ކުންފުނިތަކުގެ އަހަރީ ފީ ދެއްކުން ޑިސެމްބަރުގެ ނިޔަލަށް ފަސްކޮށްފި
20 ޖޫން 2020 | ހޮނިހިރު 07:08މި އަހަރުގެ ނިޔަލަށް އިތުރު ޖޫރިމަނާއެއް ނެތި ކުންފުނީގެ އަހަރީ ފީ ދެއްކޭނެ
މިނިސްޓްރީ އޮފް އިކޮނޮމިކް ޑިވެލޮޕްމަންޓް
ކުންފުނިތަކުގެ މި އަހަރުގެ އަހަރީ ފީ ދެއްކުން ޑިސެމްބަރު މަހުގެ ނިޔަލަށް ފަސްކޮށްފިއެވެ.
އިކޮނޮމިކް މިނިސްޓްރީން ނެރުނު ބަޔާނެއްގައި ބުނެފައިވަނީ ދިވެހިރާއްޖޭގެ ކުންފުންޏާބެހޭ ޤާނޫނުގެ ދަށުން ރަޖިސްޓްރީކޮށްފައިވާ ކުންފުނިތަކުގެ 2020 ވަނަ އަހަރުގެ އަހަރީ ފީ، ޖޫރިމަނާއަކާ ނުލައި މޯލްޑިވްސް އިންލެންޑް ރެވެނިއު އޮތޯރިޓީ މެދުވެރިކޮށް ބަލައިގަތުމުގެ އިންތިޒާމު، 31 ޑިސެމްބަރ 2020 ގެ ނިޔަލަށް ހަމަޖެހިފައިވާ ކަމަށެވެ.
އަމިއްލަ ކުންފުނިތަކުގެ އަހަރީ ފީއަކީ 2،000ރ. އެވެ. ޕަބްލިކް ކުންފުނިތަކުން އަހަރީ ފީގެ ގޮތުގައި 10،000ރ. ދައްކަން ޖެހެއެވެ. ކޮންމެ އަހަރެއްގެވެސް އަހަރީ ފީ މާރޗު މަހު ދައްކަން ޖެހެއެވެ. އެ މުއްދަތުގައި ފީ ނުދައްކައިފިނަމަ ކުންފުނީގެ މަސައްކަތްތައް ހުއްޓުވުމުގެ ބާރު ރެޖިސްޓްރާ އޮފް ކޮމްޕެނީސްއަށް ލިބިގެން ވެއެވެ.
ކޮވިޑް-19 މި ހާލަތުގެ ސަބަބުން ގިނަ ކުންފުނިތަކަށް މާލީ ގޮތުން ދަތިތަކާ ދިމާވެފައިވާއިރު ގިނަ ކުންފުނިތަކުން ވަނީ މުވައްޒަފުންގެ މުސާރައިގެ ވަކި އިންސައްތައެއް އުނިކޮށްފައެވެ. އަދި ބައެއް ކުންފުނިތައް އިނދަ ޖެހުމާއި ގުޅިގެން ބަންދުކޮށްފައިވެސް ވެއެވެ.
