި ރިޕޯޓް ވަނީ އެންމެ ފަހުން ކުރިޔަށް ގެންދިޔަ ޖަލްސާއަށް ހުށަހަޅާފަ އެވެ. އެހެންކަމުން ހޯމަ ދުވަހުގެ ޖަލްސާގައި ކުރިޔަށްދާނީ މިރިޕޯޓަށް ބަހުސްކުރުމެވެ.
ހޯމަ ދުވަހުގެ ޖަލްސާއަށް ކޮމިޓީތަކުން އަލަށް ހުށަހެޅުމަށް އެޖެންޑާކޮށްފައިވަނީ ޖިނާޢީ އިޖުރާޢަތުގެ ޤާނޫނަށް އިސްލާހު ގެނައުމުގެ ބިލް ޖުޑީޝަރީ ކޮމިޓީން ދިރާސާކޮށް ނިންމިގޮތުގެ ރިޕޯޓާއި ކ. ގުޅިފަޅު ޕޯޓް މަޝްރޫއުއަށް ބިން ހިއްކަން ފެށުމުން އެކަމާއި ގުޅިގެން އުފެދުނު ކަންބޮޑުވުންތައް ދިރާސާކޮށް އެންވަޔަރަންމަންޓް އެންޑް ކްލައިމެޓް ޗޭންޖް ކޮމިޓީން ދިރާސާކޮށް ނިންމި ގޮތުގެ ރިޕޯޓެވެ.
